Nuummi toqutsineq: Tigusarineqartoq inuartutut pasineqartoq

Angut 30-nik ukioqartoq toqutsisutut ikuallatsitsisutullu pasineqarpoq. Taanna pinngitsuunerpoq.
Matut nalunaaqutaq 12:39 matuneqarput. Taamaammat pasineqartup nassuiaataa KNR-imit tusanngilarput. Assi © : Carsten Faurschou/ KNR
februaarip 01-at 2023 14:47

Naqqiineq: Arnap ukui 82-imut naqqinneqarput. Arnaq 80-inik ukioqartoq KNR-imit siullermik allaaserineqarpoq. Tamanna ajuusaarutigaarput.

Angut 30-nik ukiulik Eqqartuussisoqarfik Sermersuumi sassartinneqarpoq. Taanna inuartutut ikuallatsitsisutullu pasineqarpoq.

Pasineqartoq inimut eqqartuussivimmut politiinit marlunnit eqqunneqarpoq, qaqortunillu atisalersorsimalluni.

Angutip inissaanukartinneqannginnerani pasilliutigineqartut unnerluussisumit atuarneqarput.

Tigusarineqartoq Pinerluttulerinermi inatsimmi paragraf 86 malillugu toqutsisutut kiisalu paragraf 56 malillugu ikuallannermik aallartitsisutut pasineqarpoq.

Angut pissutsini tamani pinngitsuunerarpoq.

Tamatuma kingorna ini eqqartuussiviusoq tamanut ammatinneqarunnaarluni matuneqarpoq. Suliami pissutsit ilungersunarnerat, politiit misissueqqissaarnerat qanigisaasullu eqqarsaatiginerat pissutigalugit taamaaliortoqarpoq.

Aamma suliami aqqit pineqartut isertuunneqartussanngortinneqarput.

Eqqartuussisup matut matugai

Matut nalunaaqutaq 12:39 matuneqarput. Taamaammat pasineqartup nassuiaataa KNR-imit tusanngilarput.

Ceresvejimi inissiaq pisoqaq Blok O marlunngornermi ullaakkut arfineq-marluk qaangilaaraa ikuallalerpoq.

AAMMA ATUARUK Nuummi toqutsineq: Angut politiinit tigusarineqartoq

Ikuallanneranut pissutaasoq paasissutissiissutigineqanngilaq. Ikuallattoqarneranik misissueqqissaartartut Danmarkimiit inissiamik misissuiartorput.

Inissiami najugaqartoq arnaq 82-inik ukiulik toqungasoq nassaarineqarpoq.

Politiit ullumi kingusinnerusukkut tusagassiortunut paasissutissiiumaarput. Tigusarineqartoq arnarlu toqutaasoq ilisarisimasariinnersut politiit akissuteqarfigerusunngilaat.

Politiit ikioqqusut

Politiit inunnit Ceresvejimi pinerluffiusimasup eqqaani pasinartumik pissusilersuuteqartunik inunnik takunnissimasunik ikioqqupput.

Pingaartumik inuit Blok O-p qanittuani najugallit, nakkutilliissutinik Blok O-p tungaanut sammisunik assiliiveqarsinnaasut attaveqaqquneqarput.

Aamma Kongevejimi, Tuujummi Ceresvejimilu najugallit ataasinngornerup januaarip 30-ata aamma marlunngornerup januaarip 31-ata akornanni tassa unnuap qeqqanit marlunngornermi ullaakkut arfineq-pingasut akornanni naammattoorsimasaminnik maluginiaaqquneqarput.

Pasinartumik takusaqarsimagaanni tusaasaqarsimagaanniluunniit politiinut toqqaannartumik attaveqarnissaq piumasarineqarpoq. Tamanna oqarasuaammut 701448-mut sianernikkut pisinnaavoq.