Atsiornernik katersineq: Maniitsoq nutaamik atuarfittaarli
Maniitsumi Atuarfik Kilaaseeqqap taartissaanik nutaamik sanasoqarnissaa anguniarlugu atuarfimmi angajoqqaat siunnersuisoqatigiivi septembarip 14-anniit ullumimut killilerlugu atsiornernik katersipput.
Inuit maannamut 660-it atsiorsimasut, angajoqqaat siunnersuisoqatigiivineersoq Elisebeth Larsen ilisimatitsivoq:
-Atuarfik nutaaq anguniarlugu suliniutit aallartinnikuugatsigit, taamaalilluta atsiornernik katersilluta aallartikkatta. Taava massakkumut 660-inik atsiortoqareersimalerpoq.
Elisebeth Larsen oqarpoq.
Atuarfik pisoqalisoq
Maniitsumi meeqqat atuarfiat pisoqalilluni ussiitsunngorsimasoq oqummillu aamma eqqugaasimasoq. KNR-imi sapaatit akunnerani kingullermi oqaluttuaraarput.
Atuarfik Kilaaseeraq atuarfimmilu siulersuisut suliffeqarfimmut oqummik immikkut suliaqartartumut atuarfiup oqoqasssusianik upernaaq maajimi misissuisitsimmata paasinarsivoq atuarfiup toqqaviata ilaa oqoqarlunilu isugutammat eqaarsaartarfik, ilinniartitsisut inaat inillu atuartitsiviusut ilaat oqummik eqqugaasut, sialleraangallu igalaat ilaat, atuarfiullu qaliata ilaa ussiitsuummat sialuup qillaartaraa.
Tamatuma kingunerisaanik init atuartitsiviusartut arfinillit biologeertarfillu maanna matuneqarallarmata atuartut atuarfimmi inini allani paaqqinniffimmilu maanna atuartinneqarallarput.
Qeqqata kommunia: Maniitsoq nutaamik atuarfittaassanngilaq
Nutaamilli atuarfiliortoqassanngitsoq Qeqqata kommuniani kommunalbestyrelsep ilinniartitaanermut ataatsimiititaliaani siulittaasoq Evelyn Mølgaard sapaatip akunnerata siuliani oqarpoq:
- Atuarfimmik nutaamik pilersaartoqanngitsoq, kisiannili atuarfiup nutarternissaanut, aningaasaliinerit ingerlanneqartut Qeqqata kommuniani kommunalbestyrelsip akuersissutiginikuuai.
Missiliuutit akuerineqariarpata katillugit 71 millionit koruunit iluarsartuussinissamut atugassat suliassallu nalinginnaasumik ingerlappata 2024-p qiteqqunnerani siusinnerpaamik nutarterineq aallartissinnaasoq taanna aamma oqarpoq, nangipporlu:
- Periarfissat sanaartorfissamut nutaamut pitsaanngillat, tassa massakkut illoqarfiup nutaartassaani nunagissaanerit ingerlaleruttorput, taannalu utaqqineqassappat suli atuarfimmik nutaamik pilersitsinissamut utaqqinissaq sivisunerussaaq.
Atsiornernik katersisoqarpoq
Atuarfittaarnissaq anguniarlugu atsiortitsineq ullumikkumut killeqarpoq nalunaaqutaq ataatsimut atsiornerit kommunimut tunniukkiartorneqassammata, Elisabeth Larsen oqarpoq.
-Taakkua atsiornerit akerliussutsimik takutitsinissatsinnut susassaqartunut tunniutissavagut. Ataatsimut tanneq qulingiluat Kilaaseeqqap Atuarfiani naapeqatigiissaagut. Taava ataatsimut kommunip allaffissuataanut ingerlaaqatigiissalluta.