Arnamik 82-nik ukiulimmik toqutsinermut pasineqartoq iperagaasoq

Naqqiineq: Arnap ukui 82-imut naqqinneqarput. Arnaq 80-inik ukioqartoq KNR-imit siullermik allaaserineqarpoq. Tamanna ajuusaarutigaarput.

Arnap 82-inik ukiullip toquneranut tunngatillugu pinerluttoqarsimaneranik misissuisartut, pinerlussimanermilu nakorsat paasiniaasartut misissuiartorput.

Angut 30-nik ukiulik arnamik utoqqarmik Nuummi Ceresvejimi toqutsisimasutut pasineqartoq, arfininngornermi marlunut iperagaasoq, politiit tusagassiuutinut nalunaaruteqarlutik taama paasissutissiipput.

Politiinspektørip tullersortaa Lars Bjerregaard toqutsinermut atatillugu paasiniaanermi aqutsisuusoq ima oqaaseqarpoq

- Paasiniaanermi maannamut killiffigineqartoq naapertorlugu, politiit aalajangerput angut 30-nik ukiulik iperagaassasoq. Angut taanna marlunngornermi ualikkut tigusarineqarpoq, arnap 82-inik ukiullip Nuummi aqqusinermi Ceresvejimi toqutaaneranut atatillugu, Lars Bjerrregaard tusagassiuutinut nalunaarummi taama oqarpoq,imalu nangilluni:

- Pinerluttoqarsimaneranik paasiniaasoqarnera pissutigalugu, angutip iperagaanera pillugu oqaaseqarsinnaanngilanga, kisianni oqaluttuarisinnaavara, angut toqutsinermut atatillugu suli pasineqarmat, pinerluttoqarsimaneranillu paasiniaanerit ingerlateqqikkugut oqaluttuarisinnaavara, Lars Bjerregaard taama oqarpoq.

Toqutsisimasutut piaaralunilu ikuallatitsisimasutut pasineqarpoq  

Arnaq taanna Nuummi Ceresvejimi Blok O-mi inissiami ikuallattoqarneranut atatillugu toqungasoq nassaarineqarpoq. Arnaq inissiami najugaqartuuvoq

Pasineqartoq Eqqartuussisoqarfik Sermersuumi pingasunngornermi nalunaaqutaq 12.00 sassartinneqarpoq, taannalu toqutsisutut ikuallatsitsisutullu pasineqarluni.

Pasineqartoq pinngitsuunerarpoq, eqqartuussiviulli unnerluussisussaatitaasut akunnerni 72-ini – tassa ulluni pingasuni, tassa ullumi arfininngornerup tungaanut tigummigallaanissamik piumasaqarnerat akueraa

Toqutsisoqarneranut atatillugu, innuttaasut takusaqarsimasut paasissutissaateqartullu politiinit suli oqaloqatigineqarusupput. Politiit attavigineqarsinnaapput 70 14 48 -mut.