Inniminniilliorsimanerarneqarnermi kingorna: Mikael Petersen Partii Naleqqami allatsinngortoq

Siumut partiimi allattaanera, Mikael Petersen februaarimi tassangaannartumik eqqugaalerpoq.

Arnammi Siumut partiianut attuumassuteqartut qulit kinguaassiutinut innimiilliortarsimanerarlugu unnerluutigaat.

Arnat qassiiusut – ilaatigut folketingimut ilaasortaq, Aki-Matilda Høegh-Dam – tamatuma kingornatigut tamanut saqqummerput.

Suliaq Siumumi siulersuisuunerit Mikael Petersen suliunnaarsikkallarpaat – taassumalu partiimi atorfini tamatuma kingorna qimappaa.

Mikael Petersenili maanna nutaamik suliffittaarpoq. 

- Mikael apriilip aallaqqaataa 2020 aallarnerfigalugu sulilissaaq, siunissamilu suleqatigilluarnissaanut qilanaarpugut, partiip siulittaasua, Hans Enoksen KNR-imut oqarpoq.

AAMMA ATUARUK Nittartakkatigut tusagassiorfik: Arnat qulit Siumumit Mikael Petersen innimiilliorsimaneraraat

Hans Enoksen Mikael Petersenip atorfinitsinneqannginnerani eqqartuussissuserisumik oqaloqateqarsimanerarpoq. Enoksenillu Mikael Petersenimut unnerluutiginninnerpassuit politiinut nalunaarutigineqarsimanngitsut ilanngullugu oqaatigaa.

- Paasissutissaatigut naapertorlugit politiinut unnerluutigineqarsimanngilaq, taamaammat uagut pisuutitsiniarnissatsinnut akisussaanngilagut. Arlaannik pisoqarsimappat tamanna Siumup akisussaaffigaa uaguunngitsoq, Hans Enoksen oqarpoq.

Mikael Petersenip partiimi allatsinngortinneqarnera Hans Enoksenip nammineerluni Mikael Petersenimik tamarmik Siumumiikkallaramik suleqateqarnikuusimaneranik pissuteqarpoq.

- Misilittanik ulikkaarpoq aamma tunniussassanik ulikkaarpoq. Suliai ajunngilluinnaqqissaartarput. Imaanngilaq kukkusaqarsimagaanni inuunermi sinnera pillarneqaasut, Hans Enoksen oqarpoq.