Mikael Petersen: Kinguaassiutitigut innimiilliorneraanerit ilisarisinnaanngilakka
Partii Naleqqami matu ulluni kingullerni matorlunneqartaarpoq. Partiimmi siulittaasuata, Hans Enoksenip Siumumi allattaanerusimasoq Mikael Petersen partiimini allatsinngortippaa.
Siullermik Kuno Fencker tamatumunnga akerliulluni pingasunngormat partiimit anivoq. Partiillu inuusuttaasa siulittaasuat, Paarnannguaq Tobiassen aamma akerliulluni tunuarluni. Taannalu partiimut atassutaarunnissani KNR-imut oqaatigaa.
AAMMA ATUARUK Inniminniilliorsimanerarneqarnermi kingorna: Mikael Petersen Partii Naleqqami allatsinngortoq
Tunuartut partiimi Mikael Petersenip atorfeqarfigisaani ilaasortaarusunngillat. Mikael Petersen februaarimili oqallisaaqaaq. Arnammi qulit Siumut partiianut attuumassuteqartut kinguaassiuutinut innimiilliortarsimanerarlugu unnerluutigaat.
Arnat qassiiusut – ilaatigut folketingimut ilaasortaq, Aki-Matilda Høegh-Dam – tamanut tamatuma kingorna saqqummerput.
Tamanna Mikael Petersenip Siumumi siulersuunernit tunuartitaaneranik kinguneqarpoq – Mikael Petersenilu partiimi tassani atorfimminit tamatuma kingorna soraarpoq.
Nangaanani imminut oqaluuteriaaseqarneq
Taannalu Naleqqami maanna atorfinitsinneqarpoq.
Mikael Petersenip unnerluutiginninnerit nammineerluni ilisarisinnaanngilai. Taanna “inatsisitigut kukkussuteqarsimanngissorivoq unnerluutiginninnerillu itigartitsissutigaluit, taamaattorli siusinnerusukkut nangaanani imminut oqaluuteriaaseqarnermi allamut mamiatsatsitsisimanini nassuerutigaa, tamannalu paasinerluinermik kinguneqarsimasinnaallunilu”.
Tamanna tusagassiuutinut nalunaarummi allappaa.
AAMMA ATUARUK Aki-Matilda Høegh Dam: Partii Naleqqamut tatiginnissuseeruppunga
- Unnerluutigineqanngisaannarnikuuvunga. Pisortarisimasannit taama oqarfigineqarnikuunngisaannarpunga. Siumumi nangaanani imminut oqaluuteriaaseqarnikuuvoq, tamannalu uanga allattaaninni peqataaffiginagu akerlilersimassagaluarpara. Kinguaassiutitigulli innimiilliornerit pineqarneranni taakku arlaatigut ilisarisinnaanngilakka. Eqqartuussissuserisullu tassunga atatillugu suliassanngortitassaqanngissoraat, Mikael Petersen tusagassiuutinut nalunaarummi allappoq.
Siumumi nangaanani imminut oqaluuteriaaseqarnikuuvoq, tamannalu uanga allattaaninni peqataaffiginagu akerlilersimassagaluarpara..
Taassuma eqqartuussissuserisut, Koch/Christensenip suliamik nassuiaateqarnerat innersuussutigaa:
- Eqqartuussissuserisut inerniliinerat paatsuugassaanngilaq. Tamannali suleqatigisimasannut sulisitsisorilikkannullu atatillugu uivissutaaneranut ajuusaarninnut allannguinngilaq, Mikael Petersen tusagassiuutinut nalunaarummi allappoq.
Nammineerlutit oqarputit eqqarsaatigitsuukkannik arlaatigut attortuugaqarsinnaasimallutit. Kingumut qiviarutta taamani taamaaliorsimanitit, illit nammineq eqqarsartaatsit aallaavigalugu, ajortuliornertut isigaagit? Ajortutut isigaagit?
- Unalu 2013-ini sechikanimut tunngasoq inatsit allanngortinneqarpoq, taanna ataqqilluuinnaqqissaarpara taanna oqaatigissavara. Taamaattumik partiip iluanni ikinngutigiinnerup qanoq iliorsinnaasarnivut aamma ilaatigut immaqa eqqumaffigivallaarsimanngilagut inatsit taakku nutaat. Taamaattumik taamatut pisoqartarsimasinnaanera, pisoqariataarsinnaaneralu taanna ammaffigiluinnarpara. Taamaattumillu paasinerlunneqariataarsimasinnaasarnera isertussanngilara, Mikael Petersen oqarpoq
- Misigisimavunga inuttut pissutsinni paatsoorneqarlunga
Tusagassiuutinut nalunaarut naapertorlugu “Mikael Petersenip pisumi ataatsimi qiimmassarnermilu suleqatimi killissaanut qaangiisimanini nassuiaatiginikuuaa”.
Taassuma “unnerluutiginninnerit ilumoortuunerarlugit kukkusumik saqqummiunneqarnerat kukkuluttornerusoraa”.
AAMMA ATUARUK Aviisi: Mikael Petersen arnat nuluisigut pattalaartarsimanerinik nassuertoq
- Oqaasiliarisartakkakka suleqatinnullu oqaloqateqariaaserisartagara paatsoorneqarsinnaasarnerannik eqqumaffiginninnerusimannginnakkit ajuusaarutigeqaara, inunnillu mamiatsatsitsisimaguma tamanna ajuusaarutigeqalugu, Mikael Petersen tusagassiuutinut nalunaarummini allappoq.
- Paarlattuanilli nalunaarutiginninnermik sulisitsisorisimasammaluunniit annerusumik iliuuseqarnerannik kinguneqanngitsumik kinaassutsimik isertuussilluni unnerluutiginninnerit atorfittaannut piukkunnanngitsutut nalilerneqarlunga tunngavilersuutigineqarnerat paasisinnaanngilara. Misigisimavunga inuttut pissusera paatsoorneqarsinnaasarnera narrujuummissutigineqarsinnaasarnerallu pillugit unneqarillunga nassuerutiginninnera paatsoorneqartoq, Mikael Petersen allappoq.
