Nuummi toqutsineq: Angut politiinit tigusarineqartoq
Naqqiineq: Arnap ukui 82-imut naqqinneqarput. Arnaq 80-inik ukioqartoq KNR-imit siullermik allaaserineqarpoq. Tamanna ajuusaarutigaarput.
Nuummi ikuallattoqarneranut atatillugu angut 30-nik ukiulik Kalaallit Nunanni politiit tigusaraat.
Politikommissæri Brian Thomsen taama nalunaaruteqarpoq.
Pisoq Kalaallit Nunaanni politiinit toqutsisoqarsimasutut misissuiffigaat.
Ikuallattoqarnerani arnaq 82-inik ukiulik ajunaarpoq.
Angut tigusarineqartoq 30-nik ukiulik eqqartuussivimmi nalunaaqutaq ulloqeqqanut sassartinneqassaaq.
Arnaq toqusoq tigusarineqartorlu imminnut ilisarisimanersut Brian Thomsenip KNR-imut paasissutissiissutigerusunngilaa.
Danmarkimiit misissuiartortoqalersoq
Nuummi inissiarsuarni Ceresvej blok O-mi ippassaq marlunngornermi ullaakkut arfineq marluk missaanni ikuallattoqarpoq.
Arnap suna toqqutigineraa paasissutissiissutigineqanngilaq.
Ceresvej Blok-O-mi marlunngornermi ikuallattoqarmat qatserisartut ulappupput. Assi: Carsten Fourschou.
Ikuallanneq sumik aallaaveqarnersoq politiit suli misissuiffigigamikku oqaaseqarfigisinnaanngilaat. Danmarkimiilli misissuiartortoqassasoq ilisimatitsissutigaat.
Brian Thomsenip misissuinerminnut atatillugu innuttaasuniit ikiorneqarnissartik neriuutigaa. Marlunngornerup unnuaaniit ullaanngornissaata tungaanut pasinarsinnaasumik pissusilersortoqarneranik pasitsaassaqaraanni politiit saaffigeqqupput. Assersuutigalugu blok O-p eqqaani nakkutilliissummik assiliiveqartoqarsimassappat blok O-llu tungaanut sammisumik taanna assiliisimassappat politiinut 701448-mut nalunaarutigineqaqquneqarpoq.