Folketingimi ammaanermi oqalugiaat: Aki-Matilda Høegh-Dam danskisuumut nutsererusunngitsoq

Folketingimut ilaasortaq, Aki-Matilda Høegh-Dam Folketingimi sisamanngorpat ammaanersiornermi oqallinnermi oqalugiaruni danskisuumut nutserinianngilaq.

Taassuma tamanna Folketingimi siulittaasuinut mailikkut nalunaarutigaa. Maili taanna KNR-ip atuarpaa.

Tamanna siulittaasoqarfiup Siumup Folketingip ataatsimiittarfiani danskisut, kalaallisut savalimmiormiusullu toqqaannartumik nutserisoqartalernissaanut siunnersuutaanik akuersinnginneranut akerliuneruvoq.

- Ajornartorsiutaasoq siusinnerusukkut maluginiartinnikuuara, aaqqiissutissamillu arlaleriarlunga siunnersuuteqarnikuullunga, ilaatigut oqalutsinik inniminniinikkut. Tamannali ilissinnit (siulittaasoqarfimmit aaqq.) pinerit tamaasa itigartitsissutigineqartarpoq, naak atortorissaarutit Folketingimeereersaluartut atuinissassinnullu periarfissaqareeraluarluni, Aki-Matilda Høegh-Damimit Folketingimi siulittaasoqarfimmut mailimi allassimavoq.

Folketingip siulittaasuata, Søren Gadep (V) Folketingip ataatsimiittarfiani oqaluttaasut inissaannik inissaqartitsiniarluni allanngortiterilluni sanaartornissaq akisuallaarlunilu ajornakusuussasoq oqaatiginikuuaa.

Taamaaliortariaqanngitsorli Siumup oqaatiginikuaa.

Partiip Folketingimit toqqaannartumik nutserineq internetti atorlugu nammineq misilittarnikuuaa.

Tassani oqalutsip nunarsuarmiluunniit sumiikkaluaruniluunniit internettimut attaveqarluni iserfigisinnaasaa atorneqarsinnaavoq. Tassanilu oqalugiartoq, oqalutsi tusarnaartullu app-imut iserlutik oqaatigineqartut toqqaannartumik nutserneqartut tusarnaarneqarsinnaapput.  Tusarnaartullu tusarnaarutit nalinginnaasut atorlugit tusarnaarsinnaallutik.

Periuseq taanna nunarsuami sumiiffinni allani ilaatigut Naalagaaffiit Peqatigiit pisussaaffigisaanni inuaassutsit amerlasoorpassuit ataatsimut katersuuffigisaanni, oqaatsillu amerlasuut atorlugit oqaloqatigiiffigisartagaanni atorneqartarpoq.

Periuserli taanna Folketingip suli atulinngilaa.

Kalaallilli savalimmiormiullu Folketingimi partiivi soorlu Folketingimi oqalugiaatissanik nutserititsinissamut qaammatit tamaasa immikkut 70.000 koruuninik tunineqartarput.

Tamannali Aki-Matilda Høegh-Damip atorniarnagu maanna itigartitsissutigaa.

- Nammineq ilitsoqqussaralugu oqaatsinnik Folketingimi oqalussinnaanissara pissutigalugu kalaallisut danskisullu marloriaammik suliaqartariaqartussanngortinneqarusunngilanga, taanna Folketingimi siulittaasoqarfimmut mailikkut allappoq.

Aki-Matilda Høegh-Dam: Folketingip Siumut oqallinnermut ilaatinnianngilaa

Folketingimi kalaallisut, savalimmiormiusut danskisullu akornanni nutserinermut aaqqiissut siorna atulersinneqarpoq.

Aki-Matilda Høegh-Damip Folketingip naalagaaffeqatigiinneq pillugu ukiumoortumik oqallinnerani 2023-mi maajimi kalaallisut oqalugiarnerata kingorna pivoq.

