Folketingimi paatsuungasoqartoq: Aki-Matilda Høegh-Dam kalaallisuinnaq oqalunniartoq
Folketingimut ilaasortaq, Siumumeersoq, Aki-Matilda Høegh-Dam naalagaaffeqatigiinneq pillugu oqallinnermi Folketingip oqaaseqartarfianit kalaallisuinnaq oqalunniarpoq.
Folketingimi ilaasortat allat apeqquteqaraangata kalaallisuinnaq aamma akisarpoq. Sooq taamaaliornera ilisimaneqanngilaq. Ministeriuneq, Mette Frederiksen (S) aamma Folketingip ataatsimiittarfianiippoq.
SF-imit Karsten Hønge oqalinnermi naammatsippoq.
- Kalaallit tusagassiorfiini atorneqartussaanera piinnarlugu akuuinnarnianngilanga, Hønge oqarpoq, taassuma Aki-Matilda Høegh-Dam danskisoorluarsinnaasoq nalunngilaa.
Folketingimi siulittaasup issiavianit aqutsisuusup, Erling Bonnesenip (V) Aki-Matilda Høegh-Damip kalaallisut oqaatigisani folketingimi ilaasortat sinnerisa paasisinnaaniassammatigit danskisut aamma oqaatigissagai kaammattuutigaa. Taamaaliorumanngilarli.
- Oqalugiaatigisap danskisut atuarneqarnissaa kaammattuutigeqqissavara. Oqaaseqartoq taama kissaateqarpa?, Aki-Matildap aallaqqaasiutigalugu oqalugiaatini naammassimmagu Bonnesen Høegh-Damimut oqarpoq.
Aki-Matilda Høegh-Damilu kalaallisut akivoq. Bonnesenilu paasisaqanngilaq.
- Oqaaseqartup danskisut atuarusunnerluni aappimik naaggamilluunniit akisinnaavaanga?, Bonnesen aperivoq.
- Naamik, Høegn-Dam danskisut akivoq, tamatumalu kingorna kalaallisut oqaluleqqilluni.
Bonnesenip suliaq Folketingip aqutsisuinut siulittaasoqarfimmut ingerlateqqinniarpaa.
Danmarksdemokraternimit Peter Skaarupip pisoq "toorlannerarpaa".
- Danskit folketingianni oqalunniaraanni tamanna danskisut ingerlanneqartariaqarpoq. Taamaanngippat isumalluutissaqartoqarnavianngilaq, taanna Twitterikkut allappoq.
Naalagaaffeqatigiit pillugit oqallinneq tallimanngornermi qulinut aallartippoq, Aki-Matilda Høegh-Damillu oqaaseqarnera ataasinngunngitsiartoq aallartippoq.
Nalunaaqutaq ataatsip kingunitsianngua Aki-Matilda Høegh-Damimut apeqquteqartoqarumajunnaartoq Bonnesenip paasivaa.