Maniitsumi atuartut nutaamik atuarfittaassanngitsut
![](/sites/default/files/styles/image_934x467/public/article_images/maniitsoq_kilaaseeraq_skilt.jpg?itok=16L4REpQ)
Maniitsumi nutaamik atuarfiliortoqassanngilaq.
Qeqqata Kommuniani kommunalbestyrelse immikkut ittumik ataatsimiinnermi decembarip 19-ani taama aalajangerpoq. Maniitsumili Atuarfik Kilaaseeraq nutarterneqassaaq.
Viceborgmesteri Gideon Lyberth (Siumut) paasissutissiivoq.
Atuarfik piffissami sivitsortumi isugutammik oqummillu eqqugaaqqavoq, taamaammat tamanna nutaarsiassatsialattut nipeqarsinnaavoq. Illoqarfiulli innuttaasui atuartullu angajoqqaavi isumaqataanngillat. Taakku aningaasaateqarfimmit aningaasalerneqartumik nutaarluinnarmik atuarfiliortoqarnissaa kissaatigaat, kommunalbestyrelsilli tamanna itigartitsissutigaa.
Aningaasaateqarfiit soqutiginnittut
Suleqatigiissitat nutaamik atuarfiliornissamut aningaasaliisoqarnissaanut periarfissanik misissuisup ilaatigut AP Møller Fonden attaveqarfigaa, aningaasaateqarfiullu suliniummut tapersiinissaq itigartitsissutiginngilaa.
- AP Møller Fondenip nutaamik atuarfiliornissamut siunertat misissussallugu soqutigaa. Piumasaqaatituaallu tassaavoq kommunip nammineq saaffiginninnissaa, taamaalillutik kommune suleqatigalugu misissuineq aallartissinnaassallugu, Naleqqamit Karl Lyberth oqarpoq.
AAMMA ATUARUK Underskriftindsamling: Byg en ny skole i Maniitsoq
Kommunili taamaaliorniarani tassa aalajangerpoq. Taamaammat atuarfitoqaq nutarterneqaannassaaq.
Maniitsumi atuartut maanna sumiiffinni assigiinngitsunut nuutsinneqarnikuupput, ilaatigut katersortarfimmi, nipilersornermut ilinniarfimmi aamma inini allani atuartinneqartarput.
- Atuarfimmik sanaartornissamut ataatsimiititaliap, Atuarfik Kilaaseeqqami siulersuisunit kiisalu teknikkeqarnermut ingerlatsivimmi ilaasortaqartup. atuarfiup nutarsarneqarnissaata kinguaqqinnginnissaa kissaatigaat. Atuartut ilinniartitsisullu silaannalunnera pissutigalugu sumiiffinnut assigiinngitsunut siammarterneqarsimanerat naapertuutinngimmat, viceborgmesteri, Gideon Lyberth (S) tusagassiuutinut nalunaarummi oqarpoq.
Aalajangiineq uggornartoq
Birthe Mathiesen angajoqqaat sinniisaannut ilaasortaavoq, taannalu ilorrisimaarinninngilaq.
Kommunalbestyrelsi anignaasaateqarfimmit taperneqarnissamut qinneqarniarnani sukkavallaamik aalajangertoq, taanna isumaqarpoq.
- Angajoqqaat sinniisaannit aalajangiineq misissuinertaqarani ajornanngippallaartoq isumaqarpugut. Periarfissarmi misilinneqarsinnaavoq, assersuutigalugu qaammat ataaseq sivisunerusorluunniit atorlugu. Taamaammat uggornarpoq, Birthe Mathiesen oqarpoq.
AAMMA ATUARUK Qeqqata Kommunia: Maniitsoq nutaamik atuarfittaassanngilaq
Aningaasaateqarfinnilli nutaamik atuarfiliornissamut tapersiisoqarusussanersoq qularnarpallaartoq, viceborgmesteri isumaqarpoq.
- Aningaasaateqarfiit qinnuteqarnernik akuersiniarlutik oqarsimannginnerat tunngavilersuutigineqarpoq. Aningaasaateqarfimmi sulisut qinnuteqarnissatsinnik innersuussuteqaannarput, kisianni taakku inaarutaasumik aalajangiisartuunngillat, Gideon Lyberth oqarpoq.
Nutaamik atuarfimmik sanaartorneq 200-init 250 millionit koruuninik akeqassasoq, kommunalbestyrelse naliliivoq.
Kommunalbestyrelsi Kilaaseeqqap Atuarfiata nutarsarneqarnissaanut 71 mio. koruuninik immikkoortitsivoq.