Siumumeersulli aaqqiissut naammanngitsoq ingerlaavartumik isornartorsiortarpaa. Folketingimi siulittaasup, Søren Gadep nammineq siulittaasoqarfiullu aaqqiissutip nalilersornissaa piareersimaffigalugu ukioq manna maajimi paasissutissiissutigaa.

- Tamatuma oqallisigeqqinnissaa pisariaqarnersoq Folketingip ukiua nutaaq ukiaru aallartereerpat Folketingip siulittaasoqarfiani naliliiffigineqarnissaa siunnersuutigissavara. Folketingimi ilaasortat Atlantikup Avannaaneersut soorunami nalileeqataajumaarput.

Folketingimi ukioq nutaaq marlunngorpat aallartissaaq.

Aki-Matilda Høegh-Damilli Folketingimi siulittaasoqarfiup aaqqiissummik nalileereernissaanut utaqqinissani piareersimaffiginngilaa.

Aki-Matilda oqaaseqartarfimmit kalaallisuinnaq oqalunniaruni ammaanersiornermi oqallinnermi ilaatinniarneqarani ilisimatinneqarluni Søren Gademit mailimik pissarsisimalluni DR-ikkut radiokkut aallakaatitassiamut P1 Morgenimut oqaatigaa.

Tassa imaappoq oqalugiarsinnaavoq, kisianni folketingimi ilaasortat allat peqatigalugit oqalliseqataasinnaanavianngilaq. Tamannalu Siumumeersup uggoraa, taassumali kalaallisuinnaq oqalugiarniarluni pilersaarutini attatiinnarniarlugu DR-imut oqaatigaa.

- Isumaqarpunga uggornartuusoq, tassami atortorissaarutit isumalluutillu tamarmik pigereerigut tamanna ajornaatsumik aaqqiissuteqarfiusinnaavoq.

Folketingip siulittaasua, Søren Gade mailikkut ima allappoq:

”Folketingip siulittaasoqarfiata Folketingip ataatsimiittarfiani kalaallisut oqalugiartoqassaguni atuuttussanik aalajangiineratut atuuttussanik Aki-Matilda Høegh-Dam oqaaseqartutut oqaasissaminik nutserititsinissamut aningaasanik tunineqarnikuuvoq. Aalajangiineq taanna toqqaannartumik nutserititsinermik suliaqarnerunngilaq, kisianni oqaaseqartup kalaallisut oqaloriarluni danskisuumut nutserinermut periarfissaalluni".

Folketingip siulittaasoqarfiata naammagittaalliuut itigartitsissutigigaa

Aki-Matilda Høegh-Damimit nalunaarut taassuma Folketingimilu siulittaasoqarfiup akornanni suliami allami pisoqarnerata nalaani nalunaarutigineqarpoq.

Taannami suleqatini Konservative Folkepartimeersoq, Rasmus Jarlov pillugu naammagittaalliuteqarnerminik itigartinneqarpoq.

Naammagittaalliuut taanna Jarlovip siorna Nuummut angalaneq pillugu Folketingip ataatsimiittarfiani upernaaq oqaaseqarneranut pisumut tunngassuteqarpoq:

- Damip ilaqutai siorna aasakkut tikeraarninni nuannaarutigeqisannik ilaatigut ilassivakka, ilaqutariit Nuummi katersortarfiliarput tassani apeqquteqarfigisinnaallunga. Oqallilluarpugut, ilaqutaalu qallunaajusorujussuusut tassani paasivara, Rasmus Jarlov Folketingimi naggataarutaasumik oqallinnerup nalaanni oqarpoq.

Rasmus Jarlov tamatuma saniatigut Aki-Matilda Høegh-Damip danskit oqaasii ilitsoqqussaralugit oqaaserigai isumaqarluni oqallinnermi tassani aamma oqaatigai.

Aki-Matilda Høegh-Damilli kalaallisut ilitsoqqussaralugu oqaaseqarluni erseqqissaatigaa. Taamaammat oqaaserisai pillugit ataqqineqanngitsutut misigisimanerarpoq.