Toqutsisutut pasineqartup ulluni pingasuni tigummigallarneqarnissaa eqqartuussiviup aalajangerpaa
Naqqiineq: Arnap ukui 82-imut naqqinneqarput. Arnaq 80-inik ukioqartoq KNR-imit siullermik allaaserineqarpoq. Tamanna ajuusaarutigaarput.
Kalaallit Nunaanni Politiit angut 30-nik ukiulik arnamik 82-inik ukiulimmik toqutsisimasutut marlunngornermi unnukkut tigusaraat.
Arnaq taanna Nuummi Ceresvejimi Blok O-mi inissiami ikuallattoqarneranut atatillugu toqungasoq nassaarineqarpoq. Arnaq inissiami najugaqartuuvoq.
Pasineqartoq Eqqartuussisoqarfik Sermersuumi pingasunngornermi nalunaaqutaq 12.00 sassartinneqarpoq, taannalu toqutsisutut ikuallatsitsisutullu pasineqarluni.
AAMMA ATUARUK Nuummi toqutsineq: Tigusarineqartoq inuartutut pasineqartoq
Pasineqartoq pinngitsuunerarpoq, eqqartuussiviulli unnerluussisussaatitaasut akunnerni 72-ini – tassa ulluni pingasuni tigummigallaanissamik piumasaqarnerat akueraa.
Tassa imaappoq angutip tigummigallarneqarnera sivitsorneqanngippat, arfininngorpat aniguisinneqaqqissaaq.
Politiit misissueqqissaarnertik ingerlateqqikkaat
Tamatuma saniatigut suliami pissutsit ilungersunarnerat qanigisaasullu eqqarsaatigalugit suliami aqqit pineqartut isertuunneqartussanngortinneqarput. Kalaallit Nunaanni politiit misissueqqissaarnertik maanna ingerlateqqippaat.
- Misissueqqissaarnerput nangeqqissavarput, ilaatigullu saaffiginnissutaasut, videoliuutikkut immiussat pinerluffiusumiillu uppernarsaatit misissornerat ingerlateqqillugit. Tamatuma saniatigut Danmarkimit ikiuisussat takkukkiartorput, taakkulu pinerluffiusumi misissuillutillu arnap timaa misissorlugu toqqutigisaa paasiniassavaat, misissueqqissaarnermi aqutsisoq, politikommissæri, Julie Senderovitz Bendtsen oqarpoq.
Politiit piffissami matumani allanik paasissutissaateqanngillat, innuttaasulli suliami paasissutissat pillugit saaffiginnereersimasut qujassuteqarfigaat.
Takusaqarpit?
Politiit inunnut suliamut atatillugu pingaaruteqarsinnaasunik paasissutissaateqartut attaveqarnissaannik kaammattuiffigeqqippaat.
Matumani Blok O-p qanittuani najugaqartut, nammineq Blok O-p tungaanut sammisumik nakkutilliissutimik atortorissaarutaateqarsinnaasut pingaartumik pineqarput.
Aamma Kongevejimi, Tuujummi Ceresvejimilu najugallit ataasinngornerup januaarip 30-ata aamma marlunngornerup januaarip 31-ata akornanni tassa unnuap qeqqanit marlunngornermi ullaakkut arfineq-pingasut akornanni naammattoorsimasaminnik maluginiaaqquneqarput.
Politiit 701448-mut attavigineqarsinnaapput.