Agnethe Tittussen 1973-imi toquvoq – ippassarli utoqqatserfigineqaqataavoq
Ministeriuneq aappassaaneerluni meeqqanut misileraataasimasunut suli uumasunut ippassaq Kulturip illorsuani Katuami utoqqatsermat Agnethe Tittussen najuutinngilaq.
Agnethe Tittussen 1973-imi toquvoq. Taamaakkaluartoq najuuppoq. Taassuma nukaa, Stine Jensen, angajuni sinnerlugu assialu nassarlugu Katuamut takkuppoq.
- Qatanngutigigaluara sinnerlugu maani peqataavunga, assullu pingaaruteqartorujussuuvoq maani peqataasinnaagama, Stine Jensen KNR-imut oqarpoq.
- Isumaqarpunga maaniinnissannut pisussaatitaallunga qatanngutaasutut ilaqutaasutullu.
Meeqqat 22-t 1951-imi misiliutaasussatut Kalaallit Nunaanniit Danmarkimut nassiunneqarput.
Meeqqat taakkua misileraanermi pingaarnertut inissisimapput, taamani meeqqat qallunaanngorsarneqarput maligassatut Kalaallit Nunaannut utersinnaaqqullugit.
Taakkuali angerlaramik kalaallisut oqalussinnaanngillat ilaquttaminnilu najugaqaqqusaanatik. Meeqqallu taamani Nuummi børnehjemmimi inissinneqarlutik.
Meeqqat 22-t sinneri arfinillit ullumi suli inuupput. Taakkua 80-it missaannik ukioqarput.
AAMMA ATUARUK Mette Frederiksen Múte B. Egedelu Katuami inunnik ulikkaavissumi attortinnartumik oqalugiartut
Naalakkersuisut siulittaasuat, Múte B. Egede, meeqqat misileraataasimasut eqqaaniarlugit minutsimik ataatsimik nipaallisimatitsivoq.
- Utoqqatsertoqarnerani peqataasinnaagama qujamasuutigisorujussuuara, taakkummi ukiorpassuarni anniaatigisimavaat. Allaannginnami tassa maanna naggaserneqartoq. Utoqqatsertoqarnerani ilaqutaasunut pingaaruteqartorujussuuvoq, Stine Jensen oqarpoq.
Taanna naalungiarsunnguusoq angajua Danmarkimut misileraatissatut 1951-imi aallartinneqarpoq. Kisianni angajuni Nuummut utermat eqqaamavaa, angajuali Agnethe angajoqqaamini najugaqaqqusaanngilaq. Taanna meeqqat angerlarsimaffiannut inissinneqarpoq kalaallisullu oqaloqqusaanani.
Agnethe Tittussen 18-inik ukioqalernissani tikillugu meeqqat angerlasimaffianniippoq. Ukiulli aqqanilli qaangiutiinnartut 29-nnarnik ukioqarluni aanaartoorluni toquvoq.
- Assorsuaq qujavunga taakku meeqqat qimagutereersimasut pillugit aammalu maaniittut utoqqatserfigineqarnerannut peqataasinnaagama.
Stine Jensen. Assi: Marie Kuitse Kristensen/KNR.
Taanna kisiartaalluni ullormi tussunngunarluinnartumi nalaattaqanngilaq. Kristine Heinesen aamma Helene Thiesen ullormi tussunngoqat, taakkuuppummi 1951-imi umiarsuakkut Danmarkimut aallarunneqarput.
- Ullumikkut peqataasurussimavunga pingaartumik oqaluttuap naammassineqarneranut. Maanna naammassivoq, naammassilluarneqarporlu. Misigissutsitigut killitsisimaqaanga massakkut, Kristine Heinesen KNR-imut oqarpoq.
Allaanngilaq ulloriaq eqqorneqartoq
Helene Thiesen taama misigisimavoq.
- Una utoqqatserfigineqarneq ukiunik qulikkuutaanik utaqqiuarsimavara. Kiisami piviusunngorpoq, tamanna misigisaq annertoqaaq. Ima annertutigaaq allaanngilaq ulloriaq eqqorlugu.
AAMMA ATUARUK Video: Meeraanerminni misileraataasimasut akornatsinniinngitsut eqqaaniarlugit minutsimi ataatsimi nipaallisimaneq
Atuakkiara kiisami naammassinissaa piffissaqarfigilerpara. Nuummiinninni misigisakka pilluarfiunerpaat allaaseraakka, meeqqat atuarfianinngaanniit ilinniarfissuarmut pinera. Inuuneq kiffaanngissuseqarnermut pisillugu iluaqaaq, meeqqat angerlarsimaffiani mattusimaneqartuaannanngilagut. Pilluarnaqaaq, ukiuni inuuffigisanni nuannernerpaajupput.
Pingajuussaanik utoqqatserneq
Ministeriuneq Mette Frederiksen, meeqqanut misleraataasimasunut pingajussaaneerluni ippassaq utoqqatserpoq.
Naalagaaffiup meeqqat taakku maligassiuisunngornissaat siunertaralugu 1951-imi Danmarkimut misileraatitut aallartitsisimanini pillugu utoqqatserpoq.
Meeqqanik misileraateqarneq ukioq ataasiinnarmik sivisussuseqartussaagaluartoq ajorluinnartumut inissippoq. Tassa meeqqat 22-t inuunerup sinnerani kingunerlutsitsinermik ujariatsinermillu nalaataqarput. Angajoqqaaminniit peersitaapput.
Misileraataasimanertik inuunermi sinneranut sunniuteqarpoq.
AAMMA ATUARUK Ministeriuneq misileraataasimasunut utoqqatsertoq: Naleqqutinngitsumik kingunerluuteqartoqarneranik kinguneqarpoq
Meeqqani taakkungannga arfinillit Danmarkimi ilaqutariinnit meeravissianngortinneqarput, nunatsinnullu uteqqinnatik.
Sinnerpassui amerlasuut nunatsinnut angerlarput, ilaquttaminnillu najugaqartinneqaratik. Taakku meeqqat angerlarsimaffiannut inissinneqarput, danskillu oqaasiinik taamaallaat oqaloqqusaallutik. Amerlasuut ilaquttaminnut attaveqarunnaarput, oqaatsitillu annallugit.
Mette Frederiksen decembarimi 2020-mi allakkatigut utoqqatserpoq, sapaatillu akunnerata siuliani Københavnimi Nationalmuseummimi kiinnamiit kiinnamut utoqqatserpoq, ippassarlu Nuummi Katuami aamma utoqqatserluni.