Aviisi: Mikael Petersen arnat nuluisigut pattalaartarsimanerinik nassuertoq
Arnat qulit Siumut patiiani allattaanerusimasumit Mikael Petersenimit kinguaassiuutitigut kannguttaatsuliorfigineqarsimasut unnerluutiginnillutik maanna saqqummerput, taakkununngalu ilaalluni Siumut sinnerlugu folketingemi ilaasortaq Aki-Matilda Høegh-Dam.
Aka-Matilda Høegh-Dam Facebookimi allappoq 17-nik ukioqarluni partiip allattaaneranik qanoq pineqarnerminik issuaanerlu ima aallartippoq" Eqqaamavara 17-niinnarnik ukioqarlunga tassanngaannnaq tununnut pimmat, nutsakkalu illuarteriarlugit qungatsikkut itisuumik anersaajutigaluni naamaarmanga. Amiilaarnarnerpaavorlu taamaasiitigaluni nulukka tigummagit" , Aka- Matilda Høegh-Dam Facebookimi taama allappoq.
AAMMA ATUARUK Aki-Matilda Høegh-Dam: Mikael Petersenimit inniminniilliorfiusunut ilaavunga
Mikael Petersen pineqartut pillugit oqaaseqarnissaminut tunuarsimaartorujussuuvoq. KNR-imullu oqaaseqarusugani, eqqartuussissuserisunilu innersuullugu.
Maanna Mikael Petersen nassuerpoq arnat suleqatini nuluisigut pattalaartarsimallugit utoqqatserlunilu.
- Killissannik qaangiisimaguma uanga tunginnit utoqqatsertorujussuuvunga, Mikael Petersen aviisimut Ekstra Bladet-imut taama oqarpoq.
Mikael Petersen aviisimut aamma oqarpoq, kinguaassiuutitigut innimiilliortarnerit qiimmassaatitut isumaqarfigisimagai.
00:01:28
- Tamakku tamarmik pisarput, inuit inimi ilagisat qiimmassarniarlugit. Pissusissarinngisamik iliornissamik siunertaqanngillat.
Aviisimut Sermitsiaq.ag-mut Mikael Petersen sisamanngornermi oqaraluarpoq, arnat misigisimasaat ilisarisinnaanagit, unnerluussinerillu sakkortoorujussuusut.
Suliap uuma kinguneraa, Mikael Petersen Siumup allaataaneratut sapaatip akunnerani kingullermi suliunnaarmat.
