Angut 35-nik ukiulik Qaqortumi toqutsisutut pasineqarluni tigummigallagassanngortinneqartoq

Angut Qaqortumi toqutsisimasutut pasineqarluni tigummigallagassanngortinneqarpoq. Pasineqartoq nammineerluni politiinut nalunaarutiginnippoq.
Qaqortumi Vatikanbakkenimi assaasoqarpoq. Assi © : KNR
Allattoq Christine Hyldal
februaarip 09-at 2023 14:12
Nutserisoq Connie Fontain

Ilanngutassiaq aaqqissorneqarpoq. KNR-ip allaasereqqaagaatut tigummigallarneqartoq angummut 53-inik ukiulimmut inigisamini toqungasumut nassaarineqartumut attuumassuteqanngilaq. Kukkuneq ajuusaarutigaarput.

 

Angut 35-inik ukiulik Qaqortumi toqutsisimasutut pasineqarluni ulluni 28-ni tigummigallagassanngortinneqarpoq.

Kalaallit Nunaanni Politiit tusagassiuutinut taama nalunaaruteqarput.

Angut 35-nik ukiulik Eqqartuussisoqarfik Kujallermi ullumi sassartinneqarpoq, sapaatinilu akunnerni sisamani tigummigallarneqartussanngortinneqassasoq eqqartuussisup aalajangerpaa.

Taanna toqutsisutut pasineqarpoq.

Politiit suliamut atatillugu paasissutissanik tunniussaqarpianngillat, misissuieqqissaarnermili pisortap, vicepolitiinspektørip, Lars Bjerregaardip ima oqaaseqarfigaa:

- Angut nammineerluni Qaqortumi politiinut saaffiginnippoq, taassumalu toqutsisimanini paasissutissiissutigaa. Tamanna tunuliaqutaralugu suna pineqarnersoq maanna erseqqissaassaagut.

AAMMA ATUARUK Politiit Qaqortumi pasinartumik toqusoqarnera toqutsisoqarneratut misissuiffigigaat

- Tassunga atatillugu paasissutissiissutigissavara suliaq siammasissumik misissuiffigigatsigu, matumani ilanngullugu tamanna Qaqortumi arnap 35-nik ukiullip 2021-mi novembarimi tammaaneqalersup, kingornalu takuneqaqqissimanngitsup ujaarineqarneranut attuumassuteqarnersoq paasiniarlugu.

Kalaallit Nunaanni Politiit misissueqqissaarnerannut atatillugu Qaqortumi Vatikanbakkenimi ualimut misissuipput.

 

Assi © : KNR

Qaqortumi Vatikanbakkenimi assaasoqarpoq. Assi: KNR

 

Inatsit tunngaviusoq naapertorlugu killisiuinermi matut matoqqatinneqarput, taamaammat suliamut atatillugu maanna allanik paasissutissaqanngilaq.

Qaqortumi arnaq 35-nik ukiulik 2021-mi novembarimi tammaaneqalerpoq. Taanna nassaarineqaqqinngisaannarpoq.

Politiit, qatserisartut, issittumi sakkutooqarfik, namminerlu kajumissutsiminnik ujaaseqataasut ujaasigaluarput, iluatsinngitsumilli. Taanna kingullermik novembarip 22-ani  Kommune Kujalliup allaffiata silataani unnukkullu Brugseneeqqap eqqaani takuneqarpoq.

Ullut qulit ingerlaneranni toqutsinerit pillugit suliat sisamat

Nunatsinni politiit toqutsisoqarneranut atatillugu ulluni qulini suliaat katillugit sisamaapput. Taakkunannga ataaseq 2021-mut attuumassuteqarpoq, pingasullu 2023-p peqqarniitsumik aallartinnerata ingerlanerani pisuullutik.

Angut 54-inik ukiulik Qaqortumi J.H. Lytzensvejimi inigisamini toqungasoq arfininngormat nassaarineqarpoq.

Ulluni qulini toqutsinerit pingasut

Arnaq 82-inik ukiulik toqungasoq inigisamini Nuummi Ceresvejimi januaarip 31-ani nassaarineqarpoq.
 

Taanna oqimaatsumik arlaleriarlugu niaquatigut anaaneqarluni toqutaasimavoq. Pinerluuteqartoq tamatuma kingorna arnap inigisaa nalilinnik ujaasiffigeriarlugu ikuallatsippaa.


Angut suliamut atatillugu tigummigallarneqarnikuuvoq, sulilu pasisaqaalluni.


Angut 54-inik ukiulik Qaqortumi J.H. Lytzensvejimi inigisamini toqungasoq februaarip sisamaani nassaarineqarpoq. Taassuma toquneranut pissutaasoq saqqummiunneqanngilaq.


Pingasunngornermi februaarip arfineq-pingajuani unnukkut kingusissukkut arnaq 55-inik ukiulik Sisimiuni savimmik kapineqarluni toqutaavoq.


Arnaq alla tigusarineqarpoq, taannalu eqqartuussivimmi ullumi killisiorneqassaaq.

Angutip timaata misissornerata angut nalinginnaasumik toqquteqanngtsoq paasineqarpoq, taamaammat politiit suliamik toqutsisoqarneranik misissuillutik aallartipput.

Angutip qangarpiaq toqusimanersoq erseqqissumik oqaatigineqarsinnaangilaq, kisianni toqutsineq tallimanngorup ualikkuanit arfininngornerullu ullaavata akornanni pisimassangatinneqarpoq.

Suliamut atatillugu tigusarinnittoqanngilaq, politiillu taamaammat Blok I-p aamma Blok H-p akornanni pasinartumik takusaqarsimasut tusaasaqarsimasullu politiinut saaffiginneqquneqarput.

Nuummi arnaq 82-inik ukiulik toqutaasimasoq inigisami januaarip 31-ani marlunngornermi nassaarineqarpoq. Arnaq niaqqumigut oqimaatsumik arlaleriarluni anaatarneqarsimavoq. Pinerluuteqartorlu tamatuma kingorna inissiaq nalilinnik ujaasiffigeriarlugu ikuallatsippaa.

30-nik ukiulik tigusarineqarpoq, Eqqartuussisoqarfik Sermersuumilu sassartinneqarluni. Angut toqutsisutut ikuallatsitsisutullu pasineqarpoq, ullunilu pingasuni tigummigallagassanngortinneqarluni. Angut tamatuma kingorna iperagaaqqippoq, suliamulli atatillugu suli pasineqarluni.

AAMMA ATUARUK Politiit: Toqutsinermi pasineqartoq taamaammat iperarparput

Ippassaq unnukkut nalunaaqutaq 20.56 toqutsisoqaqqippoq, tamatumuuna Sisimiuni. Pisumilu tassani arnap arnaq alla savimmik kapillugu toquppaa.

Politiit oqarnerat naapertorlugu pinerliffigineqartoq erngertumik napparsimmaviliaanneqarpoq, annaanneqarsinnaananili, taanna toqusutut nal. 21.30 nalunaarutigineqarpoq.

Politiit arnaq 25-nik ukiulik nalunaaqutaq 22.20-nngortoq tigusaraat, taannalu savimmik kapisisutut pasineqarluni. Taanna ullumi killisiorneqassaaq.

Kalaallit Nunaanni Politiit oqarnerat naapertorlugu toqutsinerit pingasut imminnut attuumassuteqanngillat.