Video: Meeraanerminni misileraataasimasut akornatsinniinngitsut eqqaaniarlugit minutsimi ataatsimi nipaallisimaneq
![](/sites/default/files/styles/image_934x467/public/oembed_thumbnails/2022-12/GwCWzgBHyQDe_5HKVaOAmOmhS_D3syOaO2wHpbU5Be8.jpg?itok=q7b85Ulk)
Meeraanerminni misileraataasumik Danmarkimut 1951-imi nuutsinneqarsimasunit 22-nit arfinillit ullumikkut suli uumasut ullumikkut utoqqatserfigineqaqqipput.
Meeqqanit taakkunannga arfinillit Danmarkimi ilaqutariinnut meerarsianngortinneqarlutik nunatsinnut uteqqinngillat.
Meeraanerminni misileraataasimasunit maanna utoqqalisunit 16-it toqoreersnikuupput. Taakkulu pillugit Naalakkersuisut siulittaasuata Múte B. Egede minutsimi ataatsimi nipaallisimatitsivoq.
Minutsip ataatsip Helen Thiesen misileraataasimasullu arfinillit ilaat, Nuummi aamma peqataasoq qullilisippai.
Taamani nunatsinnut angerlaqqittorpassuit ilaquttaminnut angerlartinneqanngilaq. Taakkuli meeqqat illuannut danskisut oqaluffigisassaminnut inissinneqarput. Amerlasuut ilaquttaminnut attaveqarunnaarput kalaallisullu oqaatsitik puiorlugit.
AAMMA ATUARUK Mette Frederiksen Múte B. Egedelu Katuami inunnik ulikkaavissumi attortinnartumik oqalugiartut
Ministeriuneq allakkatigut 2020-mi decembarimi utoqqatsissuteqarpoq. Taanna Københavnimi Nationalmuseumimi siullermeerluni nipilimmik utoqqatsissuteqarpoq – tamannalu Nuummi ullumikkut aamma uteqqippaa.
- Meeqqanut 22-nut taamani iliuutsit kukkunerullutillu naakkittaanneruvoq, tamannalu pisimanngisaannartussaagaluarpoq. Tamanna Danmarkimit qangali oqaatigereersimassagaluarparput, Mette Frederiksen kulturip illorsuani Katuami oqaluarnermini oqarpoq.
AAMMA ATUARUK Ilisimatooq meeraanerminni misileraatigineqarsimasunut utoqqatserneq pillugu: Oqaluttuarisaanermi pingaaruteqarluinnarpoq
Ministeriuneq oqalugiarunnaarmat Katuami isersimasut tamarmik nikuillutik ersaattaapput.
Naalakkersuisut siulittaasuat, Múte B. Egede (IA) aamma oqalugiarpoq:
- Kingumut qiviassaagut taakkulu siumut alloriarnissamut atussavagut. Nunasiaataanerup nalaani susoqarsimanerata inuttut nammineersinnaasutut qiviarluta qaangiinissarput aamma pissutsit oqaluuseralugillu ammasumik oqallisiginissaat pingaaruteqartoq isumaqarpunga.