Toqutsineq: Pinerlussimanermi nakorsat paasiniaasartut qimmerlu immikkut sungiusarsimasoq Nuummut tikipput
Naqqiineq: Arnap ukui 82-imut naqqinneqarput. Arnaq 80-inik ukioqartoq KNR-imit siullermik allaaserineqarpoq. Tamanna ajuusaarutigaarput.
Nuummi ikuallattoqarneranut atatillugu Danmarkimiit ikiuukkiartortut qimmeq ikuallaffimmi immikkut ittumik sungiusakkamik nassarlutik ippassaq sisamanngornermi unnukkut tikipput.
Kalaallit Nunaanni politiit tusagassiuutinut nalunaarummi taama allapput.
- Suli aallartisarnermiippugut, susoqarpiarsimanersoq sukumiisumik misissuiffigeruttulerparput, pisoq ersarissumik paasisaqarfigilluarnerujumallugu. Misissuinermiit allattukkat arlaqartut allattugaatigaagut, taakkulu pinerluttoqarsimaneranik misissuisartunit, pinerlussimanermilu nakorsat paasiniaasartunit misissorneqarnissaannik piumasaqaatitaqartunik ilaqarput, taakkulu maanna tikissimalerput.
Nuummi marlunngornermi ullaakkut Ceresvej blok O-mi ikuallattoqarnerani arnaq 82-inik ukiulik toqungasoq nassaarineqarpoq.
Angut ulluni pingasunik tigummigallarneqartoq
Nuummi marlunngornermi ullaakkut Ceresvej blok O-mi ikuallattoqarnerani arnaq 82-inik ukiulik toqungasoq nassaarineqarpoq.
Tassunga atatillugu angut 30-nik ukiulik toqutsisimasutut ikuallatsitsisimasutullu pasineqarluni tigummigallagassanngortinneqarpoq.
AAMMA ATUARUK Toqutsisutut pasineqartup ulluni pingasuni tigummigallarneqarnissaa eqqartuussiviup aalajangerpaa
Angut eqqartuussivimmi pingasunngornermi sassartinneqarpoq, angullu akunnerni 72-ini tigummigallarneqassasoq aalajangerneqarluni.
Politiit suli ikioqqupput
Politiit inunnut suliamut atatillugu pingaaruteqarsinnaasunik paasissutissaateqartut attaveqarnissaannik kaammattuiffigeqqippaat.
Matumani Blok O-p qanittuani najugaqartut, nammineq Blok O-p tungaanut sammisumik nakkutilliissutimik atortorissaarutaateqarsinnaasut pingaartumik pineqarput.
Aamma Kongevejimi, Tuujummi Ceresvejimilu najugallit ataasinngornerup januaarip 30-ata aamma marlunngornerup januaarip 31-ata akornanni tassa unnuap qeqqanit marlunngornermi ullaakkut arfineq-pingasut akornanni naammattoorsimasaminnik maluginiaaqquneqarput.
Politiit 701448-mut attavigineqarsinnaapput.
