Eqqartuussut: Toqutsisoq piffissami killiligaanngitsumi paarineqartussanngortinneqartoq
22-nik ukiulik Erneeraq Lundblad Nuummi Eqqartuussisoqarfik Sermersuumit piffissami killiligaanngitsumi paarineqartussanngortinneqarpoq.
Eqqartuussivimmi suliaq sakkortooq taamaalilluni inernilerneqarluni, angut 22-nik ukiulik arnamik 82-inik ukiulimmik siorna toqutsisimasutut eqqartuunneqarpoq. Taakku marluk imminnut ilisarisimasareeriinngillat.
Erneeraq Lundblad pinngitsaaliilluni kujannissimasutut, toqungasup timaanik assuarnartumik iliuuseqarsimasutut aamma ikuallatsitsisimasutut tillissimasutullu aamma eqqartuunneqarpoq.
- Iliuuserineqartunilu sakkukinnerulersitsisoqanngilaq.
- Taama inuusutsigisup taama ilungersunartigisumik pineqaatissinneqartarnera nalinginnaasuunngilaq, kisianni unnerluutigineqartut misissorutsigit aamma sakkortupput. Paartineqartussanngortitsinerlu toqutsinermi, pinngitsaaliilluni kujanninninermi ikuallatsitsinermilu aamma pineqaatissiissutaasinnaavoq.
Paarineqartussanngortitsinermillu eqqartuussineq unnerluussisussaatitaasup, Stine Egsgaardip naammagisimaarpaa.
- Eqqartuussiviup unnerluusisussaatitaasut naliliineratulli inerniliinera naammagisimaarluarpara, taanna eqqartuussuteqarnerup kingunitsianngua oqarpoq.
Eqqartuunneqartup suliaq nunatta eqqartuussisuuneqarfianit suliarineqaqqitassanngortippaa.
- Suliarineqaqqitassanngortitsineq pisinnaatitaaffigaa, isumaqarpungalu tunngavissaqarluartugut, taamaammat eqqissilluta tiguarput, suliarlu Nunatta Eqqartuussisuuneqarfianut ingerlateqqissallutigut, Signe Egsgaard oqarpoq.
- Toqutsineq pinerlineqartup nammineq angerlarsimaffiani pisoq sakkortulluvoq, tamannalu isumaqaranilu pissutissartaqanngilaq, taanna oqarpoq.
Unnerluussisussaatitaasup, Signe Egsgaardip Kalaallit Nunaanni Politiit sinnerlugit eqqartuussivimmi attaveqaatitigut paasissutissat angutip oqarasuaataaneersut, DNA-mik misissuinerit, arnap 82-inik ukiullip toqungasup timaanik misissuinermik nalunaarusiaq, angutillu tarnikkut qanoq inneranik misissuinermit nalunaarut saqqummiuppai.
Tamatuma saniatigut ilisimannittut sisamat siorna januaarip 31-ani ullaakkut siusissukkut arnap toqungasup angerlarsimaffiani nassaarineqarnerani susoqarsimaneranik nassuiaateqarput.
22-nik ukiulik kinaava?
Angutip tarnikkut qanoq inneranik misissuinerup angut inuunermini ilungersuuteqarsimasoq ersersippaa.
Angut ataataminit meeraanermini nakuuserfigitittarsimanini pissutigalugu toqussallugu takorloortarsimallugu politiinut oqaluttuarisimagaa eqqartuussivimmi saqqummiunneqarpoq.
22-nilli ukiullip eqqartuussivimmi tamanna miserratigaa.
Angut angerlarsimaffimmi hashimik atornerluiffiusumi nakuuserfiusumilu peroriartorsimasoq namminerlu inuusuttuaraanerminiilli hashimik imigassamillu aamma atornerluisuulersimasoq tarnikkut qanoq inneranik nalunaarummi allassimavoq.
Eqqartuussinermi sisamanngornermi oqaaseqarnerata ilamininnguarai, taannalu aatsaat siullermeerluni oqaaseqarluni, sivisunerulaartumillu nassuiaateqarpoq.
Angutip pissusilersuutimigut ajornakusoortitsinini pissutigalugu specialklassimi atuarsimalluni imminullu toqoriaraluarnini pissutigalugu efterskolimit anisitaanikuusimalluni nassuiaatigaa.
- Meeqqat allat angerlarsimaffiini pissutsit sinngagisarsimavakka, pissutigalugu angajoqqaavi hashimik pujortarneq ajormata, taamaammat uanga nammineq angajoqqaakka pillugit sallusarlunga, imminullu allanit minnerusumik inissittarlunga, taanna oqarpoq.
Nalinginnaasumik silassorissuseqartoq
Tarnikkut qanoq inneranik misissuinermi angut nalinginnaasumik silassorissuseqartutut aamma pinerliinerup siornatigut kingornatigullu tarnikkut napparsimaneranik takussutissaqanngitsutut nassuiaatigineqarpoq.
Angut taamaammat piffissami pinerliinermi tarnikkut napparsimanngilaq.
Angullu misissuinermi ‘nukangasutut piviusorlu pillugu qarsupittaaraluni eqqortumik oqaluttuanngissinnaasartutut’ nassuiaatigineqarpoq.
Tarnikkulli qanoq inneranik misissuinermi takussusiarineqartoq 22-nik ukiullip nammineq qanoq paasinninneranut naapertuutinngilaq.
- Toqqissillunga peroriartorpunga. Sunngiffinni pinngortitamiittarpunga, aallartarlunga imaluunniit piniariartortarlunga, angajoqqaamma atornerluisuusimanerat ajussutiginikuunngilara, taanna oqarpoq.
