Ilisimatusartoq: Kalaalimerngit iffiukkanit aserorterneqanngitsunik ilalinnit naatitaniillu peqqinnarneruppat
Iffiukkat aserorterneqanngitsunik ilallit naatitallu kitaamiunit nerisassatut peqqinnartutut isigineqarput, taamaattumillu tamakkutukulaqqusipput.
Pinngortitaleriffimmili ilisimatusartut maanna paasiniarnialerpaat nerisassatut siunnersuutit taakku kalaallinut aamma atuunnersut.
- Taamaattumik isumaqarpunga pingaaruteqartoq nerisassatut siunnersuutit tamakku aamma kalaallinut atuunnersut; nerisassanummi allarluinnarnut naleqqussarsimavugut. Imaluunniit allarluinnarnik nerisaqarneq kalaallinut allarluinnaanersoq, Aviaaja Lyberth Hauptmann oqarpoq.
AAMMA ATUARUK Nerisassat pillugit Nuummi meeqqanut festivalertitsilersut
Naleqqussarnissamut piffissaq sivikitsuinnaasoq
Europap kitaani innuttaasut ukiuni tusintilikkuutaani nerisassanut nutaalianut naleqqussarsimapput.
Nunatsinnili tamakkuninnga sungiussiniarneq sukkanerujussuusimavoq.
- Kalaallit Nunaanni piffissap sivikitsup ingerlanerani proteininik orsunillu akulinnik piniakkanik nerisaqarnermiit - mutinik nerisaqarnermut nuussimavugut.
Misissuinermut atasumik Aviaaja Lyberth Hauptmannip Qaanaarmiut 20-t anaasigut qaammatit 15-it ingerlaneranni malinnaaffigissavai.
Qaanaamik toqqaaneq nalaatsornerinnaanngilaq, pingaartuuvormi misissuinermi peqataasut ukiup ilaani avataaniit nutaartugassaqartassannginnerat.
AAMMA ATUARUK Ilisimatusartoq Qaanaarmiut anaannik misissuiniartoq
Nerisavut peqqissutsimut sunniuteqarput
Taamaaliornikkut takuneqarsinnaassaaq kalaalimerngit inuussutissallu eqqussukkat bakterianut inalukkaniittunut, taamalu peqqissutsitsinnut sunniutai.
- Bakteriat inalukkaniittut nerisatsinnit sunnerneqartartorujussuupput, bakteriallu inalukkatsinniittut inuunitsinni qanoq innitsinnut sunniuteqartartorujussuullutik. Timikkut tarnikkullu.
Maanilu eqqarsartaatsitsinni kalaalimerngit peqqinnarnersaapput. Tamanna misissuinermini Lyberth Hauptmannip ilisimatuussutsikkut tunngavilersorusuppaa.
- Iffiukkat aserorterneqanngitsunik ilallit naatitallu inuiaqatigiittut uatsinnut peqqinnarnerunerat ilumoornersoq, imaluunniit ilumut kalaaliminertorneq uatsinnut peqqinnarnerunersoq paasiniarniarlugu, Aviaaja Lyberth Hauptmann oqarpoq.
