Uumasulerinermik ilisimatusartunngorniarfittaassap pisortaa: Nuannaarnerup pianik qullilivugut

Soqutigigukku uumasulerinermik nunatsinni ilisimatusartunngorsinnaanngungajalerputit. Ilisimatusarfimmi uumasulerinermik nunatsinni pinngortitamik soqutigisalinnut naleqquttumik ilinniarfittaalerpoq. 

Ilisimatusartunngorniarfittaassallu pisortaata tassani ilinniarusuttunik tikilluaqqusisinnaanngulernini tulluusimaarutigaa. 

- Nuanneqaaq. Nuannaangaaratta allaat qullilivugut. Takorluugarisimasarpummi piviusunngulerpoq. Misigalugulu nuannivippoq, ilisimatusartunngorniarfittaassap SILA-p pisortaa tassani aamma akisussaasuusoq Aviâja Lyberth Hauptmann oqarpoq. 

Aviâja Lyberth Hauptmann ilisimatusartunngorniarfittaassap taassuma pilersinnissaanut 2022-mili ataqatigiissaarisuuvoq. Taanna uumasulerisutut Københavns Universitetimi ilinniagartuujuvoq tappiorannartulerinermillu Ph.D-ulluni.

Ilisimatusartunngorniarfittaassaq taanna “SILA – uumasulerinermik bachelorinngorniarneq”-mik taaguuteqarpoq, tassanilu uumasulerisunngorniarneq ukiunik pingasunik sivisussuseqartassaaq. Uumasullu nunatsinnut pingaarutillit ilinniarnermi aallaaviusassapput.

Ilisimatusartunngorniarfittaassami uumasulerisunngorniat nunatsinni pinngortitaq qanillivillugu timitarsillutik ilisimatusarfigisassavaat. Taamaaliortarnissaallu immikkuullarissumik pissuteqarpoq.

- Pinngortitaq qanillivilugu ilisimatusarneq timitarsilluni paasisaqarluarfissaqqissuusoq, puiguikkiussiffissaqqissuusoq ilisimatusarfissaqqissuusorlu upperaarput, Aviâja Lyberth Hauptmann oqarpoq.  

Taamaammat uumasulerisunngorniat soorlu tuttut, qimmit qimuttut puisillu ilisimatusarfigisassaannut ilaasassapput. Tassa uumasulerisunngorniat asiliakulasassapput.

Assersuutigalugu aavarneq pikkorissarfigisassavaat. Taamaaliortinnatilli tamatumunnga inatsisit, sakkut asimilu isumannaatsuunissaq ilisimanissaat pingaarpoq, taamaalilluni allanik aamma ilinniagassaqarluni. 

- Tuttuttamik timaat iloqutaallu taamaalillutik ilisimatusarfigisassavaat. Aamma erlavii, sananeqaataasa sunik akuutissartaqarnerat tappiorannartoqarnerallu misissortassavagut, taamaalioreeraangattalu laboratoriami aamma misissortassavagut, ilisimatusartunngorniarfittaassap pisortaa oqarpoq.  

Pinngortitaq ilisimaarissagaat

Ilisimatusartunngorniarfittaassaq kikkunnut naleqqunnersoq nalornisiginngikkini, Aviâja Lyberth Hauptmannip aamma oqarpoq.  

- Ilisimatusartunngorniarfittaassaq uagutsinnut naleqquttunngorlugu aaqqissuupparput. Tassa nunatsinni peroriartortunit tamaanilu pinngortitamik ilisimaarinnittunit iluaqutigilluarneqarsinnaasoq ersarissarlugu aaqqissuupparput. Tassanilu uumasulerisunngorniat nunatsinni suliffeqarfiit ilaanni sunniuteqarluarnissaat siunertaralugu sulileriaannaassasut.

Uumasulerisunngorniatut ilinniagaq inuussutissarsiornermi tamaleraartumik atorneqarsinnaassaaq, ilinniartullu taamaammat sulifffissanik assigiinngitsunik periarfissaqassallutik.

- Ilinniartut uumasulerinermi suleriutsit assigiinngitsut atorlugit naalakkersuisoqarfinni sulisarnissaat ilisimatusartunullu siunnersortaasarnissaat takorloorparput. Ilisimatusartunngorusuttortaat suliniaqatigiiffinni arlaannaannulluunniit attuumassuteqanngitsuni aalisakkerivinnilu sulisinnaallutillu aamma kanditatinngorniarsinnaassapput Ph.d.-nngorniarsinnaassallutilluunniit,  Aviâja Lyberth Hauptmann oqarpoq.

Ilisimatusartunngorniarfittaassaq ukiuni arlalinni pilersinneqalersaareerluni Pinngortitaleriffik suleqatigalugu piviusunngulerpoq. 

Ilisimatusartunngorniarfittaassamilu uumasulerisunngorniarusullutik qinnuteqartussanik - immaqa pingaarnerpaasumik - aallartittoqarnissaa tullinnguuppoq.  Aallartinnissamillu soqutiginnittoqaalulereerpoq.

- Takorluukkavut timitaleriarpata qanoq naammassisaqarfiunissaasa takunissaannut qilanaaqaagut. Ilisimatusartunngorniarfittaassammi qanoq ittuunissaanut nunattalu inuinut qanoq iluaqutaatiginissaanut takorluugarpassuaqarpugut. Taamaammat pissangavugut, Aviâja Lyberth Hauptmann oqarpoq.

Uumasulerinermik ilisimatusartunngorniarfittaassaq pillugu paasisaqarnerorusukkuit tassungarpiaq tunngasumik aggustimi marloriarluni workshoppertitsinerni peqataasinnaavutit. Ilisimatusartunngorniarfittaassami ilinnialersussat siulliit 2025-mi februaarip aallaqqaataani aallartissapput, tamatumunngalu ukioq manna novembarip aallaqqaataajutinnagu qinnuteqartoqarsinnaavoq.