Ukiut qulit matuma siorna sanaartorneq aallartippoq: Uumassusilerinermi ilinniakkami taamaammat suli ilinniagaqalersinnaanngilatit

Kalaallit Nunaanni uumassusilerinermik ilinniarfeqalernissaa ukiut qulit matuma siorna aalajangertoqareeraluartoq, suli ilinniakkamut qinnuteqartoqarsinnaanngilaq. Ilinniakkammi aallartinneqarnissaanut suli ukiumoortumik millionit koruunit amigaatigineqarmata. Tamannalu naammanngitsoq, inatsisartuni ilaasortaq Kuno Fencker isumaqarpoq.

Allattoq Steve Pedersen Hinrup

marsip 22-at 2023 14:53

Paasissutissat kingulliit aallaavigalugit, uumassusilerinermut ilinniarfinngortussap aallartinnissaanut 1.050.000 koruunit ukiumoortumik suli amigaataapput, Sermitsiaq taama allappoq.

Ukiorpaalunni Ilisimatusarfiup Uumassusilerinermik nunatsinni ilinniagaqartoqarsinnaalernissaa sulissutigaa.

Ukiut qulit matuma siorna allaaserinikuuarput uumassusilerinermik ilinniarsinnaalernissaq sulissutigineqaleruttortoq, ilinniarfissallu illutassaata sanaartornera aallartisarneqalertoq.

Ilisimatusarfiup Pinngortitaleriffiullu uumassusiulerinermik ilinniagaqarsinnaanngornissap piviusunngortinnissaa suleqatigiissutigaat.

Massakkullu inatsisartuni ilaasortap Kuno Fenckerip Peter Olsen aperaa uumasssusilerinermik ilinniarfiup pilersinneqarnissaata killiffia sumut killinnersoq.

Aamma atuarukUumassusililerinermik Nunatsinni ilinniagaqartoqarsinnaalissaaq

Peter Olsenilli akissutimini allappoq 2024-mut aningaasanut inatsisissamut isumaqatigiinninniarnermut qinnuteqaammut aningaasaliisoqarnissaa qaqissallugu.

- Pisortatigoortumik suliat ilinniartitaanermut tunngasut tamarmik naammassereerput, tassa ilinniarnermik aaqqissuussineq Akademisk Rådimiit akuerineqareerpoq Naalakkersuisoqariimmiillu tusarniutigineqareerluni, Peter Olsen Kuno Fenckerimut akissummini taama allappoq.

Nangillunilu:

-Aningaasaliissutinik 2023-mi pissarsinissaq ajornarsimavoq, 2024-mulli Aningaasanut lnatsisissamut siunnersuummut misileeqqinneqassaaq.

2024-mut aningaasanut inatsisissamut isumaqatigiinninniarnermut qinnuteqaammut aningaasaliisoqarnissaa akuerineqassappat, ilinniagaq februaarimi 2025-mi aallartinneqarsinnaassaaq, Aviaja Lyberth Hauptmann Live Mejer Larsenilu takorluukkaminnik allataminni taama allapput.

Aamma atuarukIlisimatusarfimmi biologi pillugu ilinniarsinnaalernermut aningaasaateqarfik aningaasaliisoq

Imatullu nangillutik:

-Ukiut tallimat kingulliit ingerlaneranni ingerlaavartumik aningaasaliisoqartarsimavoq Ilisimatusarfimmi ilinniakkamik pinngortitamik ilisimatusarfiusumik kiisami pilersitsinissamut maanna periarfissaqalernitsinnik kingunilimmik.

Aviaja Lyberth Hauptmann aallaavigalugu uumassusilerinermik ilinniagaq ateqassaaq ”SILA”, ilinniagarlu sivisussuseqassaaq ukiunik pingasunik.

Ilinniagaq naammassisimagaanni Pinngortitaleriffimmi, pinngortitaq pillugu suliffeqarfinni assigisaaniluunniit atorfinittoqarsinnaavoq, naalakkersuisumut allatsi Rosa Thorsen KNR-imut taama allappoq.