Aki-Matilda Høegh-Damip folketingimut ilaasortaq Konservativeneersoq naammagittaalliutigigaa
Folketingimut ilaasortap, Siumumeersup, Aki-Matilda Høegh-Damip folketingimi ilaasortaq, Det Konservative Folkepartimeersoq, Rasmus Jarlov Folketingip Siulittaasoqarfianut naammagittaalliutigaa. Tamanna Folketingimi naggataarutaasumik sapaatip akunnerata siuliani pingasunngornermi oqallinnerup kingorna pivoq.
Aki-Matilda Høegh-Damip oqarnera naapertorlugu Rasmus Jarlov ilitsoqqussarlugu oqaatsiminut inuiaassutsiminullu nikanarsaasumik assigiinngisitsisumillu oqaaseqarpoq. Tamanna naammagittaalliutimini KNR-ip allagaatinik takunniffigisinnaasaani nassuiaatigaa.
Folketingimut ilaasortaq konservativeneersoq Nuummut siorna angalanini ilaatigut innersuussutigaa:
- Siorna aasakkut Kalaallit Nunaanniikkama nunnaarutigeqisannik Fru Damip ilaqutai naapippakka. Ilaqutariit tamarmik Nuummi katersortarfimmi uannut apersuiartornerini oqaloqatigilluaqattaarpakka, taamaammat ilaqutariit taakku qallunaajulluinnartut nalunngilara, Rasmus Jarlov Folkertingimi naggataarutaasumik oqallinnermi oqarpoq.
Tamatuma saniatigut oqallinnermi tassani Aki-Matilda Høegh-Dam danskisut ilitsoqqussaralugu oqaaseqarsoralugu Rasmus Jarlov oqaatigaa.
Aki-Matilda Høegh-Damip naammagittaalliuteqarnermini Jarlov siorna taama aamma oqaaseqartoq innersuussutigaa, taamanilu kalaallisut ilitsoqqussaralugu oqaaseqarluni erseqqissaatigaa.
Nikassaanerorpaluttut
Tamaammat Aki-Matilda Høegh-Damip Folketingip Siulittaasoqarfia taama oqaaseqaateqartoqaqqinnginnissaanik qulakkeereqquaa, folketingimilu politikerit akornanni kulturikkut oqaatsitigullu tunuliaqutanut atatillugu imminut oqaaseqaateqartarnerannut ersarissumik malittarisassioqqullugu piumasaqaateqarfigaa.
- Jarlovip danskisut ilaquttamalu danskiungaatsiarneranik oqaaseqarluni uteqqiisaqattaarnermini kalaallisut inuiaassuseqarlungalu tunuliaqutaqartunga isiginngitsuusaarpaa.
- Jarlovip oqaaseqaatini sumut tunngavilersornerai eqqarsaatiginngitsoorneqarsinnaanngilaq, ammillu qalipaataanik tunngaveqartoq kisiat eqqarsaatigisinnaavara.
- Taama oqarnera nikassaanerorpalaarpoq, tamannalu Folketingip ileqqorinnissamut aamma ataqqeqatigiinnissamut maleruagassiaanut uniuuppoq, Aki-Matilda Høegh-Dam naammagittaalliuummi allappoq.
Konservativenit Rasmus Jarlovip oqaatsini aalajangiusimavai. Taanna Sermitsiaq.AG-mut oqarpoq.
- Politikkikkut oqallinnermi peqataagaanni naammagittarsinnaasariaqarpoq. Isornartorsiorneqarneq akuerisinnaasariaqarpoq, taamattoqartillugulu akissuteqarluni, eqqunngitsuliortoqarsorigaannilu naqqiilluni, taanna Sermitsiaq.AG-mut oqarpoq.
