2026-mut aningaasanut inatsit saqqummiunneqartoq: Ukiut qulit tulliuttut ilungersunassapput

Tusagassiortunik ullaaq manna katersortitsinermi 2026-mut aningaasanut inatsit saqqummiunneqarpoq. Partiit tamarmik isumaqatigiissummut ilanngupput, Naleraq kisimi pinnani, taannalu isumaqatiginninniarnernit tallimanngormat tunuarpoq.

Isumaqatigiissutip atuunnerani illuatungeriit sisamat tamarmik isumaqatigiissuteqarnertik nuannaarutigaat, isumaqaramik tamanna akisussaassuseqarnermut ersiutaasoq.

- Isumaqatigiissut pillugu oqaloqatigiilluarsimanerput nuannaarutigaara, aningaasaqarnerup akisussaaffiginissaa pingaartillugu, Aningaasaqarnermut Akileraartarnermullu Naalakkersuisoq Múte B. Egede (IA) tusagassiortunik katersortitsinerup aallartinnerani oqarpoq.

Partiit allat pingasut aamma taamatut oqariartuuteqarput, tamarmillu akisussaassuseqarnissaq eqqaavaat.

- Akisussaaffeqateqarnerput nuannaarutigaarput, Erik Jensenip Siumumeersup ilaatigut oqaatigaa.

Naalakkersuisulli Múte B. Egedep ukiut tulliuttut qulit aningaasaqarnikkut ilungersunartuussasut isertuutinngilaa, erseqqissarpaami innuttaasut akileraarutinik akitsuutinillu qaffasinnerusumik eqqunneqassanngitsut.

Pisortat allaffissornerat annikillisinneqassaaq

Partiit tamarmik pisortat allaffissornerisa ikilisarneqarnissaat kissaatigaat, ingammik Danmarkimi.

Aningaasat nunanut allanut ingerlatinnagit uagutsinnut iluaqutaanissaat anguniarlugu aningaasat nunatsinnit anisut ikilisartariaqarpagut, Mariane Paviasen Jensen oqarpoq.

Aammattaaq piujuartitsilluni takornariartitsisarneq Kalaallit Nunaannut iluaqutaasinnaasoq, umiatsiaararsorluni aalisarnermi atugassarititaasut nerisassallu akii oqaluuserineqarput.

- Sinerissap qanittuani aalisarnerup pitsaanerulernissaa umiatsiaararsortullu aningaaserivinni taarsigassarsisinnaanerminnut periarfissagissaarnerulernissaat IA-p kissaatigisimavaa.

Siumumeersup Erik Jensenip tamanna umiatsiaararsorlutik aalisartartut ikiliartuinnarnerinik pissuteqarnerarpaa. Aningaasanulli inatsimmi tamanna aaqqiivigineqarniarpoq.

- Umiatsiaararsortut atugaasa aaqqinnissaannut aningaasaliissuteqarpugut, Erik Jensen oqarpoq.

Nerisassat akii misissorneqartariaqartut

Partiit KNI-mi akinik misissuerusunnertik kingullertut saqqummiussaata ilagaat, nerisassat akii qaffasippallaarmata, politikkerillu innuttaasut tamarmik inuuniarnermi atugaat pitsaanerulersinniarlugit iliuuseqarusupput – nunaqarfinniit illoqarfinnut annernut.

- Innuttaasut ulluinnarni pisariaqartitaminnik pisinissaminnut akissaqartariaqarput, siunissarlu isumalluarluta isigaarput ingammik innuttaasut inuuniarnikkut ajornartorsiortut atugaasa pitsanngorsarneqarnissaannut tunngatillugu, Marianne Paviasen (IA) oqarpoq.

Ileqqaagaqannginneq

Politikerit aningaasaqarluarnerup nalaani aningaasanik naammattunik immikkoortitsisimannginnerat, Aningaasaqarnermut Siunnersuisoqatigiit siornatigut isornartorsiorsimavaat.

Nunatta karsiani ileqqaakkat - akiliisinnaassusermik taaneqartartut -  2025-p naanerani 350 millionit koruunimiinnissaat naatsorsuutigineqarpoq.

Aningaasanut inatsisissatut siunnersuutip, aggustimi saqqummiunneqartup, takutippaa partiit aningaasanik immikkoortitsinissamut periarfissarsiussasut.

Aningaasanut inatsit nutaaq naapertorlugu nunatta karsiata sipaarutai qanoq amerlatigissanersut, KNR-ip tusagassiortunik katersortitsinermi apeqqutigaa.

Aningaasaqarnermut akileraartarnermullu naalakkersuisoq Múte B. Egede oqarpoq, nunatta karsia suli annertuumik unammilligassaqartoq.

- Aningaasanik katersisinnaanerulerpugut, naak sinneqartooruteqaraluarluta nunatta karsia suli unamminiagassaqarpoq.