Naleqqap inuusuttaasa siulittaasuat akerliulluni tunuartoq

Partii Naleraq nutaamik allatsimik atorfinitsitsilluni pingasunngornermi nalunaaruteqarpoq.

Tassalu Siumumi allataanerusimasoq Mikael Petersen atorfinitsinneqarluni.

Tamannali ataqqinninnginnerusoq, Partii Naleqqap inuusuttaasa siulittaasuat Paarnannguaq Tobiassen isumaqarpoq.

- Partiip Naleqqap inuusuttai nutaamik arfininngorpat siulittaasortaassapput. Uanga partii Naleqqap inuusuttaaninngaaniit siulittaasutut tunuarniuteqarsimavunga, tunuareerumalu Naleqqap inuusuttaaninngaanniit piivissallunga.

- Tamanna peqqutigivara Mikael Petersenip Naleqqami atorfinitsinneqarneranut, isumaqarama inuiaqatigiinnut arnanullu qulinut ataqqinninnginnerujussuarmik takutitsinerusoq, kiisalu Naleqqami killissanut qaangiinerusoq, Paarnannguaq Tobiassen taama oqarpoq.

Pinaasersumik arnerisimasoq atorfinitsitaasoq

Arnat qulit Siumumut attuumassuteqartut allattaanerminnik pinaasersumik arneriffigitittarsimallutik saqqummerput.

Arnat amerlasuut – ilaatigut folketingimut ilaasortaq, Aki-Matilda Høegh-Dam tamanut tamatuma kingorna saqqummerput.

AAMMA ATUARUK Partiimi allatsinngortitsisoqareermat: Kuno Fencker Partii Naleqqamit tunuartoq

Tamanna Mikael Petersenip Siumumi siulersuunernit tunuartitaaneranik kinguneqarpoq – Mikael Petersenilu partiimi tassani atorfimminit tamatuma kingorna soraarpoq.

Piffissalli sivikitsup ingerlanerani nutaamik atorfittaaqqippoq.

Mikael Petersenip atorfinitsinneqarneranut atatillugu Partii Naleqqamiit tunuartuni Paarnannguaq Tobiassen kisimiingilaq, Kuno Fenckerimi ippassaq aamma tunuarniuteqarpoq.

Partii Naleqqalli siulittaasuata, Hans Enoksenip, Mikael Petersenip politiinut tunniunneqarsimannginnera atorfinitsinneranut tunngavilersuutigaa.

Tamannali peqqaartariaqanngitsoq, Naleqqap inuusuttaasa siulittaasuat isumaqarpoq.

AAMMA ATUARUK Aki-Matilda Høegh Dam: Partii Naleqqamut tatiginnissuseeruppunga

- Tassa politiinut tunniunneqanngikkaluartoq atorfinitsinneqarnera suli ataqqinninnginnerujussuartut isigivara.

Paarnannguaq Tobiassenip Partii Naleqqap inuusuttaani 2014-imili siulittaasuusimasup tamanna uggorilluinnarpaa.

- Tamanna uggornaraluaqaaq, taamatut aalajangertariaqarsimanera, kisianni uanga taamatut atorfinitsitsinerat isiginngitsuusaaginnarsinnaannginnakku, tunuartariaqarlunga inissisimavunga.