Toqutsineq sakkortooq: Angut 22-nik ukiulik piffissami killiligaanngitsumi paaqqutarineqartussanngortinneqarsinnaasoq
Ilanngutassiaq paasissutissanik sakkortuunik imaqarpoq
Angutip 22-nik ukiullip arnamik 82-inik ukiulimmik siorna januaarimi toqutsisimasutut pasineqarnerani eqqartuussivimmi suliaq ataasinngornermi ullaakkut aallartinneqassaaq.
Inuiaqatigiinnut, minnerunngitsumik Nuummi innuttaasunut toqutsinerup inissiaqarfiit ilaanni pinera pissutigalugu aalassassutaavoq.
22-nik ukiulik toqutsisimasutut, pinngitsaaliilluni kujannissimasutut, timimik toqungasumik assuarnartumik ikkatiginnittutut, ikuallatsitsisutut suliami matumani unnerluutigineqartoq, unnerluussummi allassimavoq.
Toqqutigisaanik aqqunartiterineq aamma ikuallatsitsineq
Angut arnap inaanut januaarip 31-anni ullaassakkut isersimasutut timaatigullu anaaliinermi kingorna toqutsisimasutut unnerluutigineqarpoq.
Angut arnap toqqutigisaanik anaaliinnginnermini nakuusernikkut siorasaarinikkullu arnaq 82-inik ukiulik pinngitsaalillugu kujassimagaa unnerluussisussaatitaasut oqaatigaat.
Arnallu toqoreernerata kingorna aamma kujannissimalluni. Taamaammat timimik toqungasumik assuarnartumik ikkatiginnittutut aamma unnerluutigineqarpoq.
Aappaannaa eqqartuussutigineqarsinnaasoq
Angulli arnap toqunnginnerani pinngitsaaliilluni kujannissimasutut toquneratalu kingorna kujannissimasutut eqqartuunneqarsinnaanngitsoq, unnerluussisussaatitaasut oqaatigaat. Aappaannaanik eqqartuunneqassaaq.
Arnaq toqunginnerani pinngitsaalillugu kujanneqarsimasoq eqqartuussiviup uppernarsaatissaqanngissoriguniuk unnerluussisussaatitaasut angut timimik toqungasunik assuarnartumik ikkatiginnissimasutut eqqartuunneqartikkuppaat, angutimmi arnaq toqoreersimasoq kujassimavaa.
Unnerluussisussaatitaasut oqarnerat naapertorlugu arnaq utoqqat toqoreersoq angutip toqungasup timaani sipisaqarsimavoq, arnallu inigisaa ikuallatsillugu.
Tamatuma saniatigut suliami pineqartumi aningaasanik tillissimasutut 2022-milu suliami allami 19-inik ukioqarluni kannguttaatsuliorsimasutut aamma unnerluutigineqarpoq.
Unnerluussisussaatitaasut sakkortunerpaamik pineqaatissiisoqarnissaa piumasaraat, tassa 22-nik ukiulik piffissami killiligaanngitsumi paarineqartussanngortikkusuppaat.
