Nuummi toqutsineq pillugu eqqartuussinermi ullut pingajussaat: DNA-mik misissukkat qanoq takussutissiippat?
22-nik ukiullip arnamik 82-inik ukiulimmik pinerlineqartumik sooq toqutsisimasorineqarneranut uppernarsaatissat unnerluussisussaatitaasup tungaaniit ullumikkut eqqartuussinermi saqqummiunneqarput.
Uppernarsaatit ullumikkut saqqummiunneqartut tassaapput DNA-mik paasissutissat. Taakku sannatini arnap angerlarsimaffiani nassaarineqartuniipput, kisianni aamma unnerluutigineqartup atisaaneersuullutik.
Tassa ullup ilarujussua suliamut uppernarsaatissat annertuut Signe Egsgaardip tungaaniit takutinneqarput. Taanna Kalaallit Nunaanni Politiinit suliamik ingerlatsisuulluni unnerluussisussaatitaasuuvoq.
Suut tamarmik uppernarsarneqassasut
22-nik ukiulik toqutsisimasutut pinngitsaaliillunilu kujannissimasutut unnerluutigineqarpoq, pinngitsaaliinerli arnap toqoreernerani sioqqulluguluunniit pisimanersoq ilisimaneqanngilaq, taamaammat 22-nik ukiulik toqungasup timaanik assuarnartumik iliuuseqarsimasutut ikkatiginnissimasutullu aamma unnerluutigineqarpoq. Unnerluussissut naapertorlugu tamanna timaanik peersisimaneranik pissuteqarpoq.
Unnerluussisussaatitaasup DNA-mik paasissutissat atortorissaarutinit assigiinngitsuneersut uppernarsaasersorpai, taakkulu 22-nik ukiullip arnamik toqutsisimanerminut atorsimassagai unnerluutigineqarluni. DNA-mik paasissutissat unnerluutigineqartup kilisaammi siorna februaarimi tigusarineqarnermini qaliinik ilaqarput.
Sumiiffimmilu pinerliffiusumi aak nassaarineqartoq, unnerluutigineqartullu qarliisa iluatungaani pingasuni nassaarineqartoq arnap, 82-inik ukiullip aarigaa misissuinermi ilimanarnerpaatut takutinneqarpoq.
DNA-rissagaa ilimanarnerpaasoq
Atortorissaarutinit katillugit pingasunit marluk 82-inik ukiullip toqungasup assingisa peqqarniinnerpaat eqqartuussivimmi eqqartuussisumut, eqqartuusseqataasumut illersuisumullu takutinneqartunut attuumassuteqarput.
Unnerluussisussaatitaasorlu uani aatsaat nipeqarpoq, tassami manittulerpoq, arlaleriarlunilu isini allarterlutillu kakkittarpoq.
Tamatuma saniatigut Signe Egsgaardip arnap akuaanit misissugassatut tigusap inernera aamma eqqaavaa.
Arnammi akuaanit misissugassatut tiguneqartoq unnerluutigineqartup DNA-rissagaa ilimanarluinnartoq takutitsivoq.
Toqusoqarsimatillugu Misissueqqissaarnermi immikkoortortaqarfimmit nalunaarusiap DNA-p akussami nassaarineqartoq unnerluutigineqartumeernissaanut ilimanaataa millioninit ataasiuvoq.
Ilimanaateqarneralu Toqusoqarsimatillugu Misissueqqissaarnermi Immikkoortortaqarfiup ilimanarnerpaamik naliliigaangami qaffasinnerpaatut nalilertagaaniittoq, unnerluussisussaatitaasoq uppernarsaateqarnermini nassuiaavoq.
Ikinngutaa takkutinngitsoq
Politiit unnerluutigineqartumik tigusarinninnerminni kilisaammi inigisaanik misissueqqissaarnerminni puussiamik nutsanik assigiinngitsunik takissuseqartunit allunaasamillu qilersimasumik nassaarsimasut ullumikkut eqqartuussinermi saqqummiunneqarpoq. Nutsat assingi qasertuusut assingi eqqartuussivimmi takutinneqarpoq. Nutsat toqusimasup nujarinerai eqqaaneqanngilaq.
DNA-mik saqqummiinerit saniatigut 2022-mi pisumut atatillugu marlunnik ilisimannittutut nassuiaateqartoqarpoq, 22-nik ukiulik pisumi tassani niviarsiaqqamut kannguttaalliorfiginnissimasutut unnerluutigineqarpoq.
Niviarsiaqqap angutaa ilisimannittutut nassuiaateqartup aapparaa, taassumalu unnerluutigineqartoq paniminut kannguttaalliorfiginnittuusimasoq uppernarsaavoq. Ilisimannittutut nassuiaateqartup aappaa 22-nik ukiullip ikinngutigaa, taannalu unnummit tassannga eqqaamasaqarpallaanngilaq.
Unnerluutigineqartup ikinngutai marluk suliamut atatillugu nassuiaateqartussaagaluarput, aappaali takkutinngilaq.
Eqqartuussivimmi suliaq aqagu nanginneqassaaq, tassanilu eqqartuussisoq eqqartuusseqataasullu aalajangiisussaallutik.
KNR-ip ilanngutassiami siusinnerusukkut sisamanngornermi eqqartuussuteqartoqarnissaa naatsorsuutigineqartoq allaqqaaraluarpaa. Eqqartuussisulli eqqartuussut qaqugu nalunaarutigineqarsinnaanersoq suli oqaatigineqarsinnaanngitsoq paasissutissiissutigaa. KNR-ip kukkuneq ajuusaarutigaa.
