Toqutsisoqarnerata kingorna politiit eqqissisaasut: Toqoraasoqanngilaq
Piffissap sivikitsuinnaap ingerlanerani toqutsinernut tunngasunik sulianik politiit maannakkorpiaq sisamanik suliaqarput.
Nuummi ataaseq, Qaqortumi ataaseq Sisimiunilu ataaseq. Taakku tamarmik sapaatit akunnerisa marluk ingerlanerinnaani pipput.
Toqutsinermut suliat tunngasut ukioq manna sisamassaat
Nuummi ceresvejimi blok O-mi januaarip 31-ani ikuallattoqarmat, arnaq 82-inik toqungasoq nassaarineqarpoq.
Angut 30-t sinnerlugit ukiulik ikuallatsitsisimasutut toqutsisimasutullu pasineqarluni akunnerni 72-inik tigummigallarneqarpoq. Kingornalu iperagaaqqilluni. sulili pasineqartoq politiit ilisimatitsissutigaat.
Angut 53-inik ukiulik Qaqortumi inigisamini toqungasoq februaarip sisamaani nassaarineqarpoq.
Angutip timaata misissornerata angut nalinginnaasumik toqquteqanngtsoq paasineqarpoq, taamaammat politiit suliamik toqutsisoqarneranik misissuillutik aallartipput.
Suliamut atatillugu suli tigusarinnittoqanngilaq.
Pingasunngornermi februaarip arfineq-pingajuani unnukkut kingusissukkut arnaq 55-inik ukiulik Sisimiuni savimmik kapineqarluni toqutaavoq.
Eqqartuussiveqarfik Qeqqatap 25-nik ukiulik ulluni 28-nimi tigummigallagassanngortinneqarnissaa februaarip qulingiluaani aalajangerpaa.
Angut 35-inik ukiulik Qaqortumi toqutsisimasutut pasineqarluni ulluni 28-ni tigummigallagassanngortinneqarpoq. Taanna siornaak toqutsinermut tunngavoq politiilli itinerusumik oqaaseqarsinnaannginnerarput.
Taannali arnamut 35-inik ukiulimmut siornaak Qaqortumi tammaaneqartumut attuumassuteqaratarsinnaavoq.
Angut nammineerluni toqutsisimanini politiinut nalunaarutigaa.
Taakku saniatigut aamma allamik Qaqortumi siornaak toqutsisoqarneranut tunngasumik suliaqartoqarpoq, angut nammineerluni toqutsisimanini politiinut nalunaarutigaa.
Toqutsisimasut suli tigusarineqannginnerat Nuummi Qaqortumilu toqqissisimanartinneqanngitsoq, KNR-ip innuttaasunik oqaloqateqarnermini paasivaa.
Taakkuli suliat imminnut attuumassuteqanngitsut politiit erseqqissaatigaat.
- Uku toqutsinerit sisamat qiviassagaanni, taakkua sisamat imminnut attuumassuteqarsinnaanerannik ersiuteqanngilaq. Tassa imaappoq immaqa oqaatigilluaannarlugu inoqanngilaq imaattumik tulleriiarilluni toqutsisaqattaartumik, vicepolitiinspektøri, Viggo Hansen oqarpoq.
Toqutsinermut tunngasunik sulianik sisamanik ataatsikkut aatsaat suliaqartoqartoq, taassuma oqaatigaa.
Meeqqat maluginiarsigit
Qunusaarneqartutut, nakuuserfigineqarnissamulluunniit annilaangassuteqaraanni politiinut saaffiginninnissaq, taassuma kaammattuutigaa.
- Soorunami politiinut saaffiginnittoqartuaannarsinnaavoq oqarasuaatikkut 701448 taanna ulloq unnuarlu ullut tamaasa inuttaqarpoq pigaartoqarlunilu, tusasseqanngikkaannili 112 aamma sianerfigineqarsinnaavoq, Viggo Johansen oqarpoq.
AAMMA ATUARUK Siullermik Nuummi – massakkullu Qaqortumi: Sapaatit akunnerinnaani marluk pasinartumik toqusut
Taassuma misissuineq qaqugu naammassineqassanersoq siulittuutigisinnaanngilaa. Suliamullu tunngatillugu sunnertissimagaanni oqaloqateqarusullunilu Tusaannga attavigineqarsinnaasoq taassuma ilanngullugu paasissutissiissutigaa.
- Inersimasut meeqqanut naalaarnissaannik kaammattorusuppagut. Ikiorneqarnissamik pisariaqartitsinersut maluginiarlugit. Taamatullu toqutsisoqarsimatillugu meeqqat oqaloqatigineqarsinnaanerat aamma pingaaruteqarpoq. Taakku aamma sunnerneqarsinnaammata, videpolitiinspektøri oqarpoq.
Toqutsinernut taakkununnga sisamaasunut arlaannik attuumassuteqarsinnaasumik nalunngisaqaraanni politiinut saaffiginnissutigineqassasut politiit piumasaraat.