Bikki arnanik toqutaasumik eqqaaniaanissamut qaaqqusisoq
Naqqiineq: Arnap ukui 82-imut naqqinneqarput. Arnaq 80-inik ukioqartoq KNR-imit siullermik allaaserineqarpoq. Tamanna ajuusaarutigaarput.
Angut 30-nik ukiulik arnanik 82-inik ukiulimmik toqutsisimasutut kingornalu Nuup qeqqatani Ceresvejimi Blok O-mi inigisaanik marlunngornermi ullaakkut ikuallatsitsisimatut pasineqarpoq.
Angut eqqartuussivimmi pingasunngornermi sassartinneqarpoq, angullu akunnerni 72-ini tigummigallarneqassasoq aalajangerneqarluni.
KNR toqutsisoqarnerata saqqummiunneqarnera inuit qanoq qisuariarfigineraat paasiniarlugu Blok O-liarpoq.
Bikki P. Jepsen
Bikki P. Jepsen KNR-ip Ceresvejimi naapitaasa ilagaat. Taassuma toqutaasoq ilisarisimallugu oqaatigaa.
Taanna utoqqaat illuanni arnap 82-inik ukiullip atassuseqarfigisaani sulisimavoq, taassumalu innuttaasut maanna katersuullutik eqqaaniaanissaat pingaaruteqartippaa.
Taamaammat Ceresvejimi Blok O-p saani unnugu (sisamanngornermi aaqq.) nalunaaqutaq arfineq-marlunut eqqaaniaanissamut Facebookikkut aggersaavoq, tassanilu naneruutinik ikitsisoqarlunilu tussiaqatigiittoqassaaq.
AAMMA ATUARUK Toqutsisutut pasineqartup ulluni pingasuni tigummigallarneqarnissaa eqqartuussiviup aalajangerpaa
Pisoq Bikki P. Jepsenimut attuingaatsiarpoq:
Toqqissisimanngissutigaajuk?
- Aliasuppunga. Tamanna unitsinneqartariaqarpoq. Taamaaliortut akuerisinnaanngilagut. Meeqqanik maani peroriartortoqarpoq, taama nalaataqassanngillat. Taamaammat Facebookikkut inuit eqqaaniaajartoqqullugit ilaqutariinnullu tapersersuiartoqqullugit aggersaallunga allagaqarpunga.
Unnugu eqqaaniaanissamut aaqqissuisuuvutit. Sooruna taamaaliortutit?
- Misiginneqataagama, ilaqutaasunut. Inuiaqatigiit tamatta misiginneqataavugut tupaqqallutalu. Immitsinnut tapersersoqatigiilluta inunnut pinerlinnermut akerliliinitsinnik takutitsissaagut.
Assi: Ann-Sophie Greve Møller/KNR
Charlotte Hansen
Toqutsisoqarsimanera pillugu qanoq misigisimavit?
- Blok O-mi ikuallattoqarnerani arnap utoqqaat toqusimanera tusarakku tupappunga. Uanga ilaquttannik toqusoqaraluarpat tamanna takorloorsinnaanngilara, Charlotte Hansen KNR-imut oqarpoq.
Assi: Ann-Sophie Greve Møller/ KNR
Nukaaraq Kristensen
Nukaaraq Kristensen 82-inik ukiullip najugarisaata eqqannguani najugaqarpoq. Taassuma iniminut taama qanitsigisumi toqutsisoqarneranik paasisaqartoqarnera aamma tupaatigaa.
- Naapikkajuppara, arnaavoq inussiaarnersoq. Tupannarpoq, taamalu pisoqarsinnaanera toqqissisimananngilaq, taanna oqarpoq.
