Atuarfik Kilaaseeraq: Illerfissarsiutileqatigiit atuartitsivissanik atukkiissasut

Maniitsumi atuarfiup 130 millionit koruuninut nutarterneqarnissaa kommunalbestyrelsip aalajangerpaa – tamatuma saniatigut utaqqiisaasumik atuarfiusussat piareersarneqarnissaat aallartinneqarpoq.

Allattoq Kim Hinrichsen, Ole Pl. Petersen, Paarnannguaq Nielsen

oktobarip 27-at 2023 14:23

Maniitsumi atuarfiup silaannalunnera pissutigalugu atuartut ilinniartitsisullu napparsimalersimasut arlallillu atuarfimmi atuartitsivinniikkunnaarusullutik atorfimminnit soraarsimasut KNR-ip sapaatit akunnerini kingullerni saqqummiuttarparput.

Atuarfik oqoqartoq siusinnerusukkut paasineqarnikuuvoq, naalli oqunnera suliarineqareeraluartoq suli inunnut napparsimalersitsissutaasartumik atuarfimmiittoqarpoq.

Atuarfilli Qeqqata Kommuniani kommunalbestyrelsimi sisamanngormat oqaluuserineqarpoq.

SULIAQ NAATSUMIK:

2022-mi januaarimi suliffeqarfik eqqiaasartoq atuarfiup eqaarsaartarfiani, ilinniartitsisut inaanni ininilu allani oqummik nassaarput. Atuartut ilinniartitsisullu tamarik nuutsiterneqarput atuartitsisoqalerlunilu illoqarfiup katersortarfiani, nipilersornermik ilinniarfiani amma illoqarfimmii inini allani.
Septembarimi 2022-mi angajoqqaat, ilinnniartitsisut aamma atuartut arlallit piumasaqarput september 2022 Qeqqata Kommunia nutaamik atuarfiuliortitsissasoq aningaasaateqarfinnit aningaasalerneqartumik.
Decembarimi 2022-mi nutaamik atuarfiliornissamut kommunalbestyrelsi naagaarluni aalajangiivoq. Taarsiullugu kommunip atuarfik nutarterluinnartinniarppaa koruunit 71 milliuunit nalinginut. Nutarterineq 2026-mi naammassissasoq ilimagineqarpoq.
2023-mi aasaanerani kommunip suliffeqarfik atuarfiup nutarternissaanut eqqiarnissanulu imippaa. Saniatigut kommunip silaannarissarfiit inini atuartitsiviusuni ikkussortippai. Kommunip nalilerpaa atuarfimmi pissutsit atuartitsinerup nanginneqarnissaanut ajorunnaartut.
Aggustimi 2023-mi ukioq atuarfiusoq nutaaq aallartippoq, kommunillu nalilerpaa atuarfiup inai amerlanerit isumannanngitsut. Taamaattumik atuartut amerlanerpaat atuarfimmut ukiumi atuarfiusumi 2023-2024-mi uterput.
Aggustimi 2023-mi undervises 1. aamma 2. klassit suli atuarfiup avataani atuartinneqarput, init ilaat suli isumannaatsutut nalilerneqanngimmata. Atuarfiup paaqqinniffia aamma soraareerneri ornittagaq aamma atuarfiup avataaniipput.
Ukiumi atuarfiusumi niutaami ilinniartitsisut atuartullu atuarfimmi suli iluaagisaqartarput.
Septembarimi 2023-mi atuarfiu pisortaa Mina Maria Andersen ilinniartitsisunut nalunaarpoq atuarfiup illutaa oqummik nassaartoqaqqittoq. Massakkut atuarfiup igaani silammut sammisuni.
Oktobarimi 2023-mi atuarfiup pisortaqarfia aamma Qeqqata Kommunia ininik atuartitsiffiugallarsinnaasunik nutarterinerup naammassinissaata tungaanut atorneqartussanik

Allisiguk

Atuarfiup peqqinnanngitsup isateriarlugu nutaamik sananeqarnissaa Naleqqap siunnersuutigaa. Allatut akilersinnaanngitsoq, kommunalbestyrelsimut ilaasortap, Karl Lyberthip Naleqqameersup oqaatigaa:

- Uanga taanna, uanga imatut eqqarsarama; Maniitsumi nutaamik atuarfiliunngikkutta akisoorujussuanngortussaagami, tassa nutaamik atuarfiliunnginnissamut akissaqanngilagut Maniitsup siunissaa qaamanerussappat, taanna oqarpoq.

Nutaamilli atuarfiliornissamut siunnersuut kommunalbestyrelsimit itigartitsissutigineqarpoq. Atuarfik uninngatiinnarneqassaaq – tassungalu taarsiullugu nutarterneqassasoq, Qeqqata Kommuniani qinikkat isumaqatigiissutigaat.

Atuarfik nutaaq akisuallaassasoq

Atuarfimmik nutaamik sanaartorneq milliardit sisamararterutaannik akeqassasoq, kommunalbestyrelsimut ataatsimiinnginnermi paasissutissiissutigineqarpoq.

Aamma atuarukAtuartut napparsimasut ilinniartitsisut soraarartut: Maniitsumi meeqqat atuarfiat oqoqartuarsinnartoq

Tamannalu akisuallaartoq, kommunimi borgmesteri, Malik Berthelsen isumaqarpoq:

- Aningaasat amigaatigisagut attartoraluarutsigilluunniit avataaninngaanniit, attartukkagut aamma missingersuutitsinninngaanniit akilersortussaavagut, taavalu taamaasiussagaluarutta suliniutinut allanut imaluunniit inoqarfinni allani sanaartornissanut imaluunniit Maniitsumi ukiuni qaninnerni meeqqeriviit nutaanik taarserneqarnissaat aamma pisariaqartinneqarput, taava attartussagaluarutta taava taakkununnga ukiuni tulliuttuni arlalinni akissaarutissaagut.

Nuussuineq aallartinneqartoq

Atuartut ilinniartitsisullu nutarterinerup nalaani sumiissinnaanissaannut aaqqiissutissarsiortoqarnissaa kommunip sapaatit akunnerata siuliani neriorsuutigaa.

Init atuartitsiviusussat nutaat nutarterinerup nalaani atuartitsivisinnaasut piareersarneqaleruttorput. KNI-p quersuaa, illerfissarsiutileqatigiit iniutaat Majoriarlu ilaatigut pineqarput.

ATUARFIK KILAASEEQQAP ATUARTITSIVIGIGALLAGASSAI

Trin 1:

- 1. klassit maanna Maliinamiipput - nuutsinneqassanngillat

- 2. klassit maanna Aningaamiipput - nuutsinneqassanngillat

- 3. klassit illerfissarsiutileqatigiiffiup iniutaannut nuussapput

Trin 2:

- 4.-7. klassit Maniitsumi ininut assigiinngitsunut nutsissapput

Trin 3:

- Minikollegiamut nuussapput

Trin 4:

- Toppenimut nuunnissaat anguniarneqarpoq

Ilinniartitsisut qullersallu:

- Kommunip allaffiani atuakkanik atorniartarfimmut nuussapput

Majoriaq:

- KNI-p quersuanut nuussapput.

- Atuartut Majoriap kujammut sammisortaaniissapput.

Allisiguk

Atuarfiup nutarterneqarnera 2024-p qiteqqunnerani aallartinneqassaaq, 2026-milu piareernissaa naatsorsuutigineqarpoq. Ininut atuartitsiviugallartussanut nutserneq attartornerlu ukiumut 2 millionit koruunit missaannik akeqassaaq.

Nutaarsiassami kukkunermik nassaarsimaguit uunga allaffigineqarsinnaavugut.