Siullermik Nuummi – massakkullu Qaqortumi: Sapaatit akunnerinnaani marluk pasinartumik toqusut
Nunatsinni sapaatit akunnerata siuliata ingerlanerani marluk pasinartumik toqupput.
Pasinartumik toqusoqarsimasoq, Qaqortumi politiit februaarip sisamaani nalunaarfigineqarput. Toqusunik misissuisartut Danmarkimeersut Kujataanukaleruttorput.
Pasinartumik toqusoqarsimaneranik misissueqqissaaleruttorlutik, Kalaallit Nunaanni Politiit pigaartuisa pisortaat Preben Kleist oqarpoq.
Politiit pasinartumik toqusoqarsimanera pillugu itinerusumik oqaaseqarusunngillat. Aamma pasinartumik toqusoq qassinik ukioqarnersoq taavalu arnaanersoq angutaanersorluunniit oqaatigerusunngilaat.
Preben Kleistili ima erseqqissaavoq: Qaqortumi pasinartumik toqusoqarneranik suliaq Nuummilu marlunngornermi januaarip 31-ani toqutsisoqarneranik suliaq imminnut attuumassuteqanngillat.
Arnaq 82-inik ukiulik toqutaasoq
Politiit suliaat alla Nuummi pisumut, tassa arnamut 82-inik ukiullimmut niaqqumigut oqimaatsumik arlaleriarlugu anaalerneqarsimasumut pinerluttumullu arnap taassuma inissiaa nalilinnik ujaasiffigeriarlugu ikuallatsissimasumut tunngavoq.
AAMMA ATUARUK Politiit: Toqutsinermi pasineqartoq taamaammat iperarparput
Tamanna pasinartumik toqusoqarsimaneranik suliaasoq siullermik nalunaarutigaat – arnarli taanna toqutaasimasoq, nalunaaruteqaqqaarnerminniit nalunaaquttap akunneri aqqaneq-marluk qaangiummata ilisimatitsipput.
Angut iperagaasoq - sulili pasisaasoq
Angut 30-nik ukiulik pasineqartoq pingasunngornermi februaarip aallaqqaataani tigusaavoq Eqqartuussisoqarfik Sermersuumilu sassartinneqarluni. Angut taanna toqutsisimasutut ikuallatsitsisimasutullu pasineqarluni nalunaaquttap akunnerini 72-ini tigummigallarneqareerluni arfininngormat iperagaavoq. Iperagaareeraluarlunili toqutsisimasutut suli pasisaavoq.
- Politiit inummik pinerluttuliorneq pissutigalugu tigummigallaassagaangamik pinerluuteqartoqarsimaneranik pasinninneq tunngavilersorneqassaaq. Pisumi matumani tunngavilersuutissaqarata unnerluussisussaatitaasullu nalilerparput, taamaammat angut iperagaavoq, misissueqqissaarnermi aqutsisoq vicepolitiinspektøri Lars Bjerregaard arfininngormat oqarpoq.
Toqungasunik timaanik misissuisartut, pinerluttoqarsimaneranik misissuisartut qimmerlu ikuallannartunik narajornermut immikkut sungiusagaq Danmarkimeersut Poltiit Nuummi toqutsisoqarsimaneranik misissueqqissaarineranni aamma ikiuupput.
