Folketingimi oqalutseqarneq: Aki-Matilda Høegh-Damip itigartitsineq ugguaraa

- Søren Gadep Folketingillu siulittaasoqarfianit akissut pakatsissutigingaatsiarpara. Toqqaannartumimmi oqalutseqarnerup atuuttuartunngornissaa anguniagariuaannarparput.

Aki-Matilda Høegh-Dam Folketing ministeriuneq, Mette Frederiksen peqatigalugu akunnermi apeqqarissaartoqarnerata kingorna Folketingip ataatsimiittarfianit anillaqqammitsiarluni oqarpoq.

Taassumami toqqannartumik oqalutseqarnermut aaqqiissut Siumup ataatsimiittarfimmi tallimanngornermi oqallinnermi misittagaa atorniarlugu eqqarsaatersuutigisimagaluarpaa.

Folketingili itigartitsivoq – itigartitsinerlu taanna Aki-Matilda Høegh-Damip uggoringaatsiarpaa:

- Folketingi kalaallisut oqaluttoqarnissaanut piumangaatsiartutut takussutissiilluni aningaanik immikkoortitsivoq, taanna oqarpoq, nangillunilu:

- Kisianni suliaq 2019-imi suliariligara oqaaseqartarfimmiillu kalaallisut oqalunnissannik aalajangernissamut tungaanut tusaaneqanngisaannartoq ilungersunarpoq.

Oqaatsit aaqqissuussinermut allannguisut

Siumumit Aki-Matilda Høegh-Dam Folketingimi oqaaseqartarfimmit kalaallisut – danskisuumut ataasinnguamik danskisuumut nutserneqanngitsumik siorna oqalugiarniarluni aalajangermat oqallittoqangaatsialerpoq.

Tamanna ministeriunerup Mette Frederiksenip naalagaaffeqatigiit pillugit 2023-mi paasissutissiinerata nalaani pivoq.

Taamani SF-ip Kalaallit Nunaannut tunngatillugu oqaaseqartartua, Karsten Hønge oqallinnerup nalaani ima oqarpoq:

- Oqaloqatigiinneq ajornakusuulaarpoq. Oqaaseqartoq Danmarkimi inunngornikuusoq, danskisullu oqallorissoq nalunngilara, kalaallit tusagassiutaannut atorneqartussaammat isiginnaartitseqataasuunianngilanga.

Pisimasorli taanna kalaallit tusagassiorfiinit taamaallaat allaaserineqanngilaq. Tuluit tusagassiuutaat The Guardian, finskit tusagassiuutaat Iltalehti aamma amerikamiut tusagassiuutaat Bloomberg aamma allaaserinnipput.

Suliffeqarfiup Danske Talerip Aki-Matilda Høegh-Dam ukiup ingerlanerani malunnaateqarluartumik oqaluarsiamasutut nersornaaserpaa.

Oqallittoqangaatsiarnerata kingunerisaanik Folketingip nunanit avannarlernit ilaasortat nutserititsinissamut oqalutseqarnissamullu atorfinitsitsinissamut pisinissamullu immikkut 67.000 koruuninik tapiissuteqarfigai.

Aaqqiissulli taanna Aki-Matilda Høegh-Damip naammagisimaanngilluinnarpaa:

- Ataatsimiittarfimmiilinnginninni suut tamarmik nutsertitsimassagikka naatsorsuutigaat. Tamannali periarfissaajuaannanngilaq, taanna oqarpoq, nangillunilu:

- Illuatungerisap qanoq oqaaseqarnissaa ilisimaneqanngisaannarmat oqallinnernik ateqarput. Oqaloqatigiittoqarlunilu oqallittoqarnissaa pisariaqarpoq. Piffissamilu tassani nammineq aamma oqaluttaaniaraanni tamanna ajornaatsuinnaanngilaq.

Danskit pillugit marloqiusamik sulinerusoq

Siumut – tallianngormat Aki-Matilda Høegh-Damip danskit Folketingianni kalaallisut oqalugiarneranit ukioq ataaseq qaangiulluinnartoq ataatsimiittarfimmit Facebook aqqutigalugu toqqaannartumik oqalutseqarniarsarivoq. Aaqqiissut taanna Aki-Matilda Høegh-Damip aaqqiissut taanna atuuttuaannartunngortikkusullugulu imminut ikiuutaatikkusukkaluarpaa.

Folketingimimi politikeriuneq oqaluttaaniarnerlu marloqiusamik sulinerusoq, taanna isumaqarpoq:

- Tamanna toqqaannartumik oqalutseqalernikkut pinngitsoortinneqapallassinnaavoq, ataatsimiittarfimmiittut tamarmik taamaalillutik qanoq oqartoqarnera paasisinnaassavaat. Taamaaliornikkut politikeriuinnarluni saniatigullu oqaluttaasariaqarnani ataqqinassuseq pigiinnarneqarsinnaavoq, taanna oqarpoq, nangillunilu:

- Tamannami nunanit avannarlernit ilaasortanut kisimi eqquilluni marloqiusamik sulineruvoq, soorlu suminngaanneerneq pissutigalugu pillarneqarluni.