Attumi meeqqat ilinniartitsisullu niaqorlullutik atuarfimmiittartut

Attumi meeqqat atuarfiat meeqqanit 30-nit ilinniartitsisunillu arfineq-marlunnik ulluinnarni najorneqartarpoq.

Tassanili avatangiisit peqqissutsimut pitsaanngitsunik atuisunut sunniuteqartarput. Atuarfimmi tamarmi tipeqaqisoq meeqqat ilinniartitsisullu ulluinnarsiutigigaat, atuarfiup pisortaa, KNR-mut oqarpoq.

- Ungillerisarput anernilullutik niaqorlullutik imertajaarlutillu assut, Ole Abrahamsen KNR-mut oqarpoq.

Taamak misigisitsisartoq suunersoq maanna ilisimaneqanngilaq. Kingunerluutilli taakkua oqummut ersiutaasinnaammata, pisortaq nammineq oqoqarnersoq misissuummik maanna piniarpoq. Taassumalu oqarnera naapertorlugu atuarfik oqunnersoq siusinnerusukkut misissorneqarnikuunngilaq.

Ullaat tamaasa silaannarissaaneq

Pisortarlu atuarfiup atorneqalinnginnerani iliuuseqartuartalerpoq.

- Ullaat tamaaviisa arfineq-marlunut suliartoruma igalaat tamaasa qiverlugit matu qiverlugu illu silaannarissartilluarniarsarisarpara ullaakkut atuartut sulisullu takkutinnginneranni, Ole Abrahamsen oqarpoq.

Ajornartorsiutaalli taakkuinnaanngillat. Pisortap oqarnera naapertorlugu atuarfik sananeqarmat naqqup ataaniittoq issoq piiarneqanngilaq. Uleruluttumilu immap atuarfiup naqqa tamaat angusarmagu tamanna aamma tippanneranik kinguneqartarpoq.

- Neriuppunga taamaattoqarnera aallaavigalugu aalajangiisartut nutaamik atuarfiliuunneqarnissatsinnut eqqarsaataat sukasarneqalaarsinnaassasut, Ole Abrahamsen oqarpoq.

Borgmesterip nutaavimmik atuarfittaartikkusukkai

Kommune Qeqertaliup borgmesteriata attormiut ajornartorsiutaat ilisimallugit KNR-mut oqarpoq. Kommunillu aappaagumut missingersuutissaani Attumi nutaavimmik atuarfiliornissaq anguniarneqarpoq.

- Sulissutigivarput nutaamik atuarfittaarnissaat. Suliatta qitia tassaniippoq, Ane Hansen oqarpoq.

Atuarfiup pisortaata oqarnera naapertorlugu Qullissat 1972-mi matuneqarmata aamarsuarsiorfiusimasup atuarfiata ilaa Attup atuarfianut ilassutigineqarpoq.

Attumi atuarfiup ajorluinnarnera kisimiunngilaq. Kangaatsiami atuarfik nutaaq aggustimi ammarpoq - atuarfik pisoqaq oqoqarnera pissutigalugu matuneqarpoq.

Atuartut angajoqqaavi 2018-imi akerliussutsimik takutitsipput - taakku meeqqatik atuarfimmukarteqqikkusunngilaat. Atuartitsineq tamatuma kingorna illoqarfimmi sumiiffinnut assigiinngitsunut nuutsinneqarpoq.

Maniitsumi angajoqqaat qaammatip siuliani aamma akerliussutsimik takutitsipput.

Suliffeqarfimmi immikkut eqqiaanermik suliaqarfiusup R&T-p atuarfik maajimi misissorpaa. Misissuinermi eqaarsaartarfik, ilinniartitsisut inaat atuartitsiviillu ilaat oqoqartut paasineqarput. Atuartitsiviit arfinillit atuakkanillu atorniartarfik maanna atorneqanngillat, atuarfimmillu nutaamik sanasoqarnissaa angajoqqaat piumasaraat.

Taamaaliortoqangajalinngitsorli, Qeqqata Kommuniani Ilinniartitaanermut ataatsimiititaliap siulittaasua, Evelyn Mølgaard (S) oqarpoq.

Qasigiannguani Juunarsip Atuarfia qaammatip siuliani aamma misissorneqarpoq. Igalaat ussiillisimapput, aammalu atuarfiup silataata iluatalu iigartai aserfallattut annertoorujussuarmik takuneqarsinnaasut, atuarfiup pisortaa, Aqqa Samuelsen KNR-imut oqarpoq.