Nuummi Qaqortumilu inuit toqqissisimangillat: Toqutsisut suli tigusarineqanngillat
Nuummi ceresvejimi blok O-mi januaarip 31-ani ikuallattoqarmat, arnaq 82-inik ukiulik toquvoq.
Angut 30-t sinnerlugit ukiulik ikuallatsitsisimasutut toqutsisimasutullu pasineqarluni akunnerni 72-inik tigummigallarneqarpoq. Kingornalu iperagaaqqilluni. sulili pasineqartoq politiit ilisimatitsissutigaat.
AAMMA ATUARUK Nuummi toqutsineq: Tigusarineqartoq inuartutut pasineqartoq
Politiit pisumut tunngatillugu suli tigusarinneqqinngillat, tamanna Nuummi innuttaasut ilaasa ernummatigigaat KNR-imiit naapippagut.
AAMMA ATUARUK Bikki arnanik toqutaasumik eqqaaniaanissamut qaaqqusisoq
Bertheline Heilmann
Arnap utoqqaap toqutaaneranut atatillugu suli tigusarinnittoqaqqinngilaq, tamanna qanoq ippa?
- Misigisimavunga toqqissisimananga. Inuinnartut toqqissisimanarani.
Sooruna?
- Nalunarami, taanna kinaanersoq. Soorlu nalunarluni naapittarsimaneripput, immaqaluunniit takunikuunerlugu allallu assigiinngitsut eqqarsaatiginaramik.
Innutaasut qanoq pisoqarpat toqqissisimanarissaviuk?
- Nassaarineqarpat.
Karoline Lennert-Kleemann.
Arnap utoqqaap toqutaaneranut atatillugu suli tigusarinnittoqaqqinngilaq, tamanna qanoq ippa?
- Soorunami toqqissisimananngilaq, aarlerinarpoq. Soorlu immaqa nammineq taama pineqarsinnaalluni.
Suna aarleralugu?
- Uangaariaannaamat.
Ulluinnarni ilinnut sunniuteqarpa?
- Soorunami immaqa uannut allanullu sunniuteqassaaq. Ulluinnarni taamatut pisoqakulannginnami, maanilu taama pisoqarluni.
AAMMA ATUARUK Toqutsineq: Pinerlussimanermi nakorsat paasiniaasartut qimmerlu immikkut sungiusarsimasoq Nuummut tikipput
Susoqarsimagaluarpat toqqissisimanarinerusimassagaluarpiuk?
- Pasisiaqarsimagunik pasisaq paariinnarlugu, allamik tusagaqarnissamik tungaanut. Imaluunniit paasisaqarluarnissamik tungaanut. Tigummisaraluartik suli pasisimagunikkit paariinnarsimassagaluarpaat, allamillu pasisaqaratik. Nuummiittunut tamanna toqqissisimanarnerussagaluarpoq.
Qaqortumi toqutsineq
Qaqortumi angut 53-inik ukiulik inimini toqungasoq arfininngormat nassaaraat. Angutip timaa misissorneqarpoq, politiillu oqarnerat naapertorlugu taanna pissusissamisoortumik toqusimanngilaq. Taamaammat suliaq politiit toqutsisoqarneratut suliaraat.
Tamanna Qaqortumi najugalinnut aamma toqqissiviilliortitsisoq KNR-imi illoqarfimmi angalaarnermini tusarfigaa.
Jens Peter Kielsen.
Qaqortumi inissiaqarfimmi J. H. Lyzensvejimi toqutsisoqarsimasoq illit tusarakku qanoq eqqarsarpit?
- Assorujorujussuaq tujorminarpoq. Taamatut Qaqortoq, kujataa, killissimammat. Aamma toqutsisarnerit ukiuni kingullerni allaannginnamik akulikilliartortut. Inuunitsinnut taanna aamma sunniuteqartarami. Tamakkulu inuit nalunngisaralugit, ulluinnarni naapittarlugit, toqutsisarneq assorujussuaq tujorminarpoq.
- Aamma kujataani inuit peeruttartut amerlagamik, soorlu tammaannavillutik kingornatigullu nassaarineqartarlutik.
Toqutaasoqarfiup nalaani inuit najugallit pisumut tunngatillugu oqaaseqarnissartik sakkortugivaat, paasilluarsinnaaviuk sakkortugimmassuk?
- Uanga paasilluarsinnaavara. Tassami piffissami kingullermi toqutaasimasoq inuk ima nuannertigivoq, inoqatiminut pitsaasoq, sallaatsoq, suaartanngisaannartoq. Taamatut oqaluttuarissallugu sakkortuvoq. Aamma isumaqarpunga kusanaatsorujussuusoq taamaaliortut, neriuppunga kikkut taamaaliorsimanersut ungasinngitsukkut paasineqassasut, Jens Peter Kielsen oqarpoq.
Nunarsuarmi toqutsisoqartuaannarpoq, nunarput aamma tamaannga killissappat qanoq isumaqarpit?
Nunarsuarmi sumiluunniit tamaannga killittoqartuaannarpoq, toqutaasoq, toqusoq. Kisianni Kalaallit Nunaanni taama inukitsigaluta taamatut pisoqartarneri akulikippallaarneri, qanoq isilluta ikioqatigiinnikkut unisarsinnaavarput? Qanoq iliussaagut? Ikioqatigiittariaqarpugut, oqallittariaqarpugut ammasumik.
Ingammi kommunini politikerinik oqallissaarinerisoqarnissaa, ammasumik oqallisigineqarnissaa kissaatiginarpoq.
Iliuusissaaleqinartarpa?
- Assorujussuaq iliuusissaaleqinarpoq. Aamma uagut innuttaasutut imaaliinnarluta oqarsinnaanngilagut oqallinniarta. Kommunini suliffeqarfiit annertunerusut innuttaasunut saaffiginnittussaapput oqallisigeqatiserinnillutik, qanoq toqutsisarneq pakkersinaarneqalersinnaaneranik.
Ajunnginnerpaamik neriuuteqaannassaagut?
- Uanga ilaqutaqarama, qitornaqarlunga ernutaqarlungalu, killiffik tamanna assut qanoq pinerpoq oqaluuseralugu iluarsitikkusukkaluarpara.
Gedion Schmidt
Taanna toqutaasoq qanoq nalunngisarigiviuk?
- Pikani najugaqatigiiffimmi blok 8-mi ineqatiginikuuara, najugaqatiginikuuara.
Toqutaasoq tusarakku qanorippit?
- Naaa, tupaqaanga tusaqqaarakku. Ilimaginngikkaluarakku, tusarakku tupannaqaaq.
Nuummi toqutsisoqaqqammerpoq, maannalu aamma maani Qaqortumi tamanna qanoq isumaqarfigaajuk?
- Nunatsinni toqoraaneq ingasappallaaqaaq. Nunatsinni toqutsineq atugaavallaaqaaq, taanna unittariaqarpoq. Uanga pissusissamisut isiginngilara nunatsinni toqoraaneq. Unittariaqarpoq. Inoqatigut sunngitsunnguasiit toqorarpaat, Gedion Schmidt KNR-imut oqarpoq.