Demokraatit: Uuliasiornissamut aningaasaliissuteqarneq isumassarsiatsialaanngilaq

Naalakkersuisut uuliasiornissamut 48 millionit koruuninik aningaasaliissuteqarnerat Demokraatinit illuatungilerneqarpoq.

Uuliasiornerup tunisassiornermik kinguneqarsinnaanissaanut uppernarsaatissaqartinngikkallartillugu Demokraatit aningaasaliineq akueriuminaatsippaat. Randi Vestergaard Evaldsen taama isumaqarpoq.

Naalakkersuisut uuliasiornermut 48 millionit koruuninik aningaasaliipput, uuliamik qalluisoqarluni tunisassiortoqarsinnaalernissaanut aningaasaliisinnaasussanik ujartuisoqarluni.

Nunatsinni aningaasarsiornikkut ineriartortitsinermi assigiinngitsutigut aningaasaliisoqarnissaa Demokraatit isumaqatigilluinnarpaat,
Naalakkersuisulli suliami uani suleriaasiat Demokraatit apeqquserpaat. Randi Vestergaard Evaldsen, Demokraatit sinnerlugit Inatsisartut Inuussutissarsiornermut Aatsitassanullu Ataatsimiititaliaanni ilaasortaq taama oqarpoq:

- Inuiaqatigiinni nunatsinni iluamik oqaluuserineqanngitsoq, naalakkersuisullu anguniagaanni aamma ilaanngitsoq, tekstanmærkingitsigut ikkullugu, innuttaasunut oqaloqatigiissutigeqqaarnagu, isaasalerlugu "toqqortorlugu" qaqilertorniarneqarnera ernumanartorujussuartut isigivara, Randi Vestergaard Evaldsen, Demokraatineersoq, taama oqarpoq.

AAMMA ATUARUK Naalakkersuisut uuliamik misissuisitseqqilerusuttut

Aningaasat 48 millionit koruunit Alcoap suliniutigisimasaaneersut, Inuussutissarsiornermut Aatsitassanullu naalakkersuisup Aqqalu Jeremiassenip ilisimatitsissutigaa.

Aningaasat inuiaqatigiinni suliniutinit allanit taamaasillutik aaneqanngillat. Randi Vestergaard Evaldsenili naapertorlugu aningaasat taakku allatut atorneqarsinnaagaluarput:

- 48 millionit koruunit uagutsinnut amerlasoorujussuupput. Tamakkua assersuutigalugu peqqinnissaqarfiup iluani, inuusuttunullu atorneqarsinnaagaluarput, meeqqat atuarfiini imaluunniit akileraarutitigut appaanermi assigiinngitsutigut atorneqarsinnaagaluarput, Randi Vestergaard Evaldsen, Demokraatit sinnerlugit Inatsisartut Inuussutissarsiornermut Aatsitassanullu Ataatsimiititaliaanni ilaasortaq taama oqarpoq.

AAMMA ATUARUK Uuliasioqatigiiffiit Kitaata imartaanit qimarrattut