Politiit Qaqortumi pasinartumik toqusoqarnera toqutsisoqarneratut misissuiffigigaat
Angut 53-inik ukiulik Qaqortumi inigisamini toqungasoq arfininngormat nassaarineqarpoq.
Angutip timaa misissorneqarpoq, politiillu oqarnerat naapertorlugu taanna pissusissamisoortumik toqusimanngilaq. Taamaammat suliaq politiit toqutsisoqarneratut suliaraat.
Taamaalilluni Kalaallit Nunaanni Politiit sapaatip akunnerata ataatsip ingerlanerinnaani pasinartumik toqusoqarneranik aappassaanik toqutsisoqarneratut misissueqqissaalerput - marlunngornermimi januaarip 31-ani arnaq 82-inik ukiulik Nuummi inigisamini toqungasoq aamma nassaarineqarpoq.
Kalaallit Nunaanni Politiit toqutsinerit taakku marluk imminnut atassuteqanngitsut ullumi ullup qeqqata missaani erseqqissaatigaat.
Toqungasoq inigisamini nassaartineqartoq
Angut 53-inik ukiulik nalinginnaasumik toqusimanngitsoq angutip timaata misissorneqarnerata takutippaa, taamaammat politiit toqutsisoqarneranik misissuinermik suliaqalerput.
Angut toqungasoq pillugu politiit arfininngornermi februaarip sisamaani nalunaarfigineqarput. Angut Qaqortumi inissiaqarfimmi J. H. Lyzensvejimi nassaarineqarpoq.
- Toqusoqarnerani pissutsit erseqqissarnissaanut qulakkeerinissaq naammanngimmat Qaqortumi Politiit Danmarkimit pinerluttoqarneranik misissuisartumik toqungasumillu misissuisartumit ikiorneqarput, politiit tusagassiuutinut nalunaaruteqarput.
AAMMA ATUARUK Politiit Qaqortumi pasinartumik toqusoqarnera toqutsisoqarneratut misissuiffigigaat
- Angutip timaata misissorneqarnera maannakkut naammassivoq, angullu nalinginnaasumik toqquteqarsimanngitsoq paasineqarpoq, taamaammallu politiit suliaq toqutsisoqarneratut misissuiffigilerpaat.
Politiit oqarnerat naapertorlugu angutip piffissaq toquffigisaa erseqqissumik maanna oqaatigineqarsinnaanngilaq, toqutsinerli februaarip pingajuani tallimanngornerup ualikkuani arfininngornerullu februaarip sisamaata ullaavata akornanni pisimassangatinneqarpoq.
Tigusarinnittoqanngitsoq
Politiit suliamut atatillugu suli tigusarinninngillat.
Nuummi toqutsisoqarnerani suliami angut 30-nik ukiulik ulluni pingasuni tigummigallarneqarnikuuvoq. Taanna arfininngornermi iperagaaqqippoq, suliamili suli pasineqarluni. Taamaalilluni illoqarfiit pingaarnersaanni toqutsisoqarnera pillugu suliami tigusaaqqasoqanngilaq.
Qaqortumi Politiit Nuummiittutulli pasinartumik tusaasaqarsimasinnaasunik takusaqarsimasinnaasuniillu attaveqarfigineqarusupput.
Nuummi arnaq 82-inik ukiulik niaqqumigut oqimaatsumik arlaleriarluni anaalertilluni toqutaavoq. Pinerluuteqartoq tamatuma kingorna arnap inaa nalilinnik ujaasiffigeriarlugu inissiaq ikuallatsippaa.
30-nik ukiulik tigusarineqarluinilu Eqqartuussisoqarfik Sermersuumi februaarip aallaqqaataani killisiorneqarpoq. Taanna toqutsisutut ikuallatsitsisutullu pasineqarpoq.
AAMMA ATUARUK Politiit: Toqutsinermi pasineqartoq taamaammat iperarparput
- Politiit inummik pinerluttuliorneq pissutigalugu tigummigallaassagaangamik pinerluuteqartoqarsimaneranik pasinninneq tunngavilersorneqassaaq. Pisumi matumani tunngavilersuutissaqarata unnerluussisussaatitaasullu nalilerparput, taamaammat angut iperagaavoq, vicepolitiinspektøri, misissueqqissaarnermi aqutsisoq, Lars Bjerregaard oqarpoq.
