Siumut sinnerlugu qinikkap naammagittaalliutaa itigartinneqartoq
Folketingimi ilaasortat aasaanerani sulinngiffeqarnissamut naggataarutaasumik oqallitsinneqaraangata oqallinneq ilaatigut sakkortusinnaasarpoq. Ukioq manna maajimi aamma taamaappoq, tassa nagggataarutaasumik maajip ulluisa 29-anni maajillu ulluisa 31-anni aamma oqallittoqarmat Aki Matilda Høegh-Damip Rasmus Jarlov, Det Konservative Folkepartiimersoq, Folketingip siulittaasoqarfianut naammagittaalliutigaa.
Aki Matilda Høegh-Dam isumaqarpoq Rasmus Jarlov kinaassusersiorlunilu nikassaarpaluttumik nipeqarluni, Aki Matilda Høegh-Damip ilitsoqqussaralugit oqaasii inuiaassusaalu pilllugit oqaaseqartoq. Jarlovimi isumaqarpoq Aki Matilda Høegh-Damip ilitsoqqussaralugit oqaasii tassaasut danskisut oqallunneq. Aki Matilda-Høegh-Damillu kinaassusaanut tamanna naapertuutinngilaq.
Massakkulli - qaammatit pingasut qaangiutereersut - naammagittaalliuut Folketingip siulittaasoqarfianit itigartitsissutigineqarpoq.
- Kalaallisut kinaassutsima arlaleriarluni qajannarsisinneqarsimaneranut suliap ingerlateqqinneqartariaqanngitsutut
Folketingip siulittaasoqarfiata aalajangernera pakatsissutigeqaara, Aki-Matilda Høegh-Dam oqarpoq. Killiligaanani oqaaseqarsinnaanerup aqqani ammip qalipaataannik assigiinngisitsisoqarsinnaanera tupigeqaara, Aki Matilda Høegh-Dam, tusagassorfinnut nalunaarummi ilaatigut allappoq.
Siulittaasoqarfimmit akissut
Folketingets Præsidium tassaavoq Folketingip siulittaasoqarfia. Siulittaasoq tassaavoq Søren Gade, Venstremeersoq, Folketingimullu aamma siulittaasoq. Høegh-Damip naammagittaalliutaata itigartitsissutigineqarneranut tunngavilersuutimini taanna oqarpoq politikeri Folketingimi siammasissorujussuarmik oqaaseqarsinnaasoq.
- Folketingip ataatsimiittarfiani ataqqinarpaluttumik oqallittoqartassasoq siulittaasoqarfik isumaqarpoq, folketingimilu ilaasortat ilaasortaqatitik naligiimmik, torersumik ataqqinnippaluttumillu pisassagaat isumaqarpugut. Ilaasortat ataasiakkaat inuttut atugaat, soorlu inuiaassusaat, oqaasii, suiaassusaat, upperisaat, ilinniarsimasaat, suliallu ilaalu ilanngullugit immikkut sammineqaraangata tamanna atuuppoq, Søren Gade, itigartitsissuteqarnermini ilaatigut tunngavilersuivoq.
- Ilaasortat ataasiakkaat oqaaseqarsinnaassusut siammasissut Folketingip siulittaasoqarfia taassuma saniatigut isumaqarpoq, tamannalu ilaasortat killiligaanatik oqaaseqarsinnaanerannut, tassa Folketingimut ilaasortat sulinerannut naapertuuppoq.
- Siulittaasoqarfiup tassunga atatillugu ataatsimut nalilersuinera tunngavigalugu isumaqarpugut suliaq una ingerlateqqinneqartariaqanngitsoq
Jarlov: "Ilaqutariiupput danskiusorujussuit"
Folketingmiliuna oqallinnermi Aki Matilda Høegh-Damip Rasmus Jarlovimut tunngatillugu naammagittaalliutigigaa?
Konservativit sinnerlugit FoIketingimut ilaasortap Nuummut siorna tikeraarnini Folketingimi oqallittoqarnerani ilaatigut innersuussutigaa:
- Damip ilaqutai siorna aasakkut tikeraarninni nuannaarutigeqisannik ilaatigut ilassivakka, ilaqutariit Nuummi katersortarfiliarput tassani apeqquteqarfigisinnaallunga. Oqallilluarpugut, ilaqutaalu qallunaajusorujussuusut tassani paasivara, Rasmus Jarlov Folketingip naggataarutaasumik oqallinnerisa nalaanni ilaatigut oqarpoq.
Aki Matilda Høegh-Damip ilitsoqqussaralugu oqaasii danskiusut, Rasmus Jarlov oqallinnerup nalaani taassuma saniatigut isumjaqarpoq
Aki Matilda Høegh-Damip naammagittaalliuteqarnermini ilaatigut oqaatigaa Rasmus Jarlov assingusumik siorna oqaaseqartoq, tassungali atatillugu Aki Matilda Høegh-Damip oqaatigaa ilitsoqqussaralugu oqaasii tassaasut kalaallisut oqaatsit.
- Naak naqqinneqareeraluarluni inuup ataatsip inuiaassusaata kinguneqartinneqarani nassuiarneqarsinnaanera amiilaarnaqaaq. Taama iliorneq nalinginnaasunngorsimassappat kingunissaqanngitsumik qanorsuaq immitsinnut taaguusersorsinnaavugut, piviusoq qanorluunniit ikkaluarpat, Aki Matilda Høegh-Dam oqarpoq.
