USA-p aallartitaata Trump nunatsinni tapersersortissarsiorsorisimanngikkaa

USA-p Danmarkimi aallartitaa Ken Howeryp USA Kalaallit Nunaanni sunniiniarsarisimaneranik qanimut ilisimasaqanngilaq. Taamaaliortoqarsimanissaalu ilumuunnginnerarpaa.

Tamanna danskit naalakkersuisuisa "ilungersunarujussuartutut“ isigivaat, USA-llu taamaattoqannginneranik siornatigut oqaaseqarnikuunnginnerat, ministeriunerup Mette Frederiksenip maluginiarnikuuaa.

Aallartitarlu apersorneqarami aamma nangaassuteqarpoq.

- Amerikamiut ilai Kalaallit Nunaanni soqutigisaqarsinnaapput. USA-mili naalakkersuisut innuttaasut ataasiakkaat iliuusiinik aqutsinatillu nakkutilliisuunngillat, Ken Howery aviisimit Dagbladet Børsenimit apersorneqarami oqarpoq.

DR-ip aggustimi tamanna saqqummiummagu uissuummissutaavoq.

Nunatta USA-mut ilanngunneqarnissaa Trumpip qangali kissaatigaa, angutillu USA-p præsidentianut, Donald Trumpimut, attavillit nunatsinni  tapersersortissarsiorlutik sunniiniarnerat tusagassiuummit taamani allaaserineqarpoq.

Nunani tamalaani inatsisit unioqqutinneqartut

Angutit namminneq piumasamittut iliornersut, DR-imit paasineqanngilaq. USA-p aallartitaa apereqqinneqarami akivoq, "uanga inimiinngilanga, taamatulli paasivara.“

Aallartitatut suli atorfininngikkallarmat oqaluttuaq saqqummiunneqarami, tamanna pillugu aatsaat oqaaseqarpoq.

Nunanut allanut ministereqarfiup amerikamiut Danmarkimi chargé d'affaires-iat oqaloqatigiumallugu taamani qaaqquaat. Chargé d'affaires-eq tassaavoq atorfilittaq qaffasissumik inissisimasoq aallartitamiilli appasinnerusumi inissisimasoq.

Amerikamiut Kalaallit Nunaannik “piginnillutik aqutsinissaat” pisariaqarluinnartoq, aallartitassaq toqqarneqarmat Trumpip nalunaarutigisimavaa

USA taamaaliortuusimappat, taamaaliorneq inatsisinik tamanik unioqqutitsinerusoq, nunanut allanut ministeri Lars Løkke Rasmussen (M) oqarpoq.

- Pisortat sunniiniarnertut taaneqarsinnaasunut peqataasimappata, akuerinnissimappata imaluunniit tapersersortissarsiorlutik sunniiniarsimappata, taamatut iliorneq nunat tamalaat inatsisaannut tamanut akerliulluinnarpoq, taanna oqarpoq.

Politiit paasiniaasartui naapertorlugit, Nunatta Danmarkillu attaveqatigiinnnerat tapersersortissarsiorlutik sunniiniartunit innarlerniarneqarpoq.

/ritzau/