Qeqqata Kommunia: Maniitsoq nutaamik atuarfittaassanngilaq
Atuarfik Kilaaseeraq ussiillisimammat oqoqarmallu nutaarluinnarmik atuarfiliortoqartariaqartoq Maniitsumi angajoqqaat atuartuutillit siunnersuisoqatigiivi piumasaqarput.
Nutaamilli atuarfiliortoqassanngitsoq Qeqqata kommunalnbestyrelsia aalajangertoq, kommunip ilinniartitaanermut ataatsimiititaliaani siulittaasoq, Evelyn Mølgaard (S) oqarpoq.
Atuarfiliorniassagaanni unammilligassarpassuaqarpoq
Maniitsumi Atuarfik Kilaaseeqqami atuartut atuariartoraangamik atuarfimmut ussiitsumut oqulimmullu isertarput. Taamaammat atuarfiup initai arlallit maanna matoqqapput.
Atuarfik sissamiimmat ulikkaangat imaq atuarfiup naqqanut aamma annguttarpoq. Tamanna atuarfiup oqoqassusia pillugu maajimi nalunaarusiap ersersippaa.
Taamaammat Maniitsumi angajoqqaat atuartuutillit siunnersuisoqatigiivi nutaarluinnarmik atuarfilioqqusipput.
Nutaamilli atuarfiliortoqassanngitsoq Qeqqata kommuniani kommunalbestyrelsep ilinniartitaanermut ataatsimiititaliaani siulittaasoq Evelyn Mølgaard oqarpoq:
- Atuarfimmik nutaamik pilersaartoqanngitsoq, kisiannili atuarfiup nutarternissaanut, aningaasaliinerit ingerlanneqartut Qeqqata kommuniani kommunalbestyrelsip akuersissutiginikuuai.
AAMMA ATUARUK Maniitsumi angajoqqaat: Nutaamik atuarfittaarusuppugut
- Maannalu aamma missiliuutini ilaatinneqartut, akuerineqariarpata, katillugit 71 millionit koruuninut tagginneqarput suliassallu nalinginnaasumik ingerlappata 2024-ip qiteqqunnerani siusinnerpaamik nutarterineq aallartissinnaavoq.
Atuarfinnik iluarsartuussineq Qeqqata kommuniata Namminersorlutik Oqartussanit 2018-imi tigummaguli ukiumut 13,7 millionit koruunit aningaasartaliunneqartut naammanngimmata katerseqqaalaarnissaq pisariaqarsimasoq Evelyn Mølgaard oqarpoq.
Kisianni sooruna Maniitsumi nutaamik atuarfiliornissaq orniginartinneqanngitsoq?
- Periarfissat sanaartorfissamut nutaamut pitsaanngillat, tassa massakkut illoqarfiup nutaartassaani nunagissaanerit ingerlaleruttorput, taannalu utaqqineqassappat suli atuarfimmik nutaamik pilersitsinissamut utaqqinissaq sivisunerussaaq.
Sisimiuni iluarsartuussinertulli iluarsaanneqassaaq
Sisimiuni Minngortuunnguup atuarfianik nutarterisimanertulli Atuarfik Kilaaseeraq nutarterneqassasoq, Evelyn Mølgaard oqarpoq.
-Soorlu Minngortuunnguup atuarfia maani nutarternikuuarput, tassanilu misilittagaqarpugut ajunngilluinnartunik. Tassa atuarfiup atorsinnaasortai atoqqillugit, soorlu cementitai atoqqillugit, atuarfeqarpugut nutaarsuarmik ullumikkut kusanartorsuarmik.
Taassumali Atuarfik Kilaaseeqqap, sissamut qaneqisup tiffarneqarsinnaaneranik isumaa mattutivinngilaa.
- Massakkut kissaatit ingerlaleruttorput, aamma kissaatini allaqqappat soorunami tamakkua nalilersuinermi ilaajumaarput, Evelyn Mølgaard KNR-imut oqarpoq.