Uumassusililerinermik Nunatsinni ilinniagaqartoqarsinnaalissaaq
Ilisimatusarfimmi uumassusililerinermik ilinniarfimmik pilersitsinikkut ilaatigut Nunatsinni peqqissutsimik ilisimatusarneq nukittorsarneqarsinnaassaaq, tamannalu nunatsinni pinngortitalerinermik ilinniarfissap ingerlanneqarneranut aningaasanik aningaasanut inatsisini aggersuni immikkoortitsisoqartarnissaanik Naalakkersuisut tunngaviusumik aalajangerannut peqqutaasut pingaarnerit ilagaat.
- Kalaallit Nunaanni peqqissutsimik ilisimatusarnerup annertuup Kalaallit Nunaanni ingerlanneqartup maanngaanniit aallaaveqarnissaa Peqqissutsimik ilisimatusarnermut aningaasaliinikkut Naalakkersuisut aammattaaq qulakkeerniarpaat. Kalaallit Nunaanni Kalaallillu Nunaannut annertunerusumik ilisimatusartoqartillugu Kalaallit Nunaanni aalajangiisartut aalajangiinissamik pitsaasumik tunngavissaqarnissaat anguneqassaaq”, Ilinniartitaanermut Ilisimatusarnermullu Naalakkersuisoq Nick Nielsen nassuiaavoq.
Ilisimatusarfimmi iumassusililerinermik ilinniarfissaq Artekimi periuseq malillugu pilersinneqassaaq, tassungalu atatillugu Pinngortitaleriffiup Prhus Universitet aamma University of Manitoba Canadamiittoq suleqatigiinnissamik isumaqatigiissuteqarfigisimavai. Pinngortitaleriffik aningaasaateqarfinnut aningaasanik qinnuteqarluni aallartereerpoq, illutassaalu 2015-imi naammassineqarsimanissaa naatsorsuutigineqarpoq.
