Nuummi toqutsineq pillugu suliami ullup aappassaa: Pinerliffiusoq pinerlineqartorlu qitiupput

Mianersoqqussut: Ilanngutassiaq sakkortuunik paasissutissanik ilaqarpoq

22-nik ukiullip arnamik 82-inik ukiulimmik, arnap inigisaani januaarip ullaavani toqutsisimasutut unnerluutigineqarnera pillugu eqqartuussivimmi suliaq nalunaaqutaq qulingiluanut nanginneqaqqippoq.

Angut ullumikkut atisarissaaqqippoq, qanigisaasullu arfinillit Eqqartuussisoqarfik Sermersuumi inimi eqqartuussiffiusussamut aamma iseriartorput.

Eqqartuussivimmi suliaq nanginneqarpoq, ilisimannittunillu apersuineq toqusimasunik misissuisartup, toqungasumik misissuinermi nalunaarusioqataasimasup apersorneqarneranik aallartippoq.

Kalaallit Nunaanni Politiit unnerluussisussaatitaasuunerata, Signe Egsgaardip toqungasumik misissuinermit nalunaarusiaq issuaavigalugu ilisimatitsissutigaa, nalunaarusiami arnaq timimigut 21-nik amerlanerusunilluunniit anaalerneqarsimasoq allassimavoq.

Unnerluussisussaatitaasup arnap kiinnamigut anaalerneqarsimanera piffissamik atuiffigineruaa. Toqungasumik misissuisartup arnaq kiinnamigut siullernik anaaneqarnermini toqusimasoq eqqartuussivimmut aalajangiusimallugu oqaatigaa. Arnaq ikinnerpaamik quleriarlugu kiinaatigut anaaneqarsimavoq.

Nalunaarusiaq akunnerni marlunni misissorneqartoq

Toqungasup timaanik misissuinermit nalunaarusiap sammineqarnera akunnerit marluk missaanik sivisussuseqarpoq, tamannalu eqqartuussivimmiittunut tamanut amiilaarnarluni. Minnerunngitsumik qanigisaasunut arfinilinnut, sunnertisimaqqalluinnarpasissunut. Akerlinganilu unnerluutigineqartoq ullumikkut siumuinnaq isiginngikkuni nerrivimmut isiginnanngajappoq, eqqissisimallunilu.

Arnap kiinnamigut anaalerneqarnerata saniatigut 22-nik ukiullip timimik toqungasumik assuarnartumik ikkatiginnittutut unnerluutigineqarneranik kinguneqartumik, timaani allanik innarlerneqarsimasoq unnerluussisussaatitaasup oqaatigaa.

Toqungasumik misissuisartup akunnerni marlunni nassuiaateqarnerata saniatigut ikuallattoqarnerani teknikeri, sumiiffimmi politiini apuuttoq siulleq putsumut illersuuserluni annaassiniartartoq ilisimannittunik nassuiaateqarput.

Ikuallattoqarnerani teknikerip nassuiaateqarnerani ikuallatsitsisoqarsimanera qularutissaanngitsoq saqqummiunneqarpoq. Tamanna nalunaarusiami 19-inik qupperneqartumi uppernarsaaserpaa, taassumalu inissiami motorimut benzinamik nassaassaqartoq ilaatigut oqaatigaa.

- Qanoq annertutigisoq atorneqarsimanersoq oqaatigineqarsinnaanngilaq, kisianni ikuallatsitsisoqarsimanera qularutiginngilarput, taanna oqarpoq.

Eqqumiippasittoq

Putsumut illersuuserluni annaassiniartartoq ullumikkut kingulliulluni nassuiaateqartup nammineq arnamik 82-inik ukiulimmik siniffiani nassaartuusimanini oqaatigaa.

Taassumalu takusani eqqartuussivimmi arlaleriarluni ‘eqqumiitsutut’ oqaatigaa.

- Inummik siniffimmiittoqarnissaa ilimasupiluutigaara. Aallaqqaammut takusaqarsinnaanngilanga, kisianni assigiinngitsorpassuarnik siniffimmiittoqarpoq, tamannalu eqqumiissoraara, taanna oqarpoq.

Taassuma sannatinik ilaatigut nassaarsimanini oqaatigaa – sannatit taakku toqungasunik misissuisartup anaaliinermi atorneqarsimassasut siusinnerusukkut oqaatigaa.

- Ukiuni 14-ini sulininni tassani oqarnittulli radiokkut oqaatigisaqanngisaannarpunga, taanna oqarpoq. Taanna oqarpoq. Tassa eqqumiitsoqartoq. Taamaammat arnaq inissiamit anninniarlugu aamma aalajangerpoq.

Arnaq Dronning Ingridip Napparsimmavissuanukaanneqarpoq, kingunitsianngualu toqusimasutut nalunaarutigineqarluni.

Putsumut illersuuteqarluni annaassiniartartoq ilisimannittunik ullumikkut nassuiaateqartuni kingulliuvoq, eqqartuussinerlu nalunaaqutaq 15.20 naammassivoq.

Eqqartuussivimmi suliaq aqagu nanginneqassaaq, sisamanngorpallu eqqartuussutip suaarutigineqarnissaa naatsorsuutigineqarpoq.