Atuartut napparsimasut ilinniartitsisut soraarartut: Maniitsumi meeqqat atuarfiat oqoqartuarsinnartoq

Ilinniartitsisut atuartullu napparsimarrapput uisaruserrallutillu. Tassami Atuarfik Kilaaseeraq Maniitsumiittoq oquppoq.

- Illup iluata silaannaata sunniuteqarnera uannut tassaavoq anernilunneq, niaqorlunneq, timikkut anillattoorneq taavalu nakorsiartaraluarluni timimi tinumasoqarluni tarnummik tunisiinnartarneq nalullugillu suusut, aasarlu fnatterneraarlunga, sunaaffa taamaanngilluinnartoq, Tuperna Lyberth, minnernut ilinniartitsisoq atuarfimmilu ilinniartitsisut sinniisaat oqarpoq.

Qaammatip kingulliup ingerlanerinnaani ilinniartitsisut marluk soraarniuteqarput, atuarfik najorsinnaannginnamikku. Ilinniartitsisut allat soraarnissaminnik eqqarsaateqartut arlaliupput.

- Angerlaraangama qasoqqasaqaanga. Nukissaqarneq ajorpunga, Tuperna Lyberth oqarpoq.

Ilinniartitsisut atuartullu aatsaavissuaq taama atugaqalinngillat.

Tuperna Lyberth minnerni 2. klassini ilinniartitsisuuvoq ilinniartitsisullu sinniisaasa ilaattut sulisuulluni. Assi © : Privatfoto.

Eqqiaasut atuarfiup inaani arlalinni oqoqartoq siorna paasivaat. Paasisat tunngavigalugit atuartut atuarfiup iluani inini arlani atuartinneqartalerput, soraareernermilu ornittagaq atuarfiup avataanut ininut allanut inissinneqaluni.

Taamaattumik angajoqqaat, ilinniartitsisut aamma atuartut, Qeqqata Kommunianut siornali piumasaqarput, atuarfimmik nutaamik, aningaasaateqarfinnit akilerneqartussamik sanatitseqqullugit. Kommunalbestyrelsili itigartitsivoq.

Kommunip atuarfiup tamakkerluni 2024-ip aasaani iluarsaanneqalernissaa aalajangiiffigaat. Iluarsaassinerlu ukiut marluk pingasut qaangiunneranni naammassineqarsinnaasoraat.

Iluarsaassinissap tungaanut, kommunip eqqiaasartut suliffeqarfiat oquiaasussatut eqqiaasussatullu sulisillugu aallartippaa.

Kisianni pissutsit ajorluinnarseqqipput.

- Atuarfitsinni ajornartorsiutaavoq silaannaap atoruminaattarnera. Atuarfimmi klassimi inimi. Sulisuninngaanniit napparsimalersarneq, anernilulerneq, anillattoorneq, quersoqattaarneq assigisaanillu misigisaqartarneq atugarivarput, Tuperna Lyberth oqarpoq nangillunilu:

- Kingunerisarpai soorlu, atuartut atuanngikulaarput ilinniartitsisullu napparsimallutillu sulinngittariaqartarput imaluunniit sygemeldertarlutik. Taamaalillutik klassini aamma atuanngitsooqattaarnermi vikareqarneq ingerlalertarluni.

Init utaqqiisaasut

Atuarfimmi ulluinnarni aqutsisut aamma Qeqqata Kommunia maanna suleqatigiillutik, atuartut ilinniartitsisullu ataatsimoorlutik utaqqiisaagallartussamik inigisinnaasaannik illoqarfiup ilaani ujartuipput.

- Pisut kimulluunniit iluaqutaanngimmata taamaammat aqutsisoqatigiinni iliuuseqarnissaq piumasaraarput, Atuarfik Kilaaseeqqami pisortaq Mina Marie Andersen oqarpoq.

Ukiormi atuarfiusoq aallartimmat atuarfik oqoqarsorinarsimanngikkaluarpoq.

- Atualernerup kingorna klassit pitsanngortutut, aaqqeqqittutut taaneqarmata nalunaarutigivarput. Kisianni taava taassuma kingorna suli malussartoqaqattaarpoq, taamaammat aqutsisutut kissaateqarnikuuvunga iliuuseqartoqartariaqartoq. Taamaammallu massakkut sulineq aallartinnikuuvoq. Ataatsimeeqatiginikuuagut qullersat allallu susassaqartut, taamaalilluta massakkut sulinerput aallartippoq.

Suut pisariaqartippaat suullu piukkuppaat, aperaarput.

- Piaarnerpaamik aaqqiissuteqartariaqarpugut, pisortaq oqarpoq. Atuarfimmiiginnassagunik arlaatigut meeqqap peqqissusaanut kingunipiloqarsinnaanera ilimanarsinnaammat, Maniitsumi angajoqqaat meeqqaminnik toqqissillutik atuarfimmukartitsisinnaasariaqartut oqarpoq.

- Meeqqat ilai malussartalerput, anerniluttalerput allatulluunniit anillattut, soorunami kingunera pitsaanngilaq.

Taamaammat iliuuseqartoqalerpoq. Maniitsumi ininik ukiuni marlunni pingasuni atuartitsiviusinnaasunik naleqquttussarsiorluni tallimmangornerutinnagu atuarfiup pisortaa ujaasivoq. Taamaammat sumi qanorlu aaqqiigallarneq issanersoq suli nalunarpoq.

Oqoqaleqqinnera kommunip paasisinnaanngilaa

Qeqqata Kommuniani Ilinniartitaanermut, Peqqinnermut, Sunngiffimmi sammisanut Kultureqarnermullu ataatsimiititaliami siulittaasoq Evelyn Frederiksen Siumumeersoq oqarpoq oqoqaleqqinnera paasiuminaatsillugu, kisianni:

- Iliuuseqarpugut. Siullermik taamaattoqarmat tassa iluarsartuussinissamut aningaasaliissutit saniatigut, immaqaluunniit avataatigut, aningaasaliivugut oquup piaartumik iliuuseqarfiginissaanut. Aamma iliuuseqarfigineqarpoq.

Ajornartorsiulli suli aaqqinneqanngilaq?

- Soorunalimi taamatut pisoqarnera nuannginngilaq. Aamma iluarsaanneqarnissaanut qanillisoq taamatut atuarfiup inissisimanera tamanut nuanninngilaq pitsaananilu. Taamaammat ajunnginnerpaamik aaqqiissutissanik ujartuisoqarnerani allattoqarfik atuarfillu ataatsimeeqattaarput, taakkualu siunnersuutaat aalaavigalugit sulinigut ingerlaqqissavagut politikkikkut.

Atuarfik oqoqareersoq eqqiarneqaraluaruniluunniit oqoqaqqilersinnaasarpoq?

- Tallimanngormat unnuup tungaatigut Atuarfik Kilaaseeqqamiit allakkat allattoqarfimmi tiguagut, taakkualu aallaavigalugit ataatsimiinnerit ingerlanneqarlutik aamma taanna sioqqullugu ataatsimiinnerit pisarput, Evelyn Frederiksen oqarpoq.

Atuarfiup pisortaatulli Evelyn Frederiksen isumaqarpoq tuaviortumik iliuuseqartogartariaqartoq. Nuukkallarnissarlu isumaqatigaa.

- Tassa soorunami pisariaqarpoq taamatut nuukkallarnissaq aamma atuarfiup nutarternerata piareernissaata tungaanut nuutsitsigallarnissaq, Mina Maria Andersen oqarpoq.

Atuartut nukarliit siusinnerusukkut nipilersornermik ilinniarfiusimasumut nuukkallarneqarnikuupput.

Siunissamut neriuuteqarneq

Maniitsumi minnerni atuartitsisoq ilinniartitsisullu sinniisaat Tuperna Lyberth init oquttut qimannissaannut qilanaarpoq.

- Atuarfik taamaattoq najuinnarsinnaanngilarput, oqarpoq.

Misigivormi, kommunimit nammineq suleqatiginilu tusaaneqarsimanatik – maannali tusaaneqalerlutik.

Atuarfimmillu atuisut tamarmik peqqiilliornatik najorsinnaasaannik atuarfeqaleqqinnissaq angorusunnarnerpaasoq oqaatigaa.

- Iluarsiinissamut soorlu perusunnartorujussuupput immikkut inissinneqarnissarput ataatsimoorluta. Soorlu pavillonimut imaluunniit containerit atuartitsivittut atorneqarsinnaasunut, oqarpoq nangillunilu:

- Ukiummi arlallit suli utaqqisussaagatta atuarfitta iluarsartuunnissaanut.

Tuperna Lyberthi suleqatigimisulli soraassanerluni eqqarsaatiginikuunerarpaa:

- Eqqarsaatigisarpara ilaanni: - Arraa sooq suliinnassaanga maani? Kisianni ima illoqarfiga nuannaritigaara imalu suliffiga nuannaritigaara qimassinnaanagit.