Angut inuusuttoq arnamik 82-nik ukiulimmik toqutsisimasutut pasineqarpoq

Angut inuusuttoq Nuummi arnamik 82-nik ukiulimmik marlunngornermi jannuaarip ulluisa 31-anni toqutsisimasutut pasineqarpoq.

Toqutsisoqarneranut atatillugu Kalaallit Nunaanni politiit Nuummi umiarsualivimmi annertuumik suliaqarneranni angutit marluk ippassaq tigusarineqarput.

Angut toqutisimasutut pasineqarnerata saniatigut ikuallatitsisimasutut aamma toqusimasup timaanik assuarnartumik ikkatiliisutut pasineqarpoq.

Pasilliutigineqartunut pingasunut angut pisuunnginnerarpoq.

Angut eqqartuussivimmut eqqunneqarnerami attariinnik qaqortunik qalipaatilinnik atugaqarpoq.

Eqqartuussivimmi suliami aqqit pineqartut isertuunneqartussanngortinneqarput.

Toqutsineq

Angut pasineqartoq Nuumi umiarsualivimmi Polar Seafoodip kiliisaataani Nataarnami  tallimanngornermi februaarip ulluisa qulinganni tallimat missaanni tigusarineqarpoq.  Tassani angut allat aammma tigusarineqarpoq. 

Tamanna Kalaallit Nunaani politiit KNR-imut uppernarsarpaat. 

Arnaq utoqqaq 82-nik ukiulik Nuummi aqqusinermi Ceresvejimi inissiami ikuallattoqarneranut atatillugu toqungasoq januaarip ulluisa 31-anni  nassaarineqarpoq, angullu inuusuttoq toqutsimasutut pasineqarpoq.

Toqutsisimasutut pasineqartup saniatigut  politiit inunnik allanik pinerleeqataasoqarsimasoraat.

Kalaallit Nunaani politiit ullumi kingusinnerusukkut tusagassiuutinut nalunaaruteqarniarput.

Nutarterneqartassaaq...