Politiit: Toqutsinermi pasineqartoq taamaammat iperarparput
Angut 30-nik ukiulik arnamik 82-inik ukiulimmik Nuummi Ceresvejimi toqusisutut pasineqartoq politiinit arfininngornermi iperagaavoq.
- Politiit inummik pinerluttuliorneq pissutigalugu tigummigallaassagaangamik pinerluuteqartoqarsimaneranik pasinninneq tunngavilersorneqassaaq. Pisumi matumani tunngavilersuutissaqarata unnerluussisussaatitaasullu nalilerparput, taamaammat angut iperagaavoq, vicepolitiinspektøri, misissueqqissaarnermi aqutsisoq, Lars Bjerregaard oqarpoq.
Naak angut iperagaareeraluartoq taanna toqutsinermi suliami suli pasineqarpoq.
Arnaq 82-inik ukiulik niaqqumigut oqimaatsumik arlaleriarlugu anaalerneqarsimasoq, pinerluttullu inissiaq nalilinnik ujaasiffigeriarlugu ikuallatsissimagaa, politiit ilanngullugu paasissutissiissutigaat.
Misissueqqissaartoqartoq
Politiit misissueqqissaarnermut atatillugu Danmarkimit toqungasup timaanik misissuisartunit pinerluttoqarneranillu misissuisartunit kiisalu qimmimik ikuallannartunik naamasaqarnissamut immikkut sungiusarneqarsimasumit ikiorneqarput.
- Ullormi siullermi pisoqarneranit misissueqqissaartoqaannavippoq. Paasissutissat arlallit misissueqqissaarfigaagut, siammasingaatsiartumillu misissueqqissaarluta, Lars Bjerregaard oqarpoq.
Politiit ilisimannittunit suli ujartuisut
Toqutsineq Nuummi Ceresvejimi 2-mi Blok O-mik ateqartumi marlunngornermi ullaakkut siusissukkut pivoq.
- Peqqarniitsumik toqutsineq pineqarpoq. Taamaammat innuttaasunut kaammattuerusuppugut. Marlunngornerup unnuaani imaluunniit ulaakkut toqutsinermut uunga atassuserneqarsinnaasumik takusaqarsimaguit imaluunniit tusagaqarsimaguit taava attavigineqarusuppugut, Lars Bjerregaard oqarpoq.
Politiit oqarasuaammut 701448-mut attavigineqarsinnaapput.