Agnethep panni atuartut najugaqarfianniit oquttumiit angerlaqqugaa
Agnethe Berthelsenip pania, Nuunu-Dorthe Berthelsen, mikigallarami nuakkaangami astmatisk bronkitisertuuvoq amerluuteqarlunilu. Nappaatit taakku ukiorpaalunni atunngereerlugit Maniitsumi Atuarfik Kilaaseeqqamut atuariartorluni atuartut angerlarsimaffiannut aggustimi nuunnermi kingorna ajornartorsiutigeqqilerpai.
Maniitsumimi najugaqarfia, tassa atuartut najugaqarfiat oquttoq, nalunaarusiami oktobarip 31-anneersumi erserpoq. Taamammat Sarfannguanut arfininngornermi angerlassaaq.
- Uiagalu panipput peqqinnanngitsumi najugaqartikkusunnagulu atuartikkusunnginnatsigu. Angerlarsimaffitsinni atuartikkusukkaluarparput, Agnethe Berthelsen oqarpoq.
Nuunu-Dorthe Berthelsen atuartut allat qulit najugaqatigai, taakku ilaat Sarfannguarmiuupput, Itillermiuupput, Napasormiuupput Atammimmiuullutilluunniit.
Atuartut najugaqarfianni najugallit Atuarfik Kilaaseqqami aamma oquttumi 9. imaluunniit 10. klassimi atuartuupput, atuarfillu taanna arlaleriarlutalu oqaluttuarisareerparput. Atuarfik Kilaaseeraq oqummat tassani ilinniartitsisorpaat soraararmata ilinniartitsisut allat sulerulunnerulersarlutillu atuartitsinerusariaqalersarput.
- Atuarfik Kilaaseeqqami ilinniartitsisussaalatsimmata tassani atuartissallugu orniginartinngilarput. Vikareqakulavoq, aamma atuartut ilinniartitsissussaalatsinermi soraajaartitaallutik angerlartiinnarneqartarput. Maniitsumiileramili annaasanik ulikkaarpoq ilikkagassarpassuaraluaminik, Agnethe Berthelsen oqarpoq.
Taanna angajoqqaallu allat sisamat Sarfannguaneersut Atuarfik Kilaaseeqqap aqutsisuinut allagaqarlutik atsioqatigiipput. Meeqqatik atuarfiup oqoqarneranik kommunip aaqqiissuteqarnissaata tungaanut angerlartinneqarallarnissaat, taakkua piumasaraat.
Tassa atuartut najugaqarfianni najugalinni aqqaniliusuni arfinillit arfininngornermi angerlassapput. Taakkunanngali tallimat atuartut najugaqarfianniikkallassapput. Tamannalu taakkununnga peqqinnanngilaq.
Isugutasumi najugaqarneq peqqinnanngitsoq
Atuartut najugaqarfianni sinittarfiit tamarmik oquttut paasisimagitsik, asaasut R&T-kkut nalunaarusiaminni Qeqqata Kommunianut oktobarip ulluisa 31-anni nassiussaminni allapput. Tamatuma saniatigut atuartut iggaviat, inersuaq sulisullu iggaviat aamma oquttut paasisimavaat. Najugaqarfiulli iluani silaannaaq oqunnguussinnaasunik inerittussaqarnersoq paasisimaneritsik nalunaarusiaanni allaqqanngilaq.
Birgitte Andersen Aalborg Universitetip sanaartornermik, illoqarfinnik avatangiisinillu ilisimatusarnermut immikkoortortaani lektoriuvoq. Taanna oqummut tunngasunik ukiuni 30-ni suliaqarpoq, taassumalu oqarnera naapertorlugu nalunaarusiami paasissutissiissutigineqartut Maniitsumi atuartut najugaqarfiata ilumut oqoqarneranik naliliinissamut naammanngillat. Taanna ima erseqqissaavoq:
- Isugutasumi oqulimmi najugaqarneq qaquguluunniit peqqinnalernavianngilaq.
Inuit ilarpassuisa oquttumi najugaqarnertik peqqissusermi akornutigilertanngikkaat, Birgitte Andersen nassuiaavoq. Ilaali quersornermik, niaqorlunnermik amerluuteqarnermilluunniit akornuteqalersimanerlutik eqqumaffigisariaqarpaat.
- Kikkut tamarmik oqummit sunnertittanngillat, naamivilli isugutasumi najugaqartoqartussaavinngikkaluarpoq, taanna oqarpoq.
Illup najugaqarfigineqarsinnaanersoq nalilerneqassaguni misissuineq annertussasoq, Birgitte Andersen nassuiaavoq. Misissuinerulli inerneri tunngavigalugit inunnik sanngiitsunik tassani najugaqartoqassanngitsut oqaatigisinnaavaa.
- Meeqqallu sanngiinnerusutut nalilerneqassapput, taanna oqarpoq.
Meeqqat sumiissappat?
Meeqqat angerlartinneqarlutik atuartinneqarnissaat utaqqiisaarutaasumik aaqqiissutaagallarpoq
Qeqqata Kommunia ataavarnerusumik aaqqiissutissarserusuppoq, meeqqat taamaalillutik atuarfimmut atuariarsinnaalissallutik. Tassani qanoq aaqqiissuteqartoqassanersoq, Qeqqata Kommuniani ilinniartitaanermut ataatsimiititaliap siulittaasuata, Evelyn Mølgaardip naluaa.
- Soorunami ajuusaarnartorujussuuvoq, ilungersunarluinnartutut sulissutigaarput. Maanna sumiissanersut misissuleruttorparput, tamanna paasineqarpat nalunaaruteqassaagut.
Tassa imaappa meeqqat aaqqiissuteqarnissassi tungaanut oquttumi najugaqarallassasut?
- Sumi najugaqarnissaat maannakkut sulissutigineqaleruttorpoq.
Maniitsumi atuartut ilinniartitsisullu sumiiffigisinnaasaanik peqarpa?
- Sumiissinnaanerat paasinialeruttorparput. Angajoqqaat nassaarnissarput naatsorsuutigisinnaavaat.
Qeqqata Kommuniata nunaqarfimmiut meerartaasa aqqanillit najugassaannik nutaamik sapaatip akunnerata tulliani nassaarnissartik naatsorsuutigaa.