Folketingip siulittaasua: Oqalutseqarnermut malittarisassat aasaanerani sulinngiffeqareerutta oqallisigeqqissinnaavagut

Kalaallisut savalimmiusullu Folketingimi oqaloqqusaanermik malittarisassat naapertuunnersut takoqqaarlugu allanngornissaat pisariaqassanersoq oqallisigeqqikkumaaritsik, Folketingip siulittaasua Søren Gade (V) oqarpoq.

Allattoq Helle Nørrelund Sørensen

maajip 02-at 2024 07:35

Folketingimi ilaasortat Atlantikup Avannaaneersut oqaatsiminnik atuitillutik oqalutseqarsinnaalerallarnavianngillat.

Folketingilli ukiuata nutaap oktobarimi marlunngornermi siullermi aallartinnerata kingorna oqalutseqartalersinnaanissaat ilimanarpoq.

Folketingip siulittaasua, Søren Gade (Venstre), KNR-imut allakkamini taama ilisimatitsivoq.

- Savalimmiusut kalaallisullu Folketingimi oqaloqqusaalernermiit aatsaat ukiup affanngorsimalerpoq. Taamaammat tamatumani malittarisassat allanngussanersut oqaatigissallugu siusippaallaartoq Folketingip siulittaasoqarfia isumaqarpoq, taanna allappoq nangillunilu:

- Tamatuma oqallisigeqqinnissaa pisariaqarnersoq Folketingip ukiua nutaaq ukiaru aallartereerpat Folketingip siulittaasoqarfiani naliliiffigineqarnissaa siunnersuutigissavara. Folketingimi ilaasortat Atlantikup Avannaaneersut soorunami nalileeqataajumaarput.

FOLKETINGIMI ILAASORTANUT ATLANTIKUP AVANNAANEERSUNUT TAAKKULU QINERSISARTUINUT NUTAAMIK AAQQIISSUTEQARNEQ

- Oqaatsigut savalimmiormiullu oqaasii Folketingimi atorneqartalissapput. Folketingimi ilaasortat Atlantikup Avannaaneersut Folketingip oqaluttuarfianiit oqaatsiminnik atuisinnaalissapput aamma nutserneqartussaanerat pillugu oqalugiarnerat sivitsorneqassaaq

- Atlantikup Avannaanmiut Folketingimi partiivisa oqalutseqarnissaat aningaasaliiffigineqassapput

- Folketingip nittartagaata ilaa kalaallisut savalimmiormiutullu nutserneqartalissaaq. Folketingimi suliat aalajangiinerillu tamatumani pineqarput

- Folketingimi ilaasortanut taassumalu iluani sulisunut Kalaallit Nunaata Savalimmiullu oqaluttuarisaanerat, kulturiat, politikkikkut inissisimanerat oqaasiilu oqaluttuarineqarlutik pikkorissaaatigineqartalissapput

Najoqqutaq: Folketingip siulittaasoqarfiata tusagassiorfinnut 2023-mi septembarip ulluisa 21-anni nalunaarutaa

Folketingimi ilaasortaq Siumumeersoq Aki-Matilda Høegh-Dam toqqaannartumik oqalutseqarnermi nittartakkakkut attaveqaatitigut app´-imut atugassartik Folketingip oqalutseqarnermut atortorissaarutaanut atassusersinnaaneritik apeqqutigalugu allagaqareersorlu, Søren Gade taama ilisimatitisvoq.

Aki-Matilda Høegh-Damip Søren Gadellu e-mailikkut allagaat takuagut.

Folketingimi ilaasortoq Siumumeersoq Danmarkip ministeriuneranut Mette Frederiksenimut (Socialdemokratiet) Folketingimi sapaatit akunnerata siuliani marlunngornermi apeqqarissaanermi kalaallisut oqalunnermini oqalutseqarsimagaluarpat, kalaallisuumiit qallunaatuumut toqqaannartumik oqalutsigisaa Folketingimiittunit tamanit tusarnaarneqarsimasinnaasussaagaluarpoq.

Aki-Matilda Høegh-Damili oqalutseqannginnami kalaallisut qallunaatullu tulleriisinnaarlugit apeqqarissaaqataasariaqarsimavoq.

Aki-Matilda Høegh-Dam: Folketingip siulittaasoqarfia kalaallisut oqalunnissamut akimmisaarisoq

Folketingimi ilaasortat nunatsinneersut savalimmiuneersullu oqaatsitik atorlugit oqalusinnaanerannik, Folketingip siulittaasoqarfia siorna septembarimi akuersivoq. Taakkuali oqaatsitik atorlugit saqqummiussaminnik qallunaatut aamma saqqummiussisarnissaat piumasaqaataavoq.

Folketingimi ilaasortat Atlantikup Avannaaneersut sisamaasut oqalutseqarnermut atugassaminnik tamarmik immikkut 70.000 koruuningajalluinnarnik tapiissutisisalersinnaanngorput.

Toqqaannartumilli oqalutseqarnissaat periarfissaanngitsoq, Folketingip siulittaasoqarfia taamanikkut aamma aalajangerpoq. Folketingimmi ataatsimiittarfitoqaa oqaluttaasarfiliortitsinissaq akisuallaartoq, Søren Gade ukiarmi oqarpoq.

Oqaluttaasarfiliortitseqqaarnissarli pisariaqanngitsoq, Aki-Matilda Høegh-Dam isumaqarpoq. Tamannalu uppernarsarniarlugu Christiansborgimi suleqatinilu toqqaannartumik oqalutseqarnermi nittartakkakkut attaveqaatitigut atortorissaarut app´-eq misilittarpaat.

Aamma atuaruk Folketingimi oqalutseqarneq: Aki-Matilda Høegh-Damip itigartitsineq ugguaraa

Siumumeersorlu Folketingimi marlunngormat apeqqarissaanermi kalaallisut apeqqutiminik qallunaatut saqqummiinissi pisariaaruteqqullugu tassaq taamaaliorumagaluarpoq.

Søren Gadelli Aki-Matilda Høegh-Damip attaveqaatitigut toqqaannartumik oqalutseqarnissaanut tassa itigartitsivoq.

- Oqaatigeriikkatsitut malittarisassat atuutileqqammermata, Folketingip siulittaasoqarfiata toqqaannartumik oqalutseqarsinnaanissamut akuersinngilaq, taanna allappoq.

Folketingi ukrainemiunik tikeraartoqaraangami NATO-llu inatsisartuinik ataatsimeeqateqaraangami oqalutseqartartoq, Aki-Matilda Høegh-Damip Søren Gademut akissummini uparuarpaa.

Taamaammat Folketingip siulittaasoqarfia Folketingimi kalaallisut oqalunnissamut akimmisaarilluinnarsorinartoq ilaasortaminillu qallunaanik Atlantikup Avannaaneersunillu immikkoortitsilluinnarsorinartoq, Aki-Matilda Høegh-Dam Søren Gademut allappoq.

- Taama aalajangernersi Folketingimut kalaallisut oqaluttoqarnerulernissaanut akimmisaarinissinnik ersersitsilluinnarpoq, taamaanneralu pakatsinarpoq oqalutseqarnermullu assigisaannullu tapiissuteqartarnissinnut assortuulluinnarpoq.

Nutaarsiassami kukkunermik nassaarsimaguit uunga allaffigineqarsinnaavugut.