Aki-Matilda Høegh Dam: Partii Naleqqamut tatiginnissuseeruppunga
- Qanoq inneratut oqassaanga. Sallunianngilanga. Quarsaarpunga.
Folketingimut ilaasortaq, Aki-Matilda Høegh-Dam taama oqarpoq. Taassuma Siumup allattaanerisimasaata, Mikael Petersenip suliffigisimasami assinga Partii Naleqqami nangittussanngoraa tusaqqammerpaa.
- Quarsaaqqaqaanga, politikeri inuusuttoq oqarpoq.
Taassuma arnat allat qulingiluat Siumumut atassuteqartut peqatigalugit Mikael Petersen kinguaassiutitigut tulleriiaartumik qasseeriarlumillu innimiilliorsimanerarlu ungasippallaanngitsukkut unnerluutigaat.
Arnat qassiiusut – ilaatigut folketingimut ilaasortaq, Aki-Matilda Høegh-Dam – tamatuma kingornatigut tamanut saqqummerput. Siumumi siulersuisuunerit unnerluutigineqartut tunngavigalugit partiimi allattaaneq atorfimmi sulisussaajunnaarsippaat, tamatumalu kingorna Mikael Petersen nammineerluni soraarpoq.
Naak kinguaassiutitigut innimiilliorsimagaluarluni Siumumit Partii Naleqqamut nuuttoq
Taannali maanna nutaamik suliffittaarpoq, kalaallillu politikkiani sulinerminik Partii Naleqqamit nangitsisinnaalerluni. Tamanna partiip siulittaasuata, Hans Enoksenip uppernarsarpaa.
Tamannalu Aki-Mathilda Høegh-Damip tupaallaatigaa.
- Uannut tupannartorujussuuvoq, taamatullu Partii Naleqqap pissusilersuuteqarneq arlaatigut akueraa, tamanna pissutigalugu partiimut ataqqinnisimanittut ataqqinnikkunnaarpunga, folketingimi ilaasortaq oqarpoq.
AAMMA ATUARUK Inniminniilliorsimanerarneqarnermi kingorna: Mikael Petersen Partii Naleqqami allatsinngortoq
Hans Enoksenip partiip allatsissaanik atorfinitsitsinnginnermini eqqartuussissuserisumik oqaloqateqaqqaarsimanini oqaatigaa. Taassuma Mikael Petersenimut tunngatillugu politiinut unnerluuteqartoqarsimannginnera pingaartuutippaa.
- Paasissutissaatigut naapertorlugit politiinut unnerluutigineqarsimanngilaq, taamaammat uagut pisuutitsiniarnissatsinnut akisussaanngilagut. Arlaannik pisoqarsimappat tamanna Siumup akisussaaffigaa uaguunngitsoq, Hans Enoksen oqarpoq.
Partiip siulittaasuata oqarnera naapertorlugu Mikael Petersenip toqqarneqarnera ilisimasaqarluarneranik ilaatigut pissuteqarpoq.
Arnat suli unnerluutiginnissinnaasut
Arnat qulit ataatsimoorlutik saqqummersitsipput taakku eqqartuussissuserisumik ilisimannittutut nalunaajaanissaminnik misissusitsipput. Eqqartuussissuserisup arnat nalaassimasaat eqqartuussivitsigut suliassanngortinneqarsinnaanersut naliliiffigalugit ikiorpai.
Aki-Matilda Høegh-Damillu oqarnera naapertorlugu Siumup allattaanerisimasaa pillugu suli unnerluutiginnittoqanngilaq. Tamannali suliap naammassineqarneranik isumaqanngitsoq, folketingimut ilaasortaq oqarpoq.
AAMMA ATUARUK Aviisi: Mikael Petersen arnat nuluisigut pattalaartarsimanerinik nassuertoq
- Arnat innimiilliorfigineqartut ilaat Mikael Petersen pillugu eqqartuussivitsigut suliassanngortitsinissaat mattunneqanngilaq, folketingimut ilaasortaq oqarpoq, nangillunilu:
- Arnat matumanik saqqummersitsinissamut ukiorpassuit atorpaat. Tamatuma partiitsinnut saqqummiunneranit qaammatip missaa qaangiuppoq, suliallu taama ittut piffissamik atuiffiunissaat pisariaqarpoq, Aki-Matilda Høegh-Dam oqarpoq.
