Aviaja Lyberth Hauptmann adjunktiuvoq namminerlu Københavnip universitetiani biologitut ilinniarnikuulluni kiisalu mikrobiologi pillugu Ph.D naammassinikuullugu.

Ilisimatusarfimmi biologi pillugu ilinniarsinnaalernermut aningaasaateqarfik aningaasaliisoq

Biologi pillugu Ilisimatusarfimmi 2024-miit ilinniarsinnaalernissaq iluatsissinnaalerpasippoq. Aningaasaateqarfiup tapiissuteqarneratigut piareersarnerit maanna aallartipput.

Universitetimi ilinniarsinnaasamik biologi pillugu ilinniarsinnaaneq Kalaallit Nunaanni soorunami periarfissaassutut immaqa isigineqarsinnaangaluarpoq, tamannali periarfissaanikuunngilaq.

Biologi pillugu ilinniarsinnaalernissaq ukiorpassuarni Ilisimatusarfiup akissaqartinnikuunngilaa, maannali naammattunik aningaasaliisoqarpoq.

AAMMA ATUARUK Kalaalimerngit iffiukkanit aserorterneqanngitsunik ilalinnit naatitaniillu peqqinnarneruppat

Pinngortitaleriffimmi Aage V. Jensen Naturfondimit 10 million koruuninik taperneqarpoq, aningaasallu ilaat biologi pillugu ilinniarsinnaanerup aallartisarnissaanut atorneqassapput.

Tamanna biologip Ilisimatusarfimmilu biologi pillugu immikkoortortaqarfissami siunissami pisortaasussap, Aviaja Lyberth Hauptmannip, nuannaarutigaa.

- Ilisimatusarfimmi biologi pillugu ilinniarsinnaaneq ukiorpaalunni takorluugaannaalluni pilersaarutigineqarnikuuvoq, maanilu inuiaqatigiit aningaasaqarnerat pinngortitami pisuussutinik aallaaveqarlunilu inuit pinngortitami pissutsit qanilluinnarlugit inuummata, tamanna soorunami pisariaqarpoq.

- Soorunami Kalaallit Nunaanni biologi pillugu ilinniarsinnaasariaqarpugut, ilinniarsinnaanerup piviusunngortinnissaanut siuttuusimasoq, Aviaja Lyberth Hauptmann, oqarpoq.

Qalerallit pillugit pikkorissarnerit

Taanna nammineq adjunktiuvoq, Københavnillu universitetiani biologitut ilinniarnikuulluni kiisalu mikrobiologi pillugu Ph.D naammassinikuullugu.

Aviaja Lyberth Hauptmannip neriuutigaa, nalinginnaasumik biologi pillugu soorlu naatsorsueqqissaarnerit kiisalu økologi pillugit pikkorissartarluni ilinniarneq ingerlanneqassanngitsoq, tamakkuali saniatigut aamma:

- Soorlu qaleralik pillugu ilinniartut pikkorissarsinnaasariaqarput, qaleralillu aallaavigalugu biologimut atatillugu ilisimasariaqakkat paasiniarsinnaallutigit, qaleralik pillugu Aviaja Lyberth Hauptmann oqarpoq.

AAMMA ATUARUK Ilisimatusartoq Qaanaarmiut anaannik misissuiniartoq

Biologip neriuutigaa, ilisimatuut aalisartullu imminnut paasilluarsinnaalernerannik biologi pillugu ilinniarsinnaalerneq aqqutissiuussissasoq.

- Ilinniartut aalisartut aalisarnerannut peqataasarsinnaapput, taakkua namminneq qaleralimmut atatillugu ataatsimik paasisimasallit ilagisinnaassammatigit kiisalu aamma ilisimatuut qaleralik pillugu allamik paasinnittariaasillit ilagisinnaassallugit, Aviaja Lyberth Hauptmann oqarpoq.

Ilinniagassaq taaguuteqassaaq 'biologi pillugu SILA bachelor' neriuutaavorlu 2024-imi ammarneqassasoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl