Oquk ajornartorsiutaajuarsinnartoq: Meeqqat skolehjemmimiittut amerlulerput, niaqorluttarput issanngusarlutillu
Maniitsumi skolehjemmi oqungaatsiarpoq. Oktobarip 31-anni nalunaarusiaq taama takussutissiivoq.
- Init ilaat isersimaffigineqartariaqanngilluinnaraluarput, skolehjemmip pisortaa, Paalu Møller KNR-imut oqarpoq.
Meeqqat aqqanillit ilaatigut Sarfannguanit, Itillermit, Napasumit Atammimmiillu Maniitsumut atuariartortut tassani najugaqarput, meeqqat Maniitsumi Atuarfik Kilaaseeqqami 9. klassimi 10. klassimilu atuartuupput.
Atuarfik Kilaaseeraq arlaleriarluni oqimmik eqqugaasimasoq KNR-imit oqaluttuarinikuuarput. Atuarfiup qanoq innera pissutigalugu ilinniartitsisut arlallit atorfimminnik soraarput, anaanaasullu meeqqani oquttumut atuariartortikkusunnagu angerlarsimatiinnarpaa.
- Skolehjemmip oqussinnaanera nammineq maluginiarnikuunngilarput. Ineqartut ilaanniit takussutissaqarnikuuvoq, kisianni atuarfimmeersinnaanera eqqarsaatiginikuuarput, Paalu Møller oqarpoq.
Atuarfik Kilaaseeqqami atuartut 360-it missaanniittut sulisullu 50-it atuarfiup nutarterneqarluni 2025-mi naammassinissaata tungaanut ininut allanut nuuttussaapput. Atuartut ilaatigut KNI-p quersuanut, illerfissarsiutileqatigiit iniutaannut, Majorianut – skolehjemmimullu ilaatigut atuariartortalertussaapput.
Pilersaarulli taanna allanngorpoq, skolehjemmimi aamma oqimmik eqqugaavoq.
- Meeqqamik amerlulertoqarpoq, ataasinnguarlu anersaartorniarnikkut ajornartorsiuteqalerluni. Sulisut oqoqarnera aamma malugisinnaavaat, Paalu Møller oqarpoq.
Ineeqqani tamani oquttoq
KNR-ip eqqiaasartut suliffeqarfiutaata R&T-p skolehjemmimi oqoqarnersoq misissuinermini naggasiutitut nalunaarusiaa takuaa.
Ineeqqani misissorneqartuni tamani oquttoq paasineqartoq nalunaarusiami atuarneqarsinnaavoq.
Tamatuma saniatigut skolehjemmip ataatsimut igaffiani, inersuani sulisullu allaffiani oqoqartoq aamma paasineqarpoq. Tamatuma saniatigut uffarfiit cementitai qarmallu gummigai ”ajoquteqartutut” nalilerneqarput.
- Init najugaqarfigisagut pisoqaapput. Taamaammat oqoqarnissaa eqqarsaatiginikuuara, kisianni taama ajortiginissaa takorloornikuunngilara, Paalu Møller oqarpoq.
Nalunaarusiornermi misissuiffiusut qaani oqoqarneranut mycometerip nalinganik uttuisoqarpoq. Taanna ”nalinginnaasutut” inissinneqassaguni 20-p ataaniittussaavoq. Taassumalu nalinga 135-mit qaffasinneruguni qaffasippallaartussaavoq.
Skolehjemmip inersuani qaffasissuseq 6793-imiippoq. Meeqqat ineeraasa ilaanni qaffasissusaa 2443-miippoq.
Meeqqat aqqanillit sumut qaqugulu nuussanersut, Paalu Møllerip naluaa. Taassumali ajornartorsiut pinasuartuusoraa, taassumali nammineq meeqqallu allatut periarfissaqannginnamik utaqqiinnartariaqarlutik oqaatigaa.
- Maannakkut aaqqiissuteqartoqartariaqaraluartoq periarfissaqanngilaq. Aaqqiissutissarsiuleruttorpugut, kisianni Maniitsumi nuuffigisinnaasagut amerlanngillat, taanna oqarpoq.
Meeqqat sumukassappat?
Qeqqata Kommuniani ilinniartitaanermut ataatsimiititaliap siulittaasuata, Evelyn Frederiksenip Siumumeersup atuartut sumukarnissaat aamma naluaa.
- Kommunip atuartut, skolehjemmimi najugaqartut sumut inissinneqarnissaat misissuleruttorpaa, taanna KNR-imut oqarpoq.
Tassa imaappa meeqqat skolehjemmimi oquttumi najugaqartut tassani najugaqaannarallassasut?
- Sumi najugaqarsinnaanerat maannakkut ulapputigineqarpoq. Tuaviortumillu suliarineqartoq oqaruma imaappoq, najugarisinnaasaannik nassaarniarluni ilungersortumik sulisoqartoq.
Atuarfik Kilaaseeqqami atuartut angajulliit skolehjemmimi atuartinneqartalernissaa pilersaarutaagaluarpoq. Atuartut maanna sumukartalissappat?
- Sumiissinnaanerat maannakkut misissorparput, paasisimaleriarutsigu nalunaaruteqassaagut.
Kommune meeqqanut akisussaaffeqarnerminik eqqortumik suliaqartoq isumaqarpit?
- Paasissutissat nutaasorujussuupput. Suliniutit aallartinneqarput, akisussaassuseqartumillu suliarineqarluni, Evelyn Mølgaard oqarpoq.
Qeqqata Kommuniata atuartut aqqanillit angerlarsimaffigiligassaannik sapaatip akunnerata tulliani nassaarsimanissartik naatsorsuutigaa.