- Pissuserissaarnissaq pingaartikkakku tunuarpunga, Kuno Fencker KNR-imut oqarpoq.Assi: Arkiv

Partiimi allatsinngortitsisoqareermat: Kuno Fencker Partii Naleqqamit tunuartoq

Mikael Petersen kinguaassiuutinut inniminniilliorsimanerarneqarnermi kingorna Siumumit tunuartitaavoq. Partii Naleqqami maanna atorfinippoq.

Partii Siumumi allattaasimasoq, Mikael Petersen, Partii Naleqqami pingasunngornermi atorfinippoq. 

Tamannalu mamiatsaatigineqalereerpoq, Kuno Fenckerimi Partii Naleqqamit erngerluni tunuarmat.

- Pissuserissaarnissaq pingaartikkakku tunuarpunga, Kuno Fencker KNR-imut oqarpoq nangillunilu:

- Arnat qulit Mikael Petersenimit kinguaassiuutitigut innimiilliorfigitissimanerarput. 

AAMMA ATUARUK Inniminniilliorsimanerarneqarnermi kingorna: Mikael Petersen Partii Naleqqami allatsinngortoq

Mikael Petersen februaarimili oqallisaaqaaq. Arnammi qulit Siumut partiianut attuumassuteqartut kinguaassiuutinut innimiilliortarsimanerarlugu unnerluutigaat.

Arnat qassiiusut – ilaatigut folketingimut ilaasortaq, Aki-Matilda Høegh-Dam – tamanut tamatuma kingorna saqqummerput. 

Tamanna Mikael Petersenip Siumumi siulersuunernit tunuartitaaneranik kinguneqarpoq – Mikael Petersenilu partiimi tassani atorfimminit tamatuma kingorna soraarpoq.

Atorfinitsitsinermut tunngavilersuutit naapertuussorinnginnerarai 

Taamaakkaluartoq Partii Naleqqap siulittaasuata, Hans Enoksenip Mikael Petersen allatsitut pingasunngornermi atorfinitsippaa. 

- Mikael Petersenimut unnerluussinerpassuit politiinut suli tunniunneqanngillat, Hans Enoksen KNR-imut oqarpoq. 

- Paasissutissat pissarsiavut naapertorlugit politiinut suli unnerluussisoqaranilu tunniunneqarsimanngilaq. Taamaammat uagut pisussaanngilagut unnerluussinissamut pisuutitsiniarnissatsinnullu. Taamaattoqarsimassappat Siumut akisussaaffik nammineq tigusussaavaa, uaguunngitsoq.

AAMMA ATUARUK Aki-Matilda Høegh Dam: Partii Naleqqamut tatiginnissuseeruppunga

Kuno Fenckerilli Mikael Petersenimik atorfinitsitsinermut tunngavilersuutit naapertuussorinnginnerarpai. 

Kuno Fencker Aki-Matilda Høegh-Damilu aappariipput – tamannali tunuarninnut tunngaviunngilaq, Kuno Fencker oqarpoq. Arnammi qulit Mikael Petersenimit kinguaassiuutitigut innimiilliorfigitissimanerarlutik nalunaaruteqarnerat Fenckerip tunngavilersuutigissallugu naammagaa: 

- Kinguaassiuutitigut innimiilliortoqarsimaneraanera naammappoq, Kuno Fencker oqarpoq. 

Mikael Petersen Hans Enoksenilu Siumumi ilaasortaagallaramik suleqatigiipput.
 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat