Peqqarniitsumik toqutsineq pillugu suliami unnerluutigineqartoq pinngitsuunerartoq

Ilanngutassiaq paasissutissanik sakkortuunik imaqarpoq

Arnap 82-inik ukiullip Nuummi siorna januaarimi toqutaanerani kiap toqutsisuuneranik paasinarsisitsinissaq pillugu eqqartuussivimmi suliaq ataasinngornermi aallartinneqarpoq.

22-nik ukiulik atisarissaarluni unnerluutigineqartup issiavianiippoq, taannalu pinngitsuunerarpoq.

Taamaakkaluartorli Kalaallit Nunaanni Politiit unnerluussisussaatitaasuunerata, Signe Egsgaardip politiit takussutissaateqarluarsorai.

- Misissueqqissaarneq annertooq suliarineqarnikuuvoq, Kalaallit Nunaanni Politiillu suliamik misissuilluaqqissaarnerminni pitsaalluinnartumik suliaqarsimasut isumaqarpunga, tamannalu eqqartuussivimmut ulluni tulliuttuni saqqummiunnissaa qilanaaraara.

- Suliami takussutissaateqarluartugut isumaqarpunga, taanna KNR-imut oqarpoq.

Unnerluutigineqartup nassuiaataa

Angut toqutsisimasutut unnerluutigineqarnermi saniatigut, pinngitsaaliilluni kujannissimasutut, timimik toqungasumik assuarnartumik ikkatiginnissimasutut ikuallatsitsisimasutullu aamma unnerluutigineqarpoq, angulli unnerluutigineqartunut tamanut pinngitsuunerarpoq, eqqartuussivimmilu oqaaseqarumanani.

Ullumikkullu eqqartuussinerup ilarujussua tassunga tunngasussaagaluarpoq – unnerluutigineqartorli nassuiaassuteqanngilaq.

Taamaammat 2023-mi januaarip ullaavani unnerluutigineqartup oqarneratut susoqarsimaneranik takorluuisoqarsinnaalersitsiniarluni angutip 2023-mi januaarimi sassartinneqarnermini politiinut nassuiaataa unnerluussisussaatitaasuunerup atuarpaa.

Signe Egsgaardip unnerluutigineqartup nassuiaataanik atuaannginnermini qatserisartut putsumut illersuuteqarlutik annaassiniartartuisa arnaq 82-inik ukiulik siniffimmi atisaqanngitsoq timimigullu sipineqarsimasoq nassaaraat.

Eqqartuussiviup toqungasup timaata assinga takuaat, assilli sakkortummata taakku illersuisumut, eqqartuussisumut eqqartuusseqataasunullu kisimik takutinneqarput.

Qiangiilittoq

Angut 22-nik ukiulik unnerluussisussaatitaasup suliamik saqqummiinerani assani paarlallugit nerrivimmut ammut isiginngikkuni isikkulersuuteqarani silaannarmut isigiinnartarpoq.

Assillit sakkortuut inunnut ikittuinnarnut eqqartuussivimmiittunut takutinneqartut pillugit oqaluttoqalermat allanngortoqarpoq.

Angut isavoq, qulliilu nakkaaginnalerlutik. Angut nipituumik manittorpoq, kiinnanilu assaminik asseqqallugu qullii kuupput.

Angut sunnertisimaqqangaarmat eqqartuussineq sivikitsumik unitsikkallarneqarpoq. Unikkallarnerup kingorna eqqissisimaneruvoq.

Video nipillu immiussat

Angutip siorna nassuiaateqarnerata atuarneqarnerani angutip arnaq toqusoq taassumaluunniit ilaqutai ilisarisimanngikkai saqqummiunneqarpoq, angutilli inissiaq ikuallatsissimallugu politiinut nassuerutigaa. Angulli allamik eqqaamasaqanngilaq, ikuallannerli aallartereersoq aatsaat silattuaqisimalluni.

Angut aalakoorlunilu Ritalininik sunnertisimalluni politiinut aamma nassuiaatigigaa, unnerluussisussaatitaasup atuarpaa.

Siorna nassuiaateqarnera atuarneqartoq naapertorlugu arnap 82-inik ukiullip timaa arlaannik iliuuseqarfigisimanerlugu angutip maanna unnerluutigineqartup eqqaamanngilaa. Taassumali piffissami pinerliffiusumi arnap utoqqaap inaaniissimalluni nassuerutigaa. Naalli nassuiaateqareernikuugaluarluni angutip ataasinngornermi eqqartuussivimmi pinngitsuunerarpoq.

Angut oqarasuaammini arnamik niaquerneqartumik videoliamik aamma Ilulissani 2022-mi agguisoqarluni toqutsisoqarnerani pinerluuteqartup toqutsinerminik oqaluttuarneranik nipimik immiussamik, inoqatinut attaveqaatitigut nassaarisimasaminik toqqorsimasuuteqarsimasoq eqqartuussivimmi ataasinngornermi aamma saqqummiunneqarpoq.

Unnerluutigineqartup immiussat tamarmik amiilaarnartut isumaqarluni politiinut siorna februaarimi oqaatigigaa, Signe Egsgaardip eqqartuussivimmut atuarpaa. 22-nillu ukiullip agguinermik toqutsinermik oqaluttuartoq ‘amiilaarnangaarmat’ ataasiaannarlugu tusarnaarsimanerarpaa.

Angut ataasinngornermi oqaaseqarumanngimmat eqqartuussiviup ilisimannittutut nassuiaateqartut nassuiaateqannginnerani ingerlaqqissinnaanngillat. Ilisimannittut marlunngornermi nassuiaateqassapput. Taamaammat ataasinngornerup ualia angutip niviarsiaqqamik 2022-mi kannguttaalliorfiginnissimasutut aamma unnerluutigineqarnera pissutigalugu meeqqat marluk videoliuserlugit apersorneqarnerannik isiginnaartitsinermut atorneqarpoq.

Toqutsisoqarsimanera pillugu suliaq aqagu nangeqqinneqassaaq, unnerluussisussaatitaasullu oqarnera naapertorlugu sisamanngorpat eqqartuussut oqaatigineqassaaq.