Nuummi toqutsineq pillugu eqqartuussinermi ulloq kingulleq: Kina pinerluuteqartuua?

Arnaq 82-inik ukiulik angerlarsimaffimmini siorna ukiup aallarteqqammernerani toqutaasoq pillugu eqqartuussisoqarnerani ullormi kingullermi paasissutissaasinnaasut tamarmik katersorneqarput.

Apeqqullu annerpaaq unnerluutigineqartup eqqartuussinermi illersuisuata pingaartitaa tassaavoq:

Ilumut pinerluuteqartuusoq tigusarivarput?

Unnerluussisussaatitaasummi uppernarsaasiinissaq kivinngikkaat taanna isumaqarpoq, taamaammallu angutip 22-nik ukiullip unnerluutigineqartup pinerluuteqartuunissaanut uppernarsaasiisoqarsorinngilaa.

Taamaammat politiit pinerluuteqartumik eqqortumik siorna februaarimi tigusarinnissimanersut apeqqusiivoq.

- Inuk arnamik toqutsisoq pisup kingorna aattaqarsimassallunilu unnerluussisussaatitaasut sakkunut arnamik toqutsinermut atorneqarsorisaanni DNA-liisimassaaq.

- Taakkulu marluk misissorluaqqissaarneqarput, taakkunanili illersukkannit takussutissaqanngilaq, taanna tunngavilersuuteqarnermini oqarpoq.

Pisiniarfimmit assit piffissami pinerluuteqartoqaqqammerneranit assilisat pingasunngornermi takutinneqarput, illersuisullu assimiittoq unnerluutigineqartuunerarpaa.

- Eqqissisimalluinnartoq assini takuneqarsinnaavoq, pinerluummilli suliami matumani nassuiaatigineqartutut taama sakkortutigisumik iliuuseqaqqammeraanni taamaattoqarsinnaanngitsoq isumaqarpunga, illersuisoq oqarpoq.

Eqqartuussivimmi illersuisup unnerluussisussaatitaasullu tunngavilersuuteqannginneranni tarnikkut qanoq inneranik misissuineq saqqummiunneqarpoq, angut hashimik imigassamillu inuusuttuaraanerminiilli atornerluisuusimasoq nassuiaatigineqarpoq.

Meeraallunilu atuaqatini usorisaramigit angerlarsimaffik meeraaffigisani pillugu piviusoq kusassartarsimavaa.

- Meeqqat allat angerlarsimaffiini pissutsit sinngagisarsimavakka, pissutigalugu angajoqqaavi hashimik pujortarneq ajormata, taamaammat uanga nammineq angajoqqaakka pillugit sallusarlunga, unnerluutigineqartoq illersuisup aperimmani oqarpoq.

Ajortorujussuanngortinneqartoq

Taassuma tunngavilersuuteqarnermini unnerluussisussaatitaasut Århusimilu eqqarsartaatsikkut nappaatilinnut napparsimmavimmi eqqarsartaatsikkut nappaatinut nakorsap angut suliami matumani unnerluutigineqartuummat ajortorujussuanngortinniarsarigaat oqaatigaa.

- Suliami matumani unnerluutigineqaruni ajortorujussuusimassaaq, taamaanngilarli, taanna oqarpoq.

Unnerluutigineqartup DNA-vanik amigaateqarneq pissutigalugu illersuisup angut 22-nik ukiulik toqutsisut toqungasullu timaanik assuarnartumik iliuuseqarsimasutut pinngitsuutinneqarnissaa tunngavilersuutigaa. Illersuisullu 22-nik ukiulimmut unnerluutigineqartut katillugit arfineq-marluk taama tunngavilersorlugit arfineq-marlunni tamani pinngitsuutinneqarnissaa piumasaqaatigaa.

Pinngitsaaliilluni kujannissimasutut unnerluutigineqarneranut tunngatillugu ilagiinneq illuatungeriit akuersingineratigut pisimannginnersoq uppernarsarneqanngitsoq oqaatigaa. Tillittutullu unnerluutigineqarneranut atatillugu aningaasat toqusup aningaasaatiginerai unnerluutigineqartulluunniit nammineq aningaasaatiginerai uppernarsarneqanngissoraa. Taamatullu niviarsiaqqamik 2022-mi kannguttaatsuliorsimanerarneqarneranut pinngitsuutinneqassasoq isumaqarpoq, tassanimi niviarsiaraq kinguaassiutitigut attorneqanngimmat.

Suliaq ataaseq marlunnik sammivilik

Unnerluussisussaatitaasup oqaaseqarnerani allatut nipeqarpoq.

Unnerluussisussaatitaasup angut eqqartuussineq tamaat oqaaseqarumasimanngitsoq aamma tarnikkut qanoq inneranik misissorneqarnerani aamma piffissami pinerliffiusumi tarnikkut napparsimaneranut takussutissaqanngitsoq pingaartuutippaa.

Kisianni angut naliginnaasumik silassorissuseqartoq, piviusorlu pillugu eqqortumik oqaluttuanngissinnaalluni.

- Paasisinnaavara inissiami susoqarsimanera pillugu annikitsortalerlugu oqaluttuarusunnginnera, arnamummi iliuuserisai sakkortoqimmata, oqaluttuareqqinnissaalu aamma sakkortusinnaalluni, taanna oqarpoq.

- Kisianni unnerluutigineqartup politiinut siorna nassuiaatigisaanik upperinninnginnissannut qularutiginnittoqassanngilaq, tassa silaarussimavoq inissiamilu ikuallatsitsisoqalereernissaata tungaanut eqqaamasaqarsimanngilaq, taanna oqarpoq.

Uppernarsaasussaatitaaneq naammassineqartoq

22-nik ukiullip pinerluuteqartuunissaanik qularutiginninngilaq, taannami isumaqarpoq angummut uppernarsaataasut naammangaarmata uppernarsaasussaatitaaneq naammassineqartoq, taamaammat illersuisoq angutip pinngitsuuneranik uppernarsaateqartariaqarpoq.

Unnerluussisussaatitaasummi DNA-mik uppernarsaatit, attaveqaatitigut paasissutissat politiit angutip piffissap pinerluuteqarfiusup tungaanut ingerlaarfiinik erseqqissaanermut atugaat, paasissutissallu allat suliami saqqummiunneqartut tunngavigalugit unnerluutigineqartup pinerluttuuneranut inerniliinissamut naammassorai.

Kiisalu angutip ullaami tassani arnap inissiaaniissimalluni politiinut siorna oqaatigaa.

- Taamaammat takussutissat tamarmik unnerluutigineqartumut tikkuussisuusoraakka, taamaammat taannaanngitsoq upperissagutsigu oqalulerluni nassuiaateqartariaqarpoq.

Unnerluutigineqartorli taamaaliunngilaq.

Unnerluussisussaatitaasup taamaammat angut paarineqartussanngortinneqarnissaa piumasaraa.

Tamanna assingusumik pinerluuteqaqqinnissaanut aarlerinartup annertuneratut nalilerneqarnera ilaatigut pissutigalugu.

Aamma pinngitsaaliilluni kujannissimasutut eqqartuunneqassasoq toqungasullu timaanik assuarnartumik ikkatiginnittutut eqqartuunneqarani, unnerluussisussaatitaasormi isumaqarpoq pinngitsaaliilluni kujanninneq arnap toqunnginnerani pisimasoq, angullu arnaq tamatuma kingorna toqoriarlugu uppernarsaatinik ersiunnaartitsiniarluni inissiamut ikuallatsitsisimasoraa.

Arnallu angerlarsimaffiani pisumut sukannernerulersitsisut unnerluussisussaatitaasoq aamma isumaqarpoq.

- Pissutigalugu nammineq angerlarsimaffimmi toqqisisimasinnaasoqartussaavoq.

Unnerluutigineqartoq pinngitsuutinneqassanersoq imaluunniit Nuummi pineqaatissinneqarsimasunut inissiisarfimmiittussanngortinneqassanersoq eqqartuussivimmi suliami tallimanngornermi nalunaarutigineqassaaq.