Piumassuserinngisamik kinguaassiorsinnaanngitsut nakorsartinnissaat: Aappaagu aningaasaliiffigineqaqqissasoq Agathe Fontainip neriorsuutigaa

Piumassuserinngisamik kinguaassiorsinnaanngitsut ikiorserneqarsinnaanissaat 2025-mi aamma neqeroorutaasinnaassasoq, naalakkersuisup tamaviaarutigissallugu oqaatigaa.

Allattoq Ulrikke Andersen

aggustip 07-at 2024 07:55

Piumassuserinngisamik kinguaassiorsinnaanngitsut angajoqqaanngorususuttut ikiorneqarnissaat nalorninartorsiorfiusimasoq, imaannaanngissimaqisorlu aqqutigereerlugu ikiorserneqarsinnaanissaat iluatsippoq.

Nutaarsiassaq nuannersoq sapaatit akunnerata masssuma ingerlanerani takkuppoq. Piumassuserinngisamimmi kinguaassiorsinnaanngitsut nakorsartissinnaalernerat pillugu tigussaasumik oqaasiinnaanngitsumik kiisami iliiuuseqartoqarpoq.

Aamma atuarukDemokraatit piumassuserinngisaminnik kinguaassiorsinnaanngitsut ikiorneqarniarnerat taamaatinneqartoq eqqarsarnartoqartikkaat

Aallartussat siulliit Rigshospitalimi Danmarkimut kiisami aallalersut nakorsat pisortaata Aviaja Siegstadip KNR-imut oqaluttuaraa.

Piumassuserinngisamik kinguaassiorsinnaanngitsut nakorsartissinnaanissaat pillugu aningaasaliissutit 2025-mi aamma qulakkeerusullugit Peqqissutsimut naalakkersuisup Agathe Fontainip oqaatigaa.

- Aningaasat aappaagu 2025-mut aningaasanut inatsisissamut immikkoortinneqarnissaat naalakkersuisuninngaanniit siunnersuutigissamaarparput. suliareqqaarneraninngaanniit 8,7 millionit koruunit aallaaviupput, taanna oqarpoq.

Neriorsuutit eqquutsinneqassasut

Siornatigut neriorsuisoqareertarpoq.

Aningaasat ikiorsiinermut atorneqartussat, aningaasanut inatsimmut partiinit tamanit isumaqataaffigisaanni aningaasat inatsimmut ilanngupput. Aningaasanut inatsit saqqummermat, paasinarsivoq aningaasat nassuiaateqarfigineqaratik piiginnarneqarsimasut.

Aamma atuarukIvalo Maannguarlu meerartaarusupput – taakku nakorsartinnissamut akiliuteqartoqarniarunnaarmat nikallorlutillu pakatsipput

Agathe Fontainilli neriorsuutigaa tamaviaarutigissallugu:

- Aap taamaappoq, politikkikkut soqutigivarput aamma soorunami inatsisartut aalajangigaata piviusunngortinnissaa suliassarigatsigu, taamaammat soqutigisarivarput suliap naammassilluarnissaa.

Siunissaq qulakkeerinninngilaq

Aningaasaliisoqarporlu massakkut, aningaasaliissutillu attatiinnarneqarnissaat ilimanarpoq.

Angajoqqaanngorusullutik ikiorserneqartussat siulliit Danmarkimut aallarput.

Aningaasat qassit aaappaagu immikkortinneqassanersut misissuiffigineqarnissaanut peqqissutsimut naalakkersuisoqarfik ikiorserneqartut malinnaavigai.

Piumassuserinngisamik meerartaarsinnaanngitsunut ikiorsiisarneq pillugu suliaq naalisarlugu

Aappariit meerartaarsinnaanngitsut peqqinnissaqarfiup akiligaanik Danmarkimi IVF aamma ICSI atorlugu ikiorserneqarsinnaanerat, politikerit 2019-mi unitsippaat.

Ikiorserneqarneq 50.000 koruuneqarpoq, taakku saniatigut billitsit, unnuinerit nakorsaatillu aamma akiligassaapput.

Kalaallit Nunaanniittut angalaneq ineqarnerlu akilertalermassuk ikiorsiinermi periarfissat assigiikkunnaarnerat tunngavilersuutigalugu unitsinneqarpoq.

Piumassuserinngisaminnik meerartaarsinnaanngitsut Danmarkimi IVF-imik ICSI-imillu ikiorserneqarnissaata sanitigut angalanerit ineqarnerillu Namminersorlutik Oqartussanik akilerneqartalernissaat pillugu Inatsisartunut ilaasortaq Anna Wangenheim Demokraatinersoq 2022-mi ukiaanerani ataatsimiinnermi siunnersuuteqarpoq.

Naalakkersuisut aningaasanut inatsissatut siunnersuut ukioq kingulleq aggustimi saqqummiummassuk, Danmarkimi meerartaarniarnissamut ikiorsiinermut 8,7 millionit koruunit siunnersuummi illuartinneqarsimapput.

Aningaasalli januaarimi tammaaneqaqqilerput susoqarsimaneralu Naalakkersuisut arlaannaataluunniit nassuiarsinnaanngilaat.

Aappariilli Danmarkimi reagensglas atorlugu meerartaarniarsinnaanerannut ukioq manna aningaasaliivigineqarnissaannut 3 millionit koruunit apriilimi nassaarineqarput.

Pisariaqarpallu 5,7 millionit koruunit aamma illuartinneqarsinnaapput. Aningaasaliissutillu taakku katikkaanni aningaasanut inatsimmi 8,7 millionit koruunit tammaaneqaraluarput.

Allisiguk

Inatsisissatut siunnersuut piviusorsiorpalaartumik inuiaqatigiinnut isumaqartariaqartoq Agathe Fontainip oqaatigaa:

- Aningaasalisoqqarnissaa politikkikkut sulissutigaarput. Taamatut suliaq aallartissinnaaqqullugu immikkut ittunik aningaasaliivugut, kisianni nakorsaninngaanniit pineqartut passunneqarnerat qanoq ingerlanersoq immikkut ilisimasallit suliarivaat taakkua, taakkulu innersuussutaat taavalu naammassisaallu utaqqimaarpagut.

Aamma atuaruk Namminneq kinguaassiorsinnaanngitsut: Rigshospital piareeqqavoq ukiorli ataaseq piviusorsiunngilaq

Ukiormanna aningaasat sinneqassappata, aappaguumut nuunneqarsinnaapput :

- Aningaasaliissutit ukiup naalarnerani tamakkiisumik atorneqarsimanngippata aappaagumut missingersuutinut nuunneqarsinnaanersut takussavarput, tamannalu piviusorsiornerunersoq. Aappaagumulli nuunneqarsinnaanissaannut tunuarsimaarfiginavianngilara, naalakkersuisooq Agathe Fontain naggasiilluni oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